Fikrət Yusifov: "Regionların sosial-iqtisadi inkişafı ilə bağlı proqramın qəbulu tək regionların yox, digər sahələrin də inkişafına aiddir"
Dünya ölkələri arasında iqtisadi inkişaf templərinə görə lider mövqedə qərar tutan Azərbaycan üçün xarakterik xüsusiyyətlərdən biri də mövcud tərəqqinin yalnız ölkə paytaxtını deyil, hər bir bölgəni əhatə etməsidir.
Məlumdur ki, dövlət başçısı İlham Əliyev tərəfindən təsdiq olunmuş "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı" uğurla icra edilir. Bu proqramın icrasının üçüncü ilinin yekunlarına həsr olunan konfransda İ.Əliyev qeyd edib ki, Dövlət Proqramının 2014-cü ildə qəbulu tarixi hadisədir, çünki regionların inkişafı, ölkə iqtisadiyyatının şaxələndirilməsi, atılan bu addımlar, infrastrukturla bağlı layihələr bugünkü reallığı yaradıb: "Əgər o vaxt proqramı mənim təşəbbüsümlə biz qəbul etməsəydik, əlbəttə ki, regionlarda bugünkü uğurları əldə edə bilməzdik. Bütün bölgələrimiz və şəhərlərimiz abadlaşıb, gözəlləşib. Əsas şəhərlərimiz - Bakı, Gəncə və Sumqayıt göz oxşayır, dünya üçün bir nümunədir. Bütün şəhərlərimizdə abadlıq, quruculuq işləri aparılıb, böyük infrastruktur layihələri icra edilib və bu imkan verir ki, bu gün Azərbaycan dinamik inkişaf etsin. Həmçinin, biznes strukturları bu imkanlardan səmərəli şəkildə istifadə etsin".
Qəbul olunan məlum proqram sayəsində bu gün regionların sosial-iqtisadi inkişafı göz qabağındadır. Maraqlıdır, adıçəkilən proqram qəbul olunmasaydı, o zaman regionlarımızda vəziyyət necə olacaqdı?
"Ekonomiks" Beynəlxalq İqtisadi Araşdırmalar Birliyinin sədri, iqtisadi elmlər doktoru Fikrət Yusifov "Bakı-Xəbər"ə açıqlamasında qeyd etdi ki, qəbul olunan hər bir proqram regionların inkişafını xüsusi bir ardıcıllıqla nəzərdə tutur. Bu baxımdan dövlət proqramlarının əhəmiyyəti çox böyükdür: "Çünki hər hansı bir dövlət proqramı tərtib olunmazdan öncə onunla bağlı görüləcək işlərin hər biri geniş şəkildə araşdırılıb öyrənilir. Bundan sonra hansı işlərin görülməsi o proqramlara salınır və təbii ki, onun icrasına müəyyən bir formada nəzarət olunur. Belə proqramlar olmazsa, kim necə istəyir və ya icra hakimiyyəti rəhbəri səviyyəsində necə düşünülürsə, pərakəndə şəkildə bu işlər aparılır. Ola bilsin ki, mərkəzi icra hakimiyyəti orqanları tərəfindən hansısa rayonda işlər necə gəldi görülərdi. Ancaq proqram regionların kompleks inkişafını bir araya gətirib. Adıçəkilən proqramın qəbulu tək regionların yox, digər sahələrin də inkişafına aiddir. Bu baxımdan
regionların sosial-iqtisadi inkişafı ilə bağlı qəbul olunan proqramın əhəmiyyəti böyükdür".
F.Yusifov hesab edir ki, regionların sosial-iqtisadi inkişafı ilə bağlı proqram qəbul olunmasa idi, bölgələrdə pərakəndəlik olardı: "Regionlarda infrastruktur layihələrinin həyata keçirilməsi, yolların çəkilməsi, məktəb, bağça, səhiyyə obyektlərinin tikilməsi və ya yenidən bərpa olunması ilə bağlı məsələlər proqram çərçivəsində araşdırılaraq qəbul olunub. Regionların inkişafında nələrə daha çox diqqət yetirilməsi də qeyd olunub. Onu da deyim ki, regionların sosial-iqtisadi inkişafı ilə bağlı qəbul olunan proqramlar bir neçə il ərzində həyata keçirilir".
Günel CƏLİLOVA
