İkinci Qarabağ müharibəsində şanlı qələbədən sonra yaranan reallıq göz önündədir. Qarşıya qoyulan bir nömrəli prioritet məsələ işğaldan azad olunmuş ərazilərdə bərpa və quruculuq işləri aparmaq, yeni infrastrukturların yaradılmasına, sərmayələrin cəlb edilməsinə nail olmaq, bir sözlə, Qarabağı yenidən cənnətməkana çevirməkdir.
Məlum olduğu kimi, 2021-ci ilin dövlət büdcəsindən bu məqsədlə 2,2 milyard manat vəsait ayrılıb. Hazırda işğaldan azad olunmuş ərazilərimizdə inşa olunan mühüm infrastrukturlara nəzər yetirsək görərik ki, bu gün Qarabağda Bərdə-Ağdam avtomobil yolu, Zəfər yolu, Füzuli-Şuşa magistral yolu, Horadiz-Ağbənd yolu, Zəngilan-Qubadlı-Laçın yolu, Füzuli-Hadrut, Füzuli-Cəbrayıl yolları, Kəlbəcərə rahat çatmaq üçün Göygöldən Ömər aşırımı üzrə yollar çəkilir. Həmçinin Kəlbəcər, Laçın rayonlarında hərbi əhəmiyyətli yollar çəkilir, üç aeroport tikilir.
Ancaq maraqlıdır ki, bu ilin birinci yarısında dövlət büdcəsində Qarabağın yenidən qurulması və bərpası üçün nəzərdə tutulmuş vəsaitin cəmi 16,9 faizi xərclənib. Maliyyə Nazirliyinin məlumatında deyilir ki, Azərbaycan bu il sözügedən məqsədlə 2,2 milyard manat xərcləməyi planlaşdırsa da, yanvar-iyun aylarında 372,1 milyon manat sərf olunub. Lakin niyə yarımildə nəzərdə tutulan vəsaitin yalnız 16,9 faizinin xərclənməsi barədə heç nə deyilmir? Bəs ekspertlər bunun səbəbini nə ilə əlaqələndirir? Qarabağın yenidən qurulmasına və bərpasına vəsait niyə bu qədər az xərclənib?
“Bütün bunlar layihələrin həyata keçirilmə sürətinə birbaşa təsir göstərir”
Sözügedən məsələyə aydınlıq gətirən millət vəkili Vüqar Bayramov bunun səbəbini minalı ərazilərin təmizlənməsinin vaxt aparması ilə əlaqələndirdi: “Əvvəla, vəsait təsdiq olunmuş proqrama əsasən xərclənir. Nəzərə almaq lazımdır ki, həmin vəsait bərpa və yenidənqurma işləri üçün nəzərdə tutulub. Vəsaitlərin xərclənməsi işlərin intensivliyindən asılıdır. İşlərin intensivliyinin sürətlə aparılmasına minalanmış ərazilər mane olur. Məlum olduğu kimi, minalanmış ərazilərin təmizlənməsi vaxt aparır. Minalanmış ərazilər təmizləndikdən sonra bərpa və yenidənqurma işləri daha intensiv sürətlə aparılacaq. O üzdən, ayrılan vəsait minadan təmizləmə prosesinə uyğun olaraq xərclənəcək. Çünki nəzərə almaq lazımdır ki, infrastruktur layihələri, infrastrukturun genişləndirilməsi həmin ərazilərin hansı formada minalardan təmizlənilməsindən asılıdır. Bütün bunlar layihələrin həyata keçirilmə sürətinə birbaşa təsir göstərir. O baxımdan növbəti dövrlərdə bu istiqamətdə daha çox vəsaitin xərclənməsi gözlənilir. Çünki ərazilər minalardan təmizlənəndən sonra işlər daha da sürətlənəcək. Bu zaman daha çox vəsaitə ehtiyac yaranacaq. O üzdən hesab edirəm ki, bu ilin 6 ayında ayrılan vəsaitin vur-tut 16,9 faiz xərclənməsinin səbəbi məhz minalanmış ərazilərlə bağlıdır”.
Millət vəkili onu da qeyd etdi ki, gələn il bərpa və yenidənqurmanın daha sürətlə gedəcəyi proqnozlaşdırılır.
Vidadi ORDAHALLI
