Turizm və xidmət sferası investisiya baxımından çox cəlbedicidir. Bu sahə ölkənin infrastrukturunun inkişaf etdirilməsi və valyuta vəsaitlərinin axını baxımından əhəmiyyətlidir. Digər tərəfdən, turizmin inkişafının iqtisadi imkanları təşkilati-iqtisadi proseslərin inkişafı üçün münbit şəraitin yaradılması deməkdir. Belə bir şərait isə, öz növbəsində, bu gəlirli sahənin infrastrukturunun genişləndirilməsi, xarici turistlərin republikamıza səfərlərinin artım tempinə də gətirib çıxarar.
Xarici turistlər bu gün ölkəmizə səfərə maraq göstərir. Xüsusən də, işğaldan azad olunmuş torpaqları görmək istəyirlər. Bunun üçün Şuşada və Daşaltı kəndində turizm sahəsində görüləcək işlərə dair konsepsiya hazırlanır. Bu barədə Dövlət Turizm Agentliyinin sədri Fuad Nağıyev media nümayəndələrinə açıqlamasında məlumat verib. O bildirib ki, yaxın müddətdə bu barədə ictimaiyyətə geniş məlumat veriləcək: “Həmçinin Suqovuşanda da işlər başlayacaq. Lakin hər şeydən öncə təhlükəsizliyin təmin olunması vacibdir. Qarabağda eyni zamanda "dark turizm" də olacaq. Bildiyiniz kimi, dünyanın bir çox ölkəsində bu təcrübə var. Şəhərin bəzi hissələrində dağıntıların bir qismi saxlanılır və gələn turistlərə bunun tarixi barədə məlumat verilir. Biz də Ağdamda bunu etmək fikrindəyik. Şəhərin müəyyən hissəsində dağıdılmış binalardan bir kvartal saxlayacağıq. Bu, həm xarici turistlərin marağını cəlb edər, həm də gələcək nəsillər üçün bir xatırlatma olar. Tariximizi unutmamalı, keçmişimizdən dərs çıxarmalıyıq”.
“Turizmin bu növü ilə dünya ictimaiyyətinə ermənilərin tarixi, dini abidələri, yaşayış evlərini necə dağıtdığını açıq şəkildə göstərmək olur”
Qarabağda yaradılacaq “dark turizm”in əhəmiyyəti haqqında danışan iqtisadçı ekspert Pərviz Heydərov “Bakı-Xəbər”ə açıqlamasında bunları bildirdi: “İşğaldan azad edilmiş ərazilərdə “qara turizm”in olması olduqca vacibdir. Adətən dünya ictimaiyyətinə ölkənin zənginliyi, təbiətin rəngarəngliyi göstərilir. Ancaq dünyaya ölkənin real tarixini, ermənilərin torpaqlarımıza necə zərər yetirdiyini faktlarla göstərmək həm turizm, həm də siyasi baxımdan əhəmiyyətlidir. “Dark turizm” turizmin ən mühum qollarından birini təşkil edir. Turizmin bu növü ilə dünya ictimaiyyətinə ermənilərin tarixi, dini abidələri, yaşayış evlərini necə dağıtdığını açıq şəkildə göstərmək olar. Beləliklə, dünya ictimaiyyəti ermənilərin necə bir millət olduğunu öz gözləri ilə görəcək.
Ola bilsin ki, turizmin bu sahəsindən büdcəyə daxil olacaq vəsait az olsun. Turizmin bu növünün siyasi, ictimai əhəmiyyəti nəzərə alınaraq gəlir gözləmək düzgün deyil”.
Həmsöhbətimiz onu da əlavə etdi ki, işğaldan azad olunan ərazilərin turizm potensialı olduqca yüksəkdir. O bölgələrin təbiəti turizmin inkişafına şərait yaradacaq.
Günel CƏLİLOVA
