Akif Nağı: "Ermənistan deyirdi o torpaqları yenidən alacağıq"...
Cəbrayıl rayonunun Cocuq Mərcanlı kəndinin bərpası ilə bağlı Azərbaycan Respublikası Prezidentinin sərəncamı xalqımız, həmçinin, beynəlxalq təşkilatlar tərəfindən yüksək qiymətləndirilib.
Demək olar ki, bu qərar bütün beynəlxalq aləmdə reaksiya doğurub, həm də yalnız dəstək reaksiyası. Azərbaycanda akkreditasiya olunan bəzi təşkilatların həmin kəndi görmək istəyini nəzərə alan rəsmi dairələr bildirib ki, ölkəmizdə fəaliyyət göstərən səfirlərin, beynəlxalq təşkilatların nümayəndələrinin Cocuq Mərcanlıya səfərləri təşkil olunacaq. Kəndə qayıdışla bağlı dünyanın tanınmış media resurslarında məqalələr yazılıb, bu hadisəyə böyük önəm verilib.
Beynəlxalq dairələrin Cocuq Mərcanlı məsələsinə bu dərəcədə önəm verməsinin səbəbi nə ola bilər?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, əslində, beynəlxalq təşkilatlar bu məsələdən ciddi narahatlıq keçirməyə başlayıb:
"Uzun illərdir Azərbaycanın haqlı tələbinə onlar tərəfdən ciddi reaksiya verilmir. Cocuq Mərcanlı ilə bağlı qəbul edilən qərarın bir neçə unikal tərəfi var. Birincisi, həmin kəndə qayıdış Azərbaycanın hərbi yolla irəliləməsindən sonra mümkün olub. Bununla Azərbaycan sübut etdi ki, torpaqları işğaldan azad etmək əzmində və gücündədir. İkincisi, Azərbaycan həm də sülhə meylli olduğunu ortaya qoydu. Düz təmas xəttində infrastrukturun bərpa olunması belə istəyin olmasından xəbər verir. Digər detal isə ölkənin gələcək niyyətilə bağlıdır. Ermənistan bəyan edirdi ki, işğaldan azad edilən torpaqlar yenidən geri qaytarılacaq. Rəsmi Bakı bu addımı ilə sübut edir ki, elə deyil, hədəf irəliyədir. Beynəlxalq qurumları bu ciddi narahat edir. Bu səbəbdən də mövzuya böyük diqqət ayırırlar. Yəni məsələyə sırf bir kəndin bərpası istiqamətində yanaşmaq lazım deyil. Bunun olduqca böyük simvolik əhəmiyyəti var. Bu da bəzi dairələri ciddi düşünməyə vadar edib. Çünki bəzi dairələrə sakitlik sərf edir. Onlar istəyir ki, prosesin uzadılması ilə qondarma qurumu beynəlxalq aləmə sırısınlar. Azərbaycanın bu gedişləri həmin planı da pozur".
Məhəmmədəli QƏRİBLİ
