Azad Rəhimov: “Azərbaycan IV İslam Həmrəyliyi Oyunlarına da yüksək səviyyədə ev sahibliyi edəcək” 49 ölkə Bakıda IV İslam Həmrəyliyi Oyunlarında iştirakını təsdiq edib
Bu gün Bakıda IV İslam Həmrəyliyi Oyunlarına hazırlıq məqsədilə Koordinasiya Komissiyasının 4-cü iclası öz işinə başlayıb. Trend-in məlumatına görə, iclasda IV İslam Həmrəyliyi Oyunlarının icraçı direktoru, gənclər və idman naziri Azad Rəhimov, İslam Həmrəyliyi İdman Federasiyasının 2-ci vitse-prezidenti Çingiz Hüseynzadə, İslam Həmrəyliyi İdman Federasiyasının baş katibi Faisal Abdulaziz Al-Nassar, İslam Həmrəyliyi İdman Federasiyasının 1-ci vitse-prezidenti, Əlaqələndirmə Komissiyasının sədri, polkovnik Hamad Kalkaba Malboum və digər rəsmilər iştirak edirlər.
İki gün davam edəcək iclasın ilk günü yarışda iştirak edəcək idmançıların sayı, idman növləri, nəqliyyat, infrastruktur, könüllülərlə işin qurulması və digər mövzular müzakirə ediləcək. Koordinasiya Komissiyasının iclasının 2-ci günü idmançıların iştirakı, idman yarışları, marketinq, yayım, kommersiya məsələləri, açılış və bağlanış mərasimləri ilə bağlı müzakirələr aparılacaq.
Azad Rəhimov deyib ki, Azərbaycan IV İslam Həmrəyliyi Oyunlarına da yüksək səviyyədə ev sahibliyi edəcək. A.Rəhimov Bakıda IV İslam Həmrəyliyi Oyunlarının keçirilməsinə təqribən 6 ay qaldığını xatırladıb.
Nazir qeyd edib ki, Azərbaycan IV İslam Həmrəyliyi Oyunlarının keçirilməsinə hazırdır: “Ümumi hazırlıqlar barədə deyə bilərəm ki, 16-ya qədər idman arenası yarışların keçirilməsinə artıq hazırdır. Dünya standartlarına cavab verən Atletlər Kəndi bütün iştirakçı ölkələrdən idmançıları qəbul etməyə və onların Oyunlar zamanı rahat şəraitdə qalmasına hazırdır”.
A.Rəhimov bildirib ki, IV İslam Həmrəyliyi Oyunlarına hazırlıq işləri nəzərdə tutulan qrafik üzrə gedir: “İnanıram ki, Bakıda möhtəşəm bir idman yarışının şahidi olacağıq. Birinci Avropa Oyunları və Formula-1 kimi beynəlxalq idman yarışlarına yüksək səviyyədə ev sahibliyi etmiş bir ölkə kimi Azərbaycan IV İslam Həmrəyliyi Oyunları zamanı da yüksək peşəkarlıq nümayiş etdirəcək”.
Nazir IV İslam Həmrəyliyi Oyunlarına hazırlıq məqsədilə Koordinasiya Komissiyasının 4-cü iclasından sonra keçirilən mətbuat konfransında deyib ki, 49 ölkə Azərbaycanda keçiriləcək IV İslam Həmrəyliyi Oyunlarında öz iştirakını təsdiq edib. A.Rəhimov bildirib ki, bu, yüksək bir rəqəmdir: “Sevindirici haldır ki, Azərbaycanda keçirilən Oyunlar belə maraq doğurur. Bu, hələ son rəqəm deyil. İnanırıq ki, digər ölkələr də Oyunlarda iştirakını təsdiqləyəcək”.
Nazir deyib ki, Oyunlarla bağlı çoxlu vacib məsələlər həll olunub: “Təşkilat komitəsi və işçiləri tam gücü ilə çalışır və bütün işlər öz qaydasında gedir. Oyunlarla bağlı bir çox məsələlər öz həllini tapır”.
A.Rəhimov deyib ki, Azərbaycanda keçiriləcək IV İslam Həmrəyliyi Oyunlarının açılış və bağlanış mərasimləri Birinci Avropa Oyunlarından və digər layihələrdən zəif olmayacaq. A.Rəhimov bildirib ki, IV İslam Həmrəyliyi Oyunlarının açılış və bağlanış mərasimləri rəngarəng olacaq: “Açılış və bağlanış mərasimləri Milli Olimpiya Stadionunda baş tutacaq. İndi açılış və bağlanış mərasimlərinin tam ssenarisini açıqlamaq istəmirik. Ancaq onu deyə bilərəm ki, İslam dünyasının, şərqin tarixi mövzularından bəhs olunacaq. Zəmanət verirəm ki, çox maraqlı olacaq”.
IV İslam Həmrəyliyi Oyunlarına bilet satışının vaxtı açıqlandı
A.Rəhimov deyib ki, IV İslam Həmrəyliyi Oyunları üçün biletlər mart-aprel aylarında satışa çıxarılacaq. Nazir bildirib ki, biletlərin satışı birinci Avropa Oyunlarında olduğu qaydada həyata keçiriləcək: “Bakıda bir neçə yerdə, o cümlədən tərəfdaş olan ticarət mərkəzlərində satış mərkəzləri olacaq, həmçinin internet vasitəsilə biletlərin satışı həyata keçiriləcək”.
Biletlərin qiymətlərinə gəlincə, nazir qeyd edib ki, qiymətlər Avropa Oyunlarında olan biletlərin qiymətindən artıq olmayacaq.
İdmançılarımızın Birinci Avropa Oyunlarında göstərdikləri nəticələrin Azərbaycanda keçiriləcək IV İslam Həmrəyliyi Oyunlarında da təkrarlanmasını çox istərdik. Bunu da A.Rəhimov deyib.
Nazir bildirib ki, bütün idman növləri üzrə hazırlıqlar lazımi qaydada gedir: “Ancaq proqnoz vermək düzgün olmazdı. Biz Avropa Oyunlarında da gözləmirdik ki, idmançılarımız medal saylarına görə ikinci yerə çıxacaq, amma buna nail olduq. Ən azı istəyərdik ki, bu qələbə İslam Həmrəyliyi Oyunlarında da təkrarlansın”.
İslam Həmrəyliyi İdman Federasiyasının 1-ci vitse-prezidenti, Əlaqələndirmə Komissiyasının sədri, polkovnik Hamad Kalkaba Malboum isə deyib ki, Azərbaycan hökuməti IV İslam Həmrəyliyi Oyunlarının hazırlıq prosesinə ciddi yanaşır və bu istiqamətdə işləri yüksək səviyyədə aparır.
H.K.Malboum bildirib ki, 2017-ci ildə bütün İslam dünyasını özünə cəlb edəcək IV İslam Həmrəyliyi Oyunlarına hazırlıq prosesi yüksək templə gedir: “Əminəm ki, Azərbaycan IV İslam Həmrəyliyi Oyunları Əməliyyat Komitəsi ilə əməkdaşlığı daha da sıx şəkildə davam etdirəcək”.
Qeyd edək ki, IV İslam Həmrəyliyi Oyunları 12-22 may 2017-ci il tarixində Bakıda keçiriləcək.
