Rəsul Cahangirli: "Təqdim olunan layihələr İİB üçün cəlbedici olarsa, o zaman bu layihələrin maliyyələşdirilməsində problem olmayacaq"
İslam İnkişaf Bankı (İİB) Azərbaycan hökumətini iqtisadiyyatın neftdən asılı olmayan modelinə keçiddə dəstəkləməyə hazırdır. Bunu mətbuata açıqlamasında İİB-in vitse-prezidenti Sayed Ağa deyib.
Vitse-prezidentin sözlərinə görə, Azərbaycan dünya iqtisadiyyatının bir hissəsidir: "Azərbaycan qlobal iqtisadi sistemin bir hissəsidir, amma hazırda təəssüf ki, yaxşı vəziyyətdə deyil. Bunun müxtəlif səbəbləri var: xammalın qiymətinin düşməsi, həm də siyasi və ticarət məsələləri. Belə vəziyyət, Azərbaycan da daxil olmaqla, İİB-ə daxil olan bütün ölkələrə təsir göstərib".
Sayed Ağa qeyd edib ki, bu gün Azərbaycan hökuməti neftdən asılı olmayacaq iqtisadiyyat modelinə keçid üçün addımlar atır: "Xüsusilə Bakıya səfər çərçivəsində biz iqtisadiyyat naziri ilə görüşlər keçirdik, burada bizi, əczaçılıq daxil olmaqla, müxtəlif sahələrdə istehsalın inkişafına dair planlar haqqında məlumatlandırdılar. Biz, həmçinin, Kənd Təsərrüfatı Nazirliyində aqrar sektorun inkişafına köməyi və kənd təsərrüfatı məhsullarının ixracını genişləndirməyi də müzakirə etdik".
Məlumat üçün qeyd edək ki, Azərbaycan İİB qrupuna 1992-ci ildə qoşulub. Əməkdaşlığın əvvəlindən bank ölkədəki layihələrə 1,3 milyard dollardan çox pul ayırıb. Hazırda Azərbaycanda təxminən 400 milyon dollar məbləğində layihələrin reallaşdırılması davam edir.
Azərbaycanda qeyri-neft sektorunun inkişaf etdirilməsinin vacib olduğu indiki dövrdə dünyanın tanınmış maliyyə qurumları ilə əməkdaşlıq vacib əhəmiyyət kəsb edir. Bu baxımdan İİB təmsilçisinin səsləndirdiyi fikirlərə ekspertlər necə yanaşır?
Məsələyə münasibət bildirən ekspert Rəsul Cahangirlinin sözlərinə görə, Azərbaycan 20 ildən çoxdur İİB ilə əməkdaşlıq edir: "Bu illər ərzində sözügedən bank Azərbaycanda bir sıra layihələri maliyyələşdirib. İİB-nin qeyri-neft sektorunun inkişafında iştirakı ilə bağlı yaxşı təcrübəsi olduğuna görə, hesab edirəm ki, biz bundan faydalanmalıyıq. Bununla bağlı Azərbaycan öz təkliflərini verməlidir. Qeyri-neft sektorunun hansı sahələrinin inkişaf etdirilməsinin lazım olduğu barədə layihələr təqdim etməlidir. Şübhəsiz ki, təqdim olunan layihələr İİB üçün cəlbedici olarsa, o zaman bu layihələrin maliyyələşdirilməsində problem olmayacaq. İndiki dövrdə maksimum çalışmaq lazımdır ki, daha çox beynəlxalq maliyyə qurumu Azərbaycanın qeyri-neft sektorunun inkişafına sərmayə qoysun". Vidadi ORDAHALLI
