Hazırda əkin işlərinin qızğın vaxtıdır. Əkinçi becərmə, suvarma, digər aqrotexniki tədbirləri həyata keçirir, bol məhsul əldə etmək üçün səylərini əsirgəmir. Respublikamızın bütün ərazilərində əkin, becərmə işləri uğurla davam etdirilir. Ancaq bəzi ərazilərdə suvarma suyuna tələbat lazımi səviyyədə ödənilmir. Bu da məhsuldarlığa təsir edir.
Tovuz rayonunda kartof əkini ilə məşğul olan fermerlər məhsulun suvarılmasında problem yaşadıqlarını bildirirlər. Fermerlər söyləyirlər ki, suvarmada su qıtlığı yaşanır: “Kartof elədir ki, gərək həftədə bir dəfə suvarıla. Belə olduqda həm məhsuldarlıq yüksək olur, həm də məhsul keyfiyyətli. Gecikdirildikdə isə ikinci böyümə əmələ gəlir və kartof formasını itirir. Nəticədə satışa ziyan verir, alıcılar yöndəmsiz məhsulu almaq istəmirlər. Bu səbəbdən kartof sahələri çox olduğundan, suya da böyük tələbat yaranır. Bir hektarı suvarmaq üçün fermer 40 manatından keçməli olur. Bir çox təsərrüfatçı isə əlavə xərcdən qaçmaq üçün öz sahələrini özü suvarır. Bir hektarı suvarmaq suçuya 40 manat ödəniş etmək fermerlər üçün artıq xərcdir.
“Hər hektara görə əlavə ödəniş tələb edilməsi fermerlərin büdcəsinə mənfi təsir edir”
İqtisadçı-ekspert Kamran Məmmədli bildirdi ki, suvarılmada problemin yaranması fermerlərə və məhsuldarlığa mənfi təsir göstərir: “Hər hektara görə əlavə ödəniş tələb edilməsi fermerlərin büdcəsinə mənfi təsir edir. Çarəsiz qalan fermerlərin bir qismi özü əkini suvarmaq istəyir. Ancaq fermer özü edəndə istənilən effekt vermir. Onu da nəzərə almaq lazımdır ki, isti hava şəraiti suvarma suyuna tələbatı artırıb”.
Həmsöhbətimiz onu da əlavə etdi ki, hazırda kartof əkini ilə məşğul olan fermerlər adıçəkilən məhsulu satmaqda da çətinlik çəkirlər: “Kartof istidə çox qalmadığından, yığımdan öncə alıcı gəlib məhsulun behini verir, hazır məhsulu götürməyə boyun olur. Bu il kartofun çıxarılmasına sayılı günlər qalıb, amma hələ heç bir alıcı gəlib kartofla maraqlanmayıb".
Günel CƏLİLOVA
