“Ümid edirik ki, Ermənistandakı seçkilərdən sonra yeni rəhbərlik əvvəlki səhvlərindən nəticə çıxararaq bölgədəki sülh və sabitliyə yeganə yolunun qonşularla yaxşı münasibətdən, qonşuların torpaqlarına göz dikməkdənsə, onlarla yaxşı təmas qurmaqdan keçdiyini anlayacaq. Çünki Azərbaycan işğal altındakı torpaqlarını azad etdikdən sonra həm Türkiyə, həm də Azərbaycan bölgədə sülhə və sabitliyə nail olmaq üçün iradə nümayiş etdirir. Həm Türkiyə prezidenti Rəcəb Tayyib Ərdoğan, həm də Azərbaycan prezidenti İlham Əliyev açıqlamalarında bu barədə bildirib”. Belə bir açıqlama ilə Türkiyə xarici işlər naziri Mövlud Çavuşoğlu çıxış edib.
Regiondakı yeni münasibətlərin daha çox Ermənistan üçün faydalı olduğunu diqqətə çatdıran M.Çavuşoğlu bildirib ki, bu ölkə yanlış siyasət nəticəsində bölgədəki beynəlxalq layihələrdə iştirakdan məhrum olub: “Ermənistan sülh və sabitliyin yaranması istiqamətində səy göstərsə, onunla münasibətlərin qurulması üçün addımlar atıla bilər”. Şuşa Bəyannaməsindən danışan nazir diqqətə çatdırıb ki, bu sənəd iki qardaş ölkə arasında münasibətlərin müttəfiqlik səviyyəsinə yüksəldiyini göstərir. “Sənədin Şuşada imzalanması xüsusi məna daşıyır. Türkiyənin Şuşada Baş konsulluğunun açılması ilə Azərbaycan və Türkiyə bayraqları bu qədim şəhərdə yanaşı dalğalanacaq”. Bu açıqlamadan bir daha görünür ki, Türkiyə Ermənistanla normal münasibətlərin qurulmasında maraqlıdır. Eləcə də eyni mövqeyi Azərbaycan ifadə edib. İndi hesab edilir ki, Ermənistanda parlament seçkilərindən sonra yenidən hakimiyyətdə qalmağı bacaran Nikol Paşinyan bu istiqamətdə müvafiq addımlar ata bilər. Çünki bu, artıq erməni cəmiyyətinin istəyidir. Nəticələrdən bəlli oldu ki, erməni əhalisi də regionda sülh istəyir. Zəngəzurun ermənilər yaşayan hissəsində səsvermənin nəticələri bu baxımdan mühüm göstəricidir. Zəngəzur əhalisi Paşinyana səs verməklə Robert Köçəryan və Serj Sarkisyan kimi revanşistləri rədd etdiyini göstərdi. Ermənilər sərhəd məsələlərində Azərbaycanla yeni problemin yaranmasında maraqlı deyil və seçkilərin nəticələri də bunu sübut etdi. Məsələnin bu tərəfinə nəzər salan siyasi şərhçi Qulu Məhərrəmli bildirir: “Parlament seçkisində güclü əzm və iradə göstərən N.Paşinyanın qalib gəlməsi və R.Köçəryan kimi bir caninin hakimiyyətə yolunun bağlanması müsbət hadisədir. Xalqın əksəriyyəti Rusiyanın qəzəbindın qorxmadı, Putin mifini yerə vurdu, müharibəyə və dolayısı ilə Qarabağ avantürasına “yox” dedi. Regionda yeni müharibə ehtimalı sıfıra düşdü, revanşizm aktuallığını itirdi. “Qarabağ klanı” biabırcasına məğlub oldu. Məlum oldu ki, Paşinyan düşünüldüyü qədər də sadə fiqur deyil. O, Rusiyadan qaynaqlanan müharibənin acı nəticələrini, ölkəyə və xalqa hansı zərbələr vurulduğunu görüb-yaşadığından, Qərbyönümlü siyasətini davam etdirəcək, bu kontekstdə Türkiyə və Azərbaycanla münasibətlər yaxşılaşacaq. Bakı ilə sərhəd məsələləri və Zəngəzur dəhlizi problemi tezliklə həll olunacaq, nəqliyyat xətləri işləyəcək. Bunlarla yanaşı, İrəvan-Moskva münasibətlərində gərginlik artacaq, Rusiya Qarabağ kartını fəallaşdıracaq. Qərbin iştirakilə birbaşa Azərbaycan-Ermənistan dialoqu başlasa, hər iki ölkə Rusiya təhlükəsini minimuma endirə biləcək”.
İndi Ermənistanda da belə bir fikir hakimdir ki, Paşinyan Azərbaycan və Türkiyə ilə daha rahat şəkildə işbirliyi quracaq. Erməni politoloq Aşot Safaryan bu xüsusda bildirir: “Əsrlərdir rus dili hökm sürürdü, indi türk dili olacaq. Sup və borş yeməyə öyrəşmişdiniz, indi isə simit və balıq-əkmək yeyəcəksiniz. Bilirsiz, mənim indi nədənsə əsrlər boyu müdrik və qanlı təcrübəyə malik olan xalqıma yazığım gəlmir. Qoy belə kor və dəli qeyrəti ilə barışsın və nəhayət öz əkdiyini biçməyə hazırlaşsın”. Rusiyalı tarixçi, politoloq Oleq Kuznetsov da qeyd edir ki, Ermənistan Kremlin hegemoniyasından daha bir addım uzaqlaşdı və bu ona özünəməxsus inkişaf perspektivi vəd edir. O bildirib ki, bu inkişaf perspektivi yalnız Azərbaycanın Qarabağ və sərhədlə bağlı qanuni tələblərinə qarşılıq verəndən sonra mümkündür: “Rus təbliğatı isə növbəti dəfə öz vecsizliyini, mənasızlığını və satqınlığını bir daha göstərdi”. Rusiyalı politoloq, millətlərarası münaqişələr üzrə mütəxəssis Yevgeni Mixaylov isə qeyd edir ki, Ermənistanda sağlam düşüncə qalib gəldi: “Çünki Nikol Paşinyanın partiyasına səs verən erməni xalqı öz ölkəsini bu keçid dövründə sülh və sabitliyə aparmaq istəyir”. Onun sözlərinə görə, erməni xalqı başa düşür ki, onların ölkəsi “revanşizm” ideyasını və millətçilik cəhdlərini unutmalıdır: "Paşinyana etimad krediti verildi. İndi o, dinc və firavan ölkə yaratmalıdır. Demək ki, erməni milləti Azərbaycan və Türkiyə ilə sülh şəraitində olacaq bir ölkədə yaşamaq istəyir. Bütün sərhədlərin açılmasına nail olacaq bir ölkədə. Bütün dünyada normal hesab ediləcək bir ölkədə. Dünən (iyunun 20-də- red.) Ermənistanda keçirilən seçki bütün regiona və Ermənistanın özünə sabahkı gün üçün şans verdi. Bu seçkilərin nəticələri Ermənistanı dövlət kimi qoruyub saxlaya bilər. Bundan başqa, bu, Ermənistanı iqtisadi cəhətdən inkişaf etdirməyə imkan verəcək".
Samirə SƏFƏROVA
