Bu gün Azərbaycan üçün mühüm əhəmiyyət kəsb edən məsələlərdən biri də iqtisadiyyatın şaxələndirilməsi, ölkənin ixrac etdiyi məhsulların çeşidinin çoxalmasıdır. Bu məqsədlərə nail olunması üçün son aylarda biznes və investisiya mühitinin yaxşılaşdırılması, sahibkarlığın inkişafı, eləcə də digər iqtisadi islahatların həyata keçirilməsinə xüsusi diqqət ayrılıb.
Nəticədə qeyri-neft sahəsi üzrə ixracın həcmində ciddi artımlar qeydə alınır. Bu sahədə isə regionların xüsusi çəkisinin əhəmiyyətli dərəcədə yüksəlməsi müşahidə olunur.
Xatırladaq ki, bu məsələ "Regionların 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunmuş konfrasda da xüsusi diqqət mərkəzində olub. Elə qeyri-neft sahəsi üzrə ixracın artımında regionların sosial-iqtisadi inkişafı dövlət proqramlarının müstəsna əhəmiyyəti var. Məhz bu proqramlar regionların potensialının artmasına, biznes və investisiya mühitinin yaxşılaşmasına əlverişli şərait yaradıb. Ötən dövrdə regionların inkişafına 4 milyard manat vəsait yönəldilib. Nəticə isə odur ki, bu gün həm regionlarda dinamik inkişaf yaşanır, həm də burada dünya bazarlarına çıxarılan məhsulların həcmi artır. İndi regionlar "Made in Azerbaijan" brendinin xarici bazarlara çıxarılmasına daha çox töhfə verir. Bu fonda keçirilmiş üç ixrac missiyası zamanı imzalanmış müqavilələrə əsasən, yeni bazarlar kimi Çinə şərab, Birləşmiş Ərəb Əmirliklərinə ərzaq məhsullarının ixracına başlanıb. Ötən ilin noyabrından etibarən şərab, pambıq ipliyindən məmulatlar, konservlər, su və şirələr, fındıq və digər məhsulların Rusiya, ABŞ, Çin, Almaniya, Türkiyə, Belarus və sair ölkələrə ixracı ilə əlaqədar ixrac təşviqinin ödənilməsinə dair qərarlar qəbul edilib. Bu məhsullar isə əsas etibarı ilə regionlarda istehsal olunur. Hökumət tərəfindən cari ildə xüsusilə kənd təsərrüfatı məhsullarının və şərabın ixracının artırılması üçün bir sıra ölkələrə ixrac missiyaları və beynəlxalq sərgilərdə iştirak təmin olunacaq. Bu isə regionların ixracda payının daha da artması deməkdir. Məsələ ilə bağlı iqtisadçı-ekspert Vüqar Bayramov da sosial şəbəkədə paylaşdığı şərhində regionların inkişafına dair görülən işləri yüksək qiymətləndirir. "Regionların 2014-2018-ci illərdə sosial-iqtisadi inkişafı Dövlət Proqramı"nın icrası ilə bağlı hər ilin əvvəlində müşavirənin keçirildiyini xatırladan ekspert qeyd edib ki, sözügedən konfranslarda son 1 ildə görülən işlər müzakirə edilməklə yanaşı, hökumətin qarşıdakı öhdəlikləri də müəyyənləşir: "Ölkə prezidentinin iştirakı ilə belə bir tədbirin keçirilməsi ondan xəbər verir ki, Azərbaycanda dövlət proqramlarının icrası ilə bağlı siyasi iradə mövcuddur. Dövlət başçısı dövlət proqramının icrası ilə bağlı məsələləri yaxından izləyir və proqramın yüksək səviyyədə icrasının təmin edilməsi üçün mütəmadi olaraq tapşırıqlarını icra hakimiyyət orqanlarına bildirir". Azərbaycanın postneft dövrünə keçdiyini dilə gətirən iqtisadçı-ekspert belə bir dövrdə regionların inkişafının daha aktual olduğunu deyib: "Bu aktuallıq həm də regionlara xarici sərmayənin cəlb edilməsinin prioritet olduğunu göstərir. Dövlət başçısı bundan əvvəlki görüşlərində də məhz hər bir icra başçısına xarici investoru öz rayonuna cəlb etmək tapşırığı vermişdi. Prezident hər bir rayonun fəaliyyətini həmin rayonda açılan iş yerlərinin sayına uyğun olaraq qiymətləndirəcəyini bildirmişdi. Bu gün regionların inkişafı və xüsusən də regionlarda yeni iş yerlərinin yaradılması xarici investisiyaların cəlb edilməsi üçün prioritetdir. İnfrastruktur formalaşıb və formalaşan infrastruktur artıq növbəti mərhələdə birmənalı şəkildə xarici investisiyaların cəlb edilməsinə zəmin yaratmalıdır. Bu aspektdən, təbii ki, dövlət proqramı kifayət qədər əhəmiyyətli bir sənəddir. Həm infrastrukturun formalaşdırılmasına imkan yaradır, həm də proqramda olan fəaliyyətlər nəticə etibarı ilə yerli icra orqanları qarşısında xüsusi öhdəliklərin müəyyənləşməsinə imkan verir. Bundan əlavə, dövlət proqramı regionlarda yeni iş yerlərinin yaradılması, məşğulluğun təmin edilməsi baxımından da əhəmiyyətli hesab edilir".
Sözügedən konfransda Azərbaycan Prezidentinin son illər ölkəmizdə milli biznesin və milli sahibkarlığın formalaşması ilə bağlı fikirlərinə toxunan V.Bayramov vurğulayıb ki, milli biznes və milli sahibkarlığın formalaşması qarşıda duran əsas hədəflərdəndir: "Dövlət proqramı çərçivəsində təkcə paytaxtda deyil, eləcə də regionlarda milli biznesin formalaşması istiqamətində fəaliyyətlər həyata keçirilir. Hazırkı postneft dövrünün çağırışlarına uyğun olaraq milli biznesin dəstəklənməsi ölkənin əsas prioritetləri siyahısına daxildir. Eyni zamanda, investisiya təşviqi sənədinin tətbiq edilməsi, regionlarda fəaliyyət göstərən sahibkarlar üçün güzəştlərin müəyyən edilməsi və bir sıra digər təşviqedici addımların atılması ondan xəbər verir ki, əvvəlki dövrlərdə olduğu kimi, növbəti illərdə də milli biznesin inkişafı əsas prioritetlərdən olacaq".
Tahir TAĞIYEV
