Natiq Cəfərli: "Azərbaycan da bir neçə məhsul üzrə dünyada tanınmasına çalışmalıdır"
"Made in Azerbaijan" brendinin xarici bazarlarda təşviqinin icrasına başlanıb. Bunu "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunan konfrans zamanı çıxışında iqtisadiyyat naziri Şahin Mustafayev deyib:
"İxracın təşviqi üzrə qəbul etdiyiniz qərarlara uyğun olaraq, "Made in Azerbaijan" brendinin xarici bazarlarda təşviqinə, ixrac missiyalarının təşkilinə və digər tədbirlərin icrasına başlanıb. Keçirilmiş üç ixrac missiyası zamanı imzalanmış müqavilələrə əsasən, yeni bazarlar olan Çinə şərab, Birləşmiş Ərəb Əmirliklərinə ərzaq məhsullarının ixracına başlanıb. Ötən ilin noyabrından etibarən şərab, pambıq ipliyindən məmulatlar, konservlər, su və şirələr, fındıq və digər məhsulların Rusiya, ABŞ, Çin, Almaniya, Türkiyə, Belarus və sair ölkələrə ixracı ilə əlaqədar ixrac təşviqinin ödənilməsinə dair qərarlar qəbul edilib".
Gördündüyü kimi, "Made in Azerbaijan" brendi ilə dünyaya çıxan Azərbaycan məhsulları tədricən artmaqdadır. Bu da iqtisadi gəlirlə yanaşı, ölkənin tanınması baxımından vacib əhəmiyyət kəsb edir. Azərbaycanın dünya miqyasında daha çox tanınması turizm sektorunun inkişafı, dünyada Azərbaycan məhsullarına tələb yaranması və digər bu kimi parametrlər baxımından nə kimi perspektiv vəd edir?
Məsələyə münasibət bildirən iqtisadçı-ekspert Natiq Cəfərlinin fikrincə, hər bir ölkə haqqında təsəvvürlərin formalaşmasında həmin ölkədə istehsal edilmiş mal və məhsulların müəyyən rolu var: "Məsələn, Almaniya dedikdə ağla ilk növbədə avtomobillər, İtaliya dedikdə geyim və mebellər gəlir. Çünki o ölkələr həmin məhsullar üzrə yüksək kefiyyətlisini istehsal edə bilir. Ümumiyyətlə, hər bir ölkənin brendləşməsi mövcuddur. Yəni ölkələrin özünəməxsus istehsalı var. Həmin istehsalın çatdığı ən yaxşı pillə ölkənin tanıdılmasında mühüm rol oynayır. Azərbaycan da bir neçə məhsul üzrə dünyada tanınmasına çalışmalıdır. Bu istiqamətdə işlərə başlanıb, eyni zamanda irəliləmək lazımdır. Bu, ölkənin tanıdılması və gələn turistlərin sayına ciddi təsir göstərə bilər. Ancaq tək bu yolla turist cəlb etmək düzgün olmazdı. Davamlı turistlərin gəlişi üçün mütəmadi əlavə tədbirlərin həyata keçirilməsinə ehtiyac var. O zaman Azərbaycana gələn turist növbəti dəfə də bura gəlmək istəyəcək. Həmçinin öz ölkəsində Azərbaycan haqqında məlumatlar verəcək. Yəni həm ölkənin tanıdılması, həm də turizm xidmətlərinin keyfiyyətinin yaxşılaşdırılması paralel aparılmalıdır. Bütün bunlar isə sonda ölkəyə valyuta axınına gətirib çıxarır".
Vidadi ORDAHALLI
