"Tədarük olunan yunun istifadəsi üçün bu yaxınlarda Mingəçevir şəhərində yüngül emal sənaye müəssisəsi fəaliyyətə başlayacaq"
"Əfsuslar olsun ki, bizdə yun tədarükü ilə bağlı işlər lazımi səviyyədə qurulmayıb". Bunu "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunan konfransda Azərbaycan Prezidenti İlham Əliyev deyib.
Dövlət başçısı öz çıxışında yun tədarükü ilə bağlı bunları qeyd edib: "Mən maraqlanmışam, bizdə cəmi bir tədarük məntəqəsi var. Bu, əlbəttə ki, qəbuledilməzdir. Bu il müxtəlif bölgələrdə ən azı 10 tədarük mərkəzi yaradılmalıdır. Burada da həm daxili istehsal, həm də xaricə ixrac etmək üçün mərkəzləşdirilmiş siyasət aparılmalıdır. Biz bu imkanlardan da istifadə etməliyik və burada, əlbəttə ki, kompleks tədbirlər görülməlidir. Burada həm tədarük, həm cins, həm də ixrac potensialı məsələləri var. Hər bir sahədən istifadə etməliyik ki, neftdən gələn valyutanın azalmasını biz müəyyən dərəcədə digər sahələrlə bağlaya bilək".
Məsələ ilə bağlı Milli Məclisin Aqrar siyasət komitəsinin üzvü, millət vəkili Aydın Hüseynovun fikirlərini öyrəndik.
Millət vəkili "Bakı-Xəbər"ə açıqlamasında qeyd etdi ki, ölkədə cəmi bir yun tədarük məntəqəsi var: "Ölkə başçısı bununla bağlı öz narazılığını "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunan konfransda ifadə etdi. Yun tədarük məntəqələrinin sayını artırmaq lazımdır. Tədarük olunan yunun istifadəsi üçün bu yaxınlarda Mingəçevir şəhərində yüngül emal sənaye müəssisəsi fəaliyyətə başlayacaq. Bəllidir ki, Mingəçevirdə toxuculuqla bağlı müasir standartlara cavab verən kombinatlar fəaliyyət göstərəcək. Toxuculuq kombinatında tədarük olunan yun onlar üçün ən əlverişli xammal hesab olunacaq. Bu gün yun tədarük bazalarına təhvil verilir, onlar isə həmin məhsulu Mingəçevirə təhvil verir. Bununla da tələbatın ödənilməsi istiqamətində bir sıra işlər görüləcək".
Həmsöhbətimizin sözlərinə görə, Mingəçevirdə toxuculuqla bağlı müasir texnologiya əsasında fəaliyyət göstərəcək fabriklər üçün ən gözəl xammal yun tədarük məntəqələrinə qəbul olunan məhsullar olacaq. Bu isə insanlarda yun tədarükü ilə məşğul olmağa stimul yaradacaq: "Onlar tədarük etdiyi yunu hansı məkanlara satacağı barədə əmin olacaq".
Günel CƏLİLOVA
