Vüqar Bayramov: "Praktiki olaraq Azərbaycan ötən ilin sonundan yeni modelə qədəm qoydu"
"Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunan konfransda çıxış edən Prezident İlham Əliyev bir sıra məqamlara toxunub.
Dövlət başçısının sözlərinə görə, Azərbaycan digər ölkələrlə müqayisədə ağır vəziyyətdən minimum itkilərlə çıxıb. O bunu bir sıra arqumentlərlə əsaslandırıb: "Bütün obyektiv çətinliklərə baxmayaraq, 2016-cı ildə Azərbaycan iqtisadiyyatı inkişaf etmişdir və bütün əsas vəzifələr icra olunmuşdur. İqtisadiyyatın əsas göstəriciləri müsbətdir. Kənd təsərrüfatı 2,6 faiz, ölkəmizin qeyri-neft sənayesi isə 5 dəfə artmışdır. Dünyada neftin qiymətinin üç-dörd dəfə aşağı düşməsinə baxmayaraq, əvvəlki illərdə görülmüş işlər və keçən il apardığımız dərin islahatlar nəticəsində biz bu inkişafı təmin edə bilmişik. Əlbəttə, dünyada bu gün də davam edən iqtisadi və maliyyə böhranı bizim işimizə də öz mənfi təsirini göstərdi. Ancaq hesab edirəm ki, Azərbaycan digər ölkələrlə müqayisədə bu ağır vəziyyətdən minimum itkilərlə çıxa bilmişdir. Keçən il yüz mindən çox daimi iş yeri yaradılmışdır. Bu proses 2004-cü ildən bu günə qədər davam edir".
Prezidentin fikrincə, Azərbaycan Neft Fondu valyuta ehtiyatlarını qoruya bilib: "Hesab edirəm ki, bu da çox əlamətdar hadisədir. Çünki neftlə zəngin olan ölkələrin böyük əksəriyyəti öz valyuta ehtiyatlarının bir hissəsini xərcləmişdir. Biz isə çalışdıq və buna nail olduq ki, valyuta ehtiyatlarımızı qoruyaq".
Bütövlükdə, digər ölkələrlə müqayisədə dünyadakı iqtisadi böhrandan Azərbaycan tam itkisiz çıxa bilərdimi? Məsələyə münasibət bildirən iqtisadçı-ekspert Vüqar Bayramovun sözlərinə görə, 2016-cı ildə böhran Azərbaycanda özünü çox göstərsə də, bir sıra ciddi islahatlara start verildi: "Xüsusən də strateji yol xəritələrinin qəbul olunması buna əyani sübutdur. Bu, ötən ilin yaddaqalan fəaliyyətlərindən biri oldu. Praktiki olaraq Azərbaycan 2016-cı ilin sonundan yeni modelə qədəm qoydu. Yeni model Azərbaycanda tətbiq olunmağa başladı. Sözügedən model də postneft dövrünün çağırışlarına uyğun olaraq formalaşan və həyata keçirilən bir model idi. Güman edirəm ki, 2016-cı il bu kontekstdən böhrana qarşı mübarizədə mühüm il oldu. Böhranın təsirləri müəyyən qədər aradan qaldırıldı. Xüsusən də qanunvericilik bazasının gücləndirilməsi baxımından vacib illərdən biri oldu. Sözsüz ki, islahatlar davam etdiriləcək. Bu məqam Prezidentin ətraflı çıxışında da qeyd olundu. 2017-ci il ölkə Prezidenti tərəfindən məhz islahatlar ili kimi qeyd olunur və qiymətləndirilir. Ötən il böhranla mübarizə ili kimi yadda qalıbsa, bu il Azərbaycan tarixinə kompleks islahatların aparılması ili kimi düşə bilər".
Vidadi ORDAHALLI
