“Bugünə qədər Azərbaycanın işğaldan azad edilmiş ərazilərində biznes qurmaqla bağlı İqtisadiyyat Nazirliyi yanında Kiçik və Orta Biznesin İnkişafı Agentliyinə (KOBİA) daxil olmuş 929 müraciətin 441-i investisiya layihələri, 488-i isə podrat əsaslı layihələrlə bağlı olub”. Bunu Agentliyin İdarə Heyətinin sədri Orxan Məmmədov Yeni Azərbaycan Partiyasının təşkilatçılığı ilə keçirilən "Qarabağ: Cənubi Qafqazdan dünyaya açılan yeni mənzərə" adlı elmi-praktik konfransda deyib.
Qeyd edilib ki, müraciətlərin 27%-i tikinti, yenə də 27%-i ticarət və xidmət, 20%-i sənaye, 18%-i kənd təsərrüfatı, 8%-i isə turizm, səhiyyə, təhsil, mədəniyyət, logistika sahələrini əhatə edib.
Məlumdur ki, Azərbaycanın işğaldan azad edilmiş əraziləri də sərmayə məkanı kimi çox cəlbedicidir.
Danılmaz faktdır ki, ölkədə qeyri-neft sektoru artıq bir neçə ildir prioritet sahə elan edilsə də, işğaldan azad edilmiş ərazilərdə kənd təsərrüfatı və sənayenin inkişafı ilə bağlı investisiya yatırmaq istəyənlərin sayı azdır.
Maraqlıdır, sahibkarlar kənd təsərrüfatı, istehsal sahələrinə niyə maraq göstərmir?
“İşğaldan azad edilmiş ərazilərdə sənaye və kənd təsərrüfatı üzrə təkliflərin sayı çoxalacaq və yaxın gələcəkdə sahibkarlar həmin sektorların regionda inkişafına maraq göstərəcək”
İqtisadçı-ekspert Pərviz Heydərov bildirdi ki, qeyri-neft sektorunun əsas qolu istehsal sahəsi, sənaye, kənd təsərrüfatı ilə bağlıdır: “Sırf işğal altında olan ərazilərin azad olunması və orada yaradılan yenidənqurma və bərpa işləri, infrastrukturla bağlı mövcud mənzərəni nəzərə alanda ilk olaraq qeyri-neft sektorunun məhz tikinti, xidmət sahələrinin daha çox inkişaf etməyə meylli olduğunu təbii qəbul etmək lazımdır. Xidmət sektorundan danışanda bir məsələni unutmaq olmaz ki, bu, həm də turizmin inkişafı deməkdir. Həmin ərazilərin turizm üçün gələcəkdə böyük potensialı mövcuddur. Qeyri-neft sektorunun bu bölgədə inkişafının əsas göstəricilərindən birini məhz turizm sektoru təşkil edəcək. Ona görə də hələlik həmin müraciətlərdə bilavasitə xidmət, tikinti və bu kimi sahələrlə bağlı təkliflərin üstünlük təşkil etməsi ilkin olaraq müsbət dəyərləndirilməlidir”.
Iqtisadçı hesab edir ki, işğaldan azad edilmiş ərazilərdə sənaye və kənd təsərrüfatı üzrə təkliflərin sayı çoxalacaq və yaxın gələcəkdə sahibkarlar həmin sektorların regionda inkişafına maraq göstərəcək: “Hələlik sahibkarların daha çox və tez gəlir gətirən sahələrə dair təkliflərlə çıxış etmələri, maraq göstərmələri təbii qarşılanmalıdır. Çünki istənilən sahibkar ilk növbədə qoyduğu vəsaitin daha tez bir şəkildə gəlir gətirməsinə çalışır. Bu da. kənd təsərrüfatı və sənayedən fərqli olaraq, tikinti və xidmət sektorudur. Onlar elə sahələrdir ki, onlara vəsait yatırdıqdan sonra qısa bir müddət ərzində gəlir götürə bilirsən. Ancaq sənaye və kənd təsərrüfatında investisiyaların nəticələrini əldə etmək üçün bir müddət gözləməyə məcbursan. Həm o ərazilərin yenidən işğaldan azad edilməsi, infrastrukturun yaradılmaqda olduğu, bərpa-yenidənqurma işləri getdiyindən, hələ elə bir məskunlaşmanın, məşğulluq probleminin kifayət qədər həllini tapmadığı bir şəraitdə ilk növbədə tikinti, xidmət, ticarət sektorunun inkişafı daha labüd xarakter daşıyır. Sənaye, kənd təsərrüfatının inkişafını bundan sonrakı mərhələdə gözləmək olar”.
Günel CƏLİLOVA
