Son zamanlar banklarda qəribə tendensiya müşahidə olunur. Vətəndaşların bir qismi sorğu-suala tutulur. Banklar dollar alışını və ya satışını həyata keçirən müştərilərdən müəyyən informasiya əldə etməyə çalışırlar.
Dollar almaq istəyənlərə gəlir mənbəyinə dair bəzi suallar ünvanlanır. Eyni zamanda, vətəndaşların iş yerləri, aylıq gəlirləri, aldıqları dolların təyinatı barədə anket doldurulur. Bundan başqa, şəxsiyyət vəsiqəsi və mobil nömrə də tələb olunur. Bankların müştəriləri sorğu-suala tutması onların narazılığına səbəb olur.
“Müştərilərdən bu qədər çox məlumat tələb edilməsi çirkli pulların “yuyulması” və başqa qanunsuz hərəkətlərin qarşısını almaqdırsa, o zaman…”
Vəziyyəti dəyərləndirən bank sahəsi üzrə ekspert, iqtisadçı Əkrəm Həsənov bildirdi ki, qanunvericiliyə əsasən, bank müştərinin təqdim etdiyi pul vəsaitinin mənbəyi ilə maraqlana bilər. Bu da “çirkli” pulların “yuyulması” çərçivəsində atılan addımdır: “Qanunvericiliyin prinsiplərindən biri odur ki, bank müştərisini tanımalıdır və müştərinin gəlir mənbəyi barədə informasiyaya malik olmalıdır. Bu sorğu-sual bütün dünya banklarında var. Təbii ki, xırda “exchange”lərdə pulun mənbəyi soruşula bilməz. Daha doğrusu, “exchange”lər bunu soruşmur. Çünki müştərini qaçırmaq istəməzlər. Amma son dönəmlərdə “exchange”lər vətəndaşların pulu haradan və necə əldə etdiklərini soruşur. Bu zaman hər kəsdə fikir yaranır ki, kimsə banka qeyri-rəsmi göstəriş verib. Bəli, “exchange”lərin pulun mənbəyini soruşmaq ixtiyarları var. Amma niyə indi soruşurlar?.
Müştərilərdən bu qədər çox məlumat tələb edilməsi çirkli pulların “yuyulması” və başqa qanunsuz hərəkətlərin qarşısını almaqdırsa, o zaman vətəndaş banklara əlli min, yüz min məbləğində əmanət qoyanda onlardan həmin pulun mənbəyini niyə soruşmurlar?
Bu hal onu deməyə əsas verir ki, müştərilərdən daha çox məlumatın tələb edilməsi bankların öz seçimi deyil. Aydın məsələdir ki, banklar əhalidən əmanət qəbul etməklə yanaşı, həm də valyuta satışında maraqlıdır. Çünki banklar bu əməliyyatlardan qazanırlar.
Digər tərəfdən, bu amil mütləq nəzərə alınmalıdır ki, mövcud makroiqtisadi vəziyyətdə, neftin bahalaşdığı şəraitdə manat özünü kifayət qədər rahat hiss edir. Ona görə də bu kimi məqamlar nəzərə alınmalıdır”.
Günel CƏLİLOVA
