Vahid Məhərrəmov: "Qarabağ zonası əsasən heyvandarlıqla məşğul olan bölgə idi"
Ötən ilin aprel ayında Azərbaycan Ordusunun həyata keçirdiyi uğurlu əks-hücum hərbi əməliyyatı nəticəsində erməni işğalından azad edilən Cəbrayıl rayonunun Cocuq Mərcanlı kəndində insanların təhlükəsiz yaşaması mümkün olub. Bununla da tarixən burada yaşamış dinc əhalinin öz doğma yurdlarına qayıtması üçün Azərbaycan Silahlı Qüvvələrinin tam nəzarətinə keçən həmin ərazilərdə əsaslı yenidənqurma işlərinin başlanmasına şərait yaranıb.
Bəllidir ki, ölkə başçısı İlham Əliyev Cocuq Mərcanlı kəndinin yenidən qurulması ilə bağlı müvafiq sərəncam imzalayıb.
İlham Əliyev Heydər Əliyev Mərkəzində "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunan konfransda çıxışı zamanı deyib ki, bu layihənin icrası çox böyük rəmzi məna daşıyır və bu, tarixi hadisədir. Dövlət başçısı bildirib: "Biz kənd sakinlərini işğaldan azad edilmiş kəndə qaytarırıq. Mən çox şadam ki, Cocuq Mərcanlı kəndinin sakinləri buna çox böyük həvəslə, maraqla yanaşırlar. Əminəm ki, onlar indi səbrsizliklə o günü gözləyirlər. Əminəm ki, qısa müddət ərzində Cocuq Mərcanlı kəndini yenidən quracağıq".
Dövlət başçısı çıxışı zamanı Cocuq Mərcanlı kəndində yaşayacaq insanlar üçün iş yerləri açılması barədə də danışıb: "Əkin sahələri və digər iş yerlərinin təmin edilməsi üçün tədbirlər görüləcək və beləliklə, biz vətəndaşlarımızı uzun fasilədən sonra öz doğma ata-baba yurdlarına qaytaracağıq".
Aqrar sahə üzrə ekspert Vahid Məhərrəmov qəzetimizə açıqlamasında qeyd etdi ki, Qarabağ bölgəsində 188 min hektar əkin sahəsi var. Təxminən 1 milyon 300 min hektar örüş sahəsi qalıb.
V.Məhərrəmovun sözlərinə görə, Qarabağ zonası əsasən heyvandarlıqla məşğul olan bölgə idi: "Həmin zonada uzun müddət heyvandarlıqla məşğul olan kəndlilər olub. Həmçinin, Qarabağ əhli digər sahələrlə də məşğul olub".
Həmsöhbətimiz bildirdi ki, Azərbaycanın dənli bitkilərə ehtiyacı böyükdür: "Keçən il ölkəyə 1 milyon 600 ton buğda idxal olunub. Bunun bir hissəsini çalışıb daxildə istehsal etmək lazımdır. Ölkədə taxıla tələbat var. Tək taxıla deyil, ət məhsullarına, yumurta, süd, meyvə və tərəvəzə tələbat var. Cocuq Mərcanlı kəndində əkinçiliklə məşğul olmaq üçün imkan var".
Günel CƏLİLOVA
