14 iyul 2017-ci il tarixində Parisdə fəaliyyət göstərən Azərbaycanın Dostları Assosiasiyası (ADA) Fransa Respublikasının Milli bayramı münasibətilə Parisdəki Azərbaycan Mədəniyyət Mərkəzində klassik musiqi gecəsi təşkil edib. Gecəni assosiasiyanın baş katibi Mirvari Fətəliyeva açaraq qonaqları salamlayıb, Assosiasiyanın ənənəvi olaraq təşkil etdiyi tədbir barəsində və ifaçılar haqqında məlumat verib.
Səfirliyin siyasi məsələlər üzrə müşaviri və müvəqqəti işlər vəkili Nigar Huseynova çıxışında Fransa üçün böyük əhəmiyyət kəsb edən azadlıq, bərabərlik və qardaşlıq kimi mənəvi dəyərlərin Azərbaycan xalqında da əks olunduğunu qeyd edib. O, Fransanın Azərbaycanın müstəqilliyini tanıyan ilk ölkələrdən biri olduğunu və 1991-ci ildə Azərbaycan öz müstəqilliyini bərpa etdikdən sonra Fransa ilə intensiv əlaqələrin inkişaf etdiyini, ölkələrimiz arasında diplomatik əlaqələrin qurulmasının 25 illiyinin qeyd olunduğunu bildirib.
Nigar Hüseynova xalqlarımızın yaxınlaşmasında Azərbaycanın Dostları Assosiasiyasının mühüm rol oynadığını, 1998-ci ildə Fransanın Azərbaycandakı keçmiş və ilk səfiri Jan Peren tərəfindən yaradılmış və 4 il əvvəl Jan Fransua Mansel tərəfindən yenidən canlandırılmış bu assosiasiyanın Azərbaycan-Fransa dostluğunun carçısına çevrildiyini deyib.
O, eyni zamanda, bir il əvvəl Nitsa şəhərində baş vermiş dəhşətli terror aktının ildönümünü qeyd edərək, Azərbaycanın həmişə Fransa xalqına bu cür çətin sınaqlar zamanı dəstək olduğunu bildirib.
Sonra Fransada Azərbaycanın Dostları Assosiasiyasının sədri Jan-Fransua Mansel çıxış edərək, Azərbaycan haqqında və ölkəmizin Fransa ilə siyasi mədəni iqtsadi münasibətləri barədə məlumat verib, Assosiasiyanın fəaliyyətindən və gələcək layihələrindən bəhs edib. O, ölkəmizdə təşkil olunan beynəlxalq tədbirlərin yüksək səviyyədə keçirilməsindən söz açıb. İyulun 4-də Ermənistan silahlı qüvvələrinin törətdiyi təxribat nəticəsində kiçik Zəhranın həlak olması ilə bağlı Fransa prezidentinə müraciət etdiklərini, onu sülhün bərqərar olması istiqamətində səylərini səfərbər etməyə çağırdıqlarını xatırladıb.
J.Mansel qarşıdan gələn 2018-ci ilin Azərbaycan üçün çox əlamətdar olacağını, müsəlman Şərqində ilk demokratik dövlətin - Azərbaycan Xalq Cumhuriyyətinin yaradılmasının və qadınlara səs hüququnun verilməsinin 100 illiyinin bir sıra silsilə tədbirlərlə qeyd ediləcəyini iştirakçıların diqqətinə çatdırıb.
Tədbirin bədii hissəsi Azərbaycan Milli Opera və Balet Teatrının klassik musiqi ifaçısı, xalq artisti Fidan Hacıyevanın və istedadlı pianoçu Zülfiyyə Sadıqovanın iştirakı ilə davam edib. Konsert proqramına məşhur Azərbaycan və Avropa bəstəkarlarının klassik musiqisindən ibarət seçmə nümunələr daxil edilib.
Gecəyə Azərbaycanın Dostları Təşkilatının fəxri üzvləri, Fransa Senatının nümayəndələri siyasi və ictimai simalar, həmçinin mədəniyyət xadimləri dəvət olunub.
Musiqi gecəsindən sonra qonaqlar Eyfel Qulləsinin yanında yerləşən Azərbaycan Mədəniyyət Mərkəzinin binasından Fransanın Milli Bayramı - 14 iyul münasibətilə təşkil edilən bayram atəşfəşanlığını izləyib.
Baki-xeber.com
