Şəmsəddin Əliyev: "Belə zəif insanlar ələ alınır və Azərbaycana qarşı casusluq fəaliyyətində istifadə olunur"
Dövlət Təhlükəsizliyi Xidməti (DTX) tərəfindən həyata keçirilmiş əks-kəşfiyyat tədbirləri nəticəsində xarici xüsusi xidmət orqanlarının tapşırığı üzrə Azərbaycan ərazisində casusluq yolu ilə toplanmış məlumatları kiçik ölçülü elektron informasiya daşıyıcılarında Azərbaycandan çıxarmağa çalışan Muxtar Yağubov ölkəni tərk etməyə cəhd edərkən saxlanıb. Bu barədə Dövlət Təhlükəsizliyi Xidmətinin İctimai əlaqələr şöbəsindən bildirilib.
Verilən məlumata görə, casus şəbəkəsinin Bakı şəhəri və ölkənin digər ərazilərində fəaliyyət göstərən üzvləri - Azərbaycan Respublikasının vətəndaşları Yağubov Muxtar Camal oğlu, Əhmədov Şakir Xanlar oğlu, Zeynallı Zəka Abış oğlu, Abbaszadə Səbuhi Oktay oğlu, Nuriyev Xudaşükür Məcid oğlu və Hüseynov Kəmaləddin İsaxan oğlu ifşa edilərək cinayət məsuliyyətinə cəlb edilib, barələrində müvafiq məhkəmə qərarları ilə həbs-qətimkan tədbiri seçilib.
İstintaq-əməliyyat tədbirləri nəticəsində xarici xüsusi xidmət orqanları ilə qarşılıqlı yazışmalar və ötürülməsi nəzərdə tutulan müxtəlif xarakterli məlumatlar aşkarlanaraq ələ keçirilib, casus şəbəkəsinin xarici xüsusi xidmət orqanlarının tapşırığı üzrə dövlət məmurları, ictimai xadimlər və digər dairələrə nüfuz etmək, Azərbaycan Respublikasının təhlükəsizlik orqanları, Silahlı Qüvvələri, ölkədə aparılan təhlükəsizlik tədbirləri barədə məxfi məlumatları toplamaq istiqamətində fəaliyyət göstərdiyi müəyyən edilib. Hazırda istintaq-əməliyyat tədbirləri davam edir.
Maraqlıdır, sözügedən casus şəbəkəsinin fəaliyyətində hansı dövlətlər maraqlı ola bilər? Şəbəkənin əsas hədəfləri nə ola bilər?
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, müxtəlif xarici qüvvələr bunda maraqlı ola bilər: "Burada birmənalı şəkildə hər hansı bir dövlətin adını çəkmək düzgün deyil. Hətta ehtimallara əsaslansaq belə, demək olmaz. Hüquqşünas olaraq yanaşmam belədir. Ancaq reallıq ondan ibarətdir ki, bu gün Azərbaycanın iqtisadi inkişafına, siyasi sabitliyin qorunmasına digər dövlətlərin qısqanclıqla yanaşması halları var. Həmin dövlətlər Azərbaycanda vəziyyəti qarışdırmaq, stabilliyi pozmaq, bütövlükdə onun nüfuzuna beynəlxalq aləmdə kölgə salmaq istəyir. Daha doğrusu, orada belə qüvvələr var. Bu işdə vətəni sevməyənlər, iradəsi zəif olanlar xarici qüvvələrin alətinə çevrilir. Belə zəif insanlar ələ alınır və Azərbaycana qarşı casusluq fəaliyyətində istifadə olunur. Bu mənada DTX-nin fəaliyyəti təqdir olunmalıdır. Belə vətəndaşlara ar olsun! Adam vətənin marağını heç nəyə satmaz. Deməli, bunlarda vətənpərvərlik ruhu sıfır dərəcəsindədir". Vidadi ORDAHALLI
