Azərbaycan Nazirlər Kabineti “Ərzaqlıq buğdanın idxal qiymətinin artmasının ölkə daxilində satılan un və un məmulatlarının qiymətinə mənfi təsirlərinin azaldılması ilə bağlı əlavə tədbirlər barədə" qərar verib. Qərarı Baş nazir Əli Əsədov imzalayıb.
Qərara əsasən, un istehsalı ilə məşğul olan şəxslərə satılan unun hər tonuna görə 2021-ci il fevralın 1-dən mayın 1-dək olan dövrdə 35 (otuz beş) manat məbləğində subsidiya veriləcək. İqtisadiyyat Nazirliyi Maliyyə Nazirliyi ilə razılaşdırmaqla subsidiyanın verilməsi qaydasını təsdiq edəcək. Eyni zamanda, İqtisadiyyat Nazirliyi un istehsalçılarına verilən subsidiyanın bu qaydaya uyğun ödənilməsini təmin etməli və un istehsalçılarına ödənilmiş subsidiya barədə icmal hesabatı 2021-ci il 1 iyun tarixinədək Nazirlər Kabinetinə təqdim etməlidir.
Bu məqsədlə Azərbaycan Respublikasının 2021-ci il dövlət büdcəsinin Ehtiyat Fondundan müvafiq məbləğdə vəsait ayrılacaq. İqtisadiyyat Nazirliyi Maliyyə Nazirliyi, Kənd Təsərrüfatı Nazirliyi, Fövqəladə Hallar Nazirliyi, Qida Təhlükəsizliyi Agentliyi və “Azərbaycan Dəmir Yolları” Qapalı Səhmdar Cəmiyyəti ilə birlikdə ərzaqlıq buğda ehtiyatının yaradılması və dünya birjalarında buğda qiymətlərinin ölkədaxili buğda qiymətlərinə təsirinin azaldılması üçün müvafiq tənzimləmə və nəzarət üzrə dayanıqlı mexanizmin formalaşdırılmasına dair təkliflərini 2 ay müddətində Nazirlər Kabinetinə təqdim etməlidir.
Qeyd edək ki, son günlər ölkədə unun bahalaşması müşahidə olunurdu, çörək istehsalçıları isə, qiymətləri artırmasalar da, çəkini azaltmaqla öz qiymətlərini qoruyub saxlamağa çalışırdılar. Hökumətin bu qabaqlayıcı tədbirləri çörəyin qiymətinin sabiq qalmasına kömək edə biləcəkmi?
İqtisadçı-ekspert Asif İbrahimov “Bakı-Xəbər”ə açıqlamasında bildirdi ki, bu proqnozu ilk olaraq onlar verib: “Bildiyiniz kimi, ötən ay Azərbaycanda benzinin və kənd təsərrüfatında daha çox istifadə olunan dizel yanacağının qiyməti qalxdı. Əkin sahələri bu yanacaqla işləyən texnikalar vasitəsilə şumlanır. Eləcə də, məhsulların daşınması bu tip yanacaqla işləyən texnikalar vasitəsilə həyata keçirilir. Bu vəziyyətin çörəyin qiymətinə təsir edəcəyi şübhəsiz idi. Preventiv tədbirlər nəticəsində bu artım bir ay ərzində müşahidə olunmadı. Fevral ayından başlayaraq isə Rusiya Federasiyası ixrac edilən buğdanın hər tonuna 25 avro ixrac rüsumunu artırdı. Azərbaycan Rusiyadan buğda idxal edən ölkələrin ilk beşliyində yer alır. Belə olan təqdirdə unun qiyməti baha başa gələcək. Azərbaycan hökumətinin gördüyü qabaqlayıcı tədbirlər bir müddət qiyməti stabil saxlamağa kömək edəcək. Lakin biz bununla kifayətlənməməliyik. İşğaldan azad edilən kifayət qədər əkin sahələrimiz var. Fermerlərə subsidiyaların miqdarını artırmalıyıq ki, onların fəaliyyəti stimullaşsın və ölkədə daha çox taxıl əkilsin”.
Ekspertin sözlərinə görə, eyni zamanda, ölkənin daxili təlabatını tam ödəmək üçün un və un məhsullarının ölkədən çıxarılmasına qadağa qoyulmalıdır.
Məhəmmədəli QƏRİBLİ
