Oqtay Haqverdiyev: "Bank sistemində problemlərin aradan qaldırılması üçün AYİB kömək edəcək"
Avropa Yenidənqurma və İnkişaf Bankının (AYİB) 2017-ci ildə Azərbaycanda əsas prioriteti birbaşa maliyyələşdirmə vasitəsilə yerli korporasiyalara dəstək vermək olacaq.
Bunu mətbuata açıqlamasında AYİB-in Bakı ofisinin rəhbəri İvana Duarte deyib. Onun sözlərinə görə, bank AYİB-in Azərbaycandakı tərəfdaş banklarına mikro, kiçik və orta müəssisələrin kreditləşdirilməsində və maliyyə vəsaitlərinə çıxışın yaxşılaşdırılması üçün yeni maliyyə alətlərinin hazırlanmasında dəstəyini davam etdirəcək. Məsələn, aqrar sənaye sektorundakı layihələr üçün: "Biz, həmçinin, enerji layihələrinə, xüsusilə də səmərəliliyin və enerji təhlükəsizliyinin daha da artırılması üçün əsası olan enerji layihələrinə investisiyaları davam etdirəcəyik. AYİB əvvəlki kimi yol infrastrukturuna sərmayə qoyacaq, həmçinin, təbii ehtiyatlar sahəsində işini davam etdirəcək".
O, qeyd edib ki, AYİB Azərbaycanın maliyyə sektorunda vəziyyətin yaxşılaşdırılması istiqamətində də fəaliyyət göstərəcək: "Əlavə səylər ölkənin maliyyə sektorunda vəziyyətin yaxşılaşdırılması, xüsusilə biznes mühitinin sabitləşdirilməsi məqsədilə kreditləşmə sahəsində etimadın artırılması üçün atılacaq. AYİB, həmçinin, biznes mühitinin yaxşılaşdırılmasına yönələn struktur islahatlarının həyata keçirilməsi sahəsində hökumətlə işləməyi davam etdirəcək".
Sözügedən bankın əsas prioritetinin birbaşa maliyyələşdirmə olacağının əhəmiyyətini ekspertlər necə dəyərləndirir? Bu, Azərbaycan iqtisadiyyatına nə verə bilər?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert Oqtay Haqverdiyevin sözlərinə görə, bunun bir sıra üstünlükləri var: "Bank sistemindəki problemlərin aradan qaldırılması üçün AYİB kömək edəcək. Sözügedən kömək həm tövsiyə formasında, həm də hansısa investisiya şəklində olacaq. Hansısa bir investisiya lazım olsa, yeni-yeni üsullarla əlaqəli hansısa texnologiyaları istifadə etmək üçün o istiqamətdə onlar Azərbaycana kömək etməyə hazırdır. Bunun Azərbaycana nə verəcəyinə gəldikdə isə, bank sistemi daha effektiv işləyəcək. Bütün bunlar, ümumiyyətlə, bank sisteminin özünün sağlamlaşdırılmasına yönəlmiş işlərdir. Ümid edirəm ki, sadalanan əsas prioritetlər uğurlu olacaq".
Vidadi ORDAHALLI
