Bahadur Bilalov: "Təhlükəsizlik təmin olunandan sonra tək yerli turistlər deyil, əcnəbilər də o bölgələrdə istirahət edə bilər"
Nahid Bağırov: "İşğaldan azad olunan ərazilər adətən turist üçün cəlbedici ərazi sayılır"
Azad olunmuş torpaqlarda sosial obyektlər, vətəndaşlar üçün infrastruktur tikilib qurulacaq. Cəbrayıl rayonunun Cocuq Mərcanlı kəndinin bərpa edilməsinə başlanması bunun bariz bir nümunəsidir.
Ekspertlərin fikrincə, işğaldan azad olunan və bərpa olunan ərazilər də Azərbaycanın turizm infrastruktur sərmayələri nəticəsində turistlər üçün ölkəmizin inkişaf edən turizm marşrutları siyahısında əsas istiqamətlərdən birinə çevrilə bilər. Xarici turistlərlə bərabər, bu marşrut ilk növbədə ölkədaxili turistlər üçün cəlbedici istiqamətdir.
Bu istiqamətdə nə kimi addımların atılması mümkündür? Məsələ ilə bağlı Azərbaycan Turizm Assosiasiyasının prezidenti Nahid Bağırova müraciət etdik. O, "Bakı-Xəbər"ə açıqlamasında qeyd etdi ki, işğaldan azad olunan ərazilər adətən turistlər üçün cəlbedici ərazi sayılır: "Turistin təhlükəsizliyi təmin olunarsa, niyə də həmin ərazilərə səfəri təşkil olunmasın? Turistin seçim etməsi üçün marşrut təyin olunur. Ekstremal turizm növü var. Bu turizm növü dünyada çox məşhurdur. Elə turistlər var ki, onlar adrenalin həvəskarıdır. Döyüş bölgələrinə səfər təşkil edən turizm şirkətləri var. Turistin təhlükəsizliyinə təminat verilərsə, biz işğaldan azad olunan ərazilərə turist səfərinin təşkil olunması ilə bağlı aidiyyəti qurumlara müraciət edə bilərik".
Turizm sahəsi üzrə ekspert Bahadur Bilalov bizimlə söhbətində qeyd etdi ki, işğaldan azad olunan ərazilər cəbhə bölgəsinə ən yaxın ərazilərdir. Təhlükəsizlik baxımından turistlərin düşmənlə üzbəüz bölgələrə göndərilməsi təhlükəlidir: "Xüsusilə xarici turistlərin Cocuq Mərcanlı kəndi və ya işğaldan azad olunan digər ərazilərə getmək istəyinin arxasında hansı məqsəd olduğu araşdırılmalıdır. Bəllidir ki, xarici turistlərin o tip ərazilərə səfəri öncədən açıqlanır. Bildirilir ki, hansısa ölkədən gələn turistlərin işğaldan azad olunmuş ərazilərə ekskursiyası və ya səfəri təşkil olunacaq. Öncədən elan olunan səfərlərdə turistlərin təhlükəsizliyi sual altına düşür. Düşmən işğaldan azad olunan kəndi bilərəkdən atəşə tuta bilər".
Həmsöhbətimiz hesab edir ki, işğaldan azad olunan, düşmənlə üzbəüz olan məkanlara turistlərin səfərinin təşkili təhlükəsizlik baxımından hələ tezdir.
"Təhlükəsizlik təmin olunandan sonra tək yerli turistlər deyil, əcnəbilərdə o bölgələrdə istirahət edə bilər. Həmçinin, işğaldan azad olunan ərazilərdə əhalinin rahat yaşayışı üçün infrastruktur yaradıldığının canlı şahidi olarlar.
Cocuq Mərcanlı kəndi ilə tək yerli əhali deyil, xarici vətəndaşlar da maraqlanır. O kəndin necə bir yer olması, orada yaşayan insanların necə yaşaması ilə maraqlananlar yetərincədir".
Günel CƏLİLOVA
