"Əməkhaqqı və gəlir fərqini nəzərə alaraq, regionlar üçün kommunal xidmətlər üzrə daha aşağı tariflərin müəyyən olunması vacibdir"
"Kommunal xidmətlər üzrə tariflərin regional differensiasiyasının tətbiqi büdcə vəsaitlərinin səmərəli istifadəsinə səbəb olacaq". Bu barədə Azərbaycan Prezidenti İlham Əliyevin məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında fərmanı ilə əlaqədar sorğuya cavab olaraq Hesablama Palatasından bildiriblər.
Hesablama Palatası büdcə vəsaitlərinin ünvanlılığını artırmaq üçün Milli Məclisə təklif verib: "Kommunal xidmətlərin keyfiyyətinin yüksəldilməsi və respublika üzrə əhatə dairəsinin genişləndirilməsi fonunda məcburi köçkünlərin dislokasiyasının dəqiqləşdirilməsi, növbəti illərdə mövcud meyllərin təhlili nəticəsində kommunal xidmətlər üzrə norma və tariflərin regional differensiasiyasının tətbiqi büdcə vəsaitlərinin səmərəli istifadəsinə səbəb olacaq".
Kommunal xidmətlər üzrə tariflərin regionlar üzrə differensiallaşdırılması təklifi ekspertlər tərəfindən müsbət qarşılanır.
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, regionlar üzrə kommunal xidmət tarifləri differensiallaşdırılmalıdır: "Kommunal xidmət sahəsi müzakirə edilərkən və sosial differensiallaşdırma tətbiq olunan zaman təklif etmişdik ki, inkişaf etmiş ölkələrdə olduğu kimi, kommunal xidmət sahəsi vaxta və bölgələrə görə differensiallaşdırılsın. Bu xidmətlərin region və şəhər arasında differensiallaşdırılmasına ehtiyac var. Nəinki inkişaf etmiş ölkələrdə, hətta inkişaf etməkdə olan ölkələrdə tətbiq olunan təcrübədir. Rəsmi statistikaya nəzər salsaq, regionlardakı orta əməkhaqqı ilə şəhərdə yaşayan əhalinin maaşı arasında fərqin iki dəfə az olduğunu müşahidə etmək olar. Ancaq kommunal xidmətlərin tarifləri isə ərazidən asılı olaraq dəyişmir, eynidir. Bu məsələ rayonlarda yaşayanların sosial vəziyyətinə təsir edir. Əməkhaqqı və gəlir fərqini nəzərə alaraq, regionlar üçün kommunal xidmətlər üzrə daha aşağı tariflərin müəyyən olunması vacibdir".
Həmsöhbətimizin fikrincə, parlament regionlar üçün aşağı kommunal xidmətlərin müəyyənləşdirilməsinə qərar verəcək. Çünki regionlarda yaşayanların sosial müdafiəsi baxımından belə bir qərar verilməsi olduqca əhəmiyyətlidir.
Günel CƏLİLOVA
