Ruslan Atakişiyev: "Bu potensialı hərəkətə gətirmək üçün yerli sahibkarlara hərtərəfli şərait yaratmaq lazımdır"
"Regionların 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunan konfransda Azərbaycan Prezidenti İlham Əliyev ölkəmizdə güclü və fəal milli biznes sinfinin formalaşdığını bildirib:
"Əlbəttə, dövlət də bu sahədə öz dəstəyini əsirgəməyib. Mən iş adamları ilə daim təmasdayam, görüşlər keçiririk, onların problemlərinin həlli ilə məşğuluq və onlara həmişə siyasi və maddi dəstək verilir. Çünki mən yaxşı başa düşürdüm ki, ilkin kapital olmadan heç bir işi görmək mümkün deyil. Bir də ki, heç bir biznesmen, iş adamı risqli yerlərə, ölkələrə heç vaxt pul qoymaz. Ona görə təhlükəsizlik, sabitlik, gözəl ictimai ab-hava, biznesə dövlət dəstəyi və maddi dəstək, - bax, hesab edirəm ki, bu amillər milli biznes sinfini formalaşdırır".
Dövlət başçısı onu da bildirib ki, Azərbaycanda sahibkarlara dəstək məqsədilə Sahibkarlara Kömək Milli Fondu yaradılıb və sahibkarlara kreditlər verilib: "İndi bir çox ölkə bizim təcrübəmizdən istifadə edir. İnfrastruktur layihələri, biznesə göstərilən dəstək, sosial layihələr vahid proqram çərçivəsində uğurla icra edilir. Bizim məqsədimiz müstəqilliyimizi gücləndirmək və dayanıqlı inkişafa nail olmaqdır. Məqsədimiz odur ki, Azərbaycan xalqı daha da yaxşı yaşasın".
Ümumilikdə, milli biznes sinfinin formalaşması ölkədə qeyri-neft sektorunun inkişafında necə rol oynaya bilər?
Sözügedən məsələ ilə bağlı fikirlərini "Bakı-Xəbər"lə bölüşən İqtisadi Resursların Öyrənilməsi Mərkəzinin direktoru Ruslan Atakişiyevin fikrincə, yerli sahibkarlar tərəfindən qurulan müəssisələr ölkənin dayanıqlı inkişafını təmin edə bilər: "Çünki bunlar milli sahibkarlar sayılır. Sadəcə olaraq bunların fəaliyyətinin genişləndirilməsi daxili investisiya mənbələrinin iqtisadiyyata yönəlməsinə köməklik göstərir. Digər tərəfdən, Azərbaycandakı iş adamları tərəfindən açılan müəssisələrin əhəmiyyəti böyükdür. Fərqi yoxdur, daxildə belə müəssisə açsınlar, yaxud da xaricdə. Bu, ümummilli məhsulun artmasına kömək edir. Ona görə də belə müəssisələrin olması əmək qabiliyyətli əhalinin aktivliyinə gətirib çıxarır. Ən başlıcası isə, milli biznes sinfinin formalaşması ölkədə qeyri-neft sektorunun dayanıqlı və sabit inkişafına təkan verəcək. Nəticədə ölkədə daha çox daimi iş yeri açılacaq. İdxaldan asılılıq azalacaq. Belə ki, Azərbaycan bir sıra məhsullara olan tələbatı daxili istehsal hesabına təmin edə bilər. Sadəcə, bu potensialı hərəkətə gətirmək üçün yerli sahibkarlara hərtərəfli şərait yaratmaq lazımdır. Burada təkcə sahibkarlara əlverişli şərtlərlə kreditlərin verilməsindən söhbət getmir. Söhbət həm də məhsulun rəqabətə davamlılığından, bazarların tapılmasından, əlverişli rüsumların tətbiq olunmasından və s. amillərdən gedir". Vidadi ORDAHALLI
