Elçin Mirzəbəyli: "Belə qarayaxmaların heç bir nəticə verməyəcəyinə tamamilə əminəm" Şakir Ağayev: "Hələ siyahı elan olunmayıb, amma bəziləri bununla bağlı əsassız fikirlər səsləndirir"
Bildiyimiz kimi, bu günlərdə Azərbaycan Respublikasının Prezidenti İlham Əliyevin sərəncamı ilə jurnalistlər üçün inşa edilən ikinci binanın KİV təmsilçilərinə verilməsi gözlənir. Əvvəlcədən qeyd edək ki, jurnalistlərin mənzil şəraitinin yaxşılaşdırılması məqsədilə tikilən bina təmənnasız olaraq onların ixtiyarına veriləcək.
Ölkə başçısının media mənsublarına hədiyyə etdiyi mənzillərin gələcək sahiblərinin kimliyi bəlli olmasa da, təəssüf ki, bəzi KİV-lərdə, eləcə də sosial şəbəkələrdə olduqca iyrənc bir kampaniyaya start verilib. Bəzi saytlar və müxbirlər tərəfindən aparılan bu kampaniyanın məqsədi aydındır. Onlar bununla görülən işlərə kölgə salmaq niyyəti güdür. Bəzi qüvvələrin bir neçə gündür aktivləşərək yazdıqları, gündəmə gətirmək istədikləri fikirləri həqiqətən də cəfəngiyyatdan başqa bir şey deyil. Siyahı elan olunmayıbsa, orada kimlərin adının olmasından o adamlar haradan xəbər tuta bilər? Bu sualı görəsən tək qalanda özlərinə verirlərmi?
Məlumdur ki, jurnalistlərin mənzillə təmin edilməsi ilə bağlı yaradılan komissiya fəaliyyət göstərdiyi müddətdə KİV nümayəndələri tərəfindən edilən müraciətlərə, təqdim edilən sənədlərə olduqca obyektiv və həssaslıqla yanaşıb. Bunu onların gərgin fəaliyyət qrafiki də açıq şəkildə təsdiq edir.
Əsassız iddialara, cəfəngiyyata və uydurmalara söykənən qarayaxma yazıları bu şəffaf işə kölgə salmaq niyyəti güdsə də, hesab edirik ki, özünü doğrultmadı. Çünki həqiqətə söykənməyən istənilən fikir boşluğa yuvarlanmalıdır. Sözsüz ki, onların havadan dediyi fikirlər ölkənin tanınmış, nüfuzlu media adamları tərəfindən tamamilə ifşa edilməkdədir. Onların qarşıya qoyduğu köklü, tutarlı arqumentlər boş danışan adamların sözlərini yarıda kəsmək üçün yetərli deyilmi?
Onu da bildirək ki, jurnalistlər üçün inşa edilən ikinci binadan 256 KİV nümayəndəsi mənzil ala biləcək. Mənzil alacaq şəxslərin adları hələ açıqlanmadan müəyyən saytlarda əsassız olaraq yazırlar ki, guya mənzil alacaq jurnalistlərin adları onlara bəllidir. Həqiqət bundan ibarətdir ki, hələ mənzil alacaq şəxslərin adları elan olunmayıb. Bu halda kimlərinsə özünü biləndər, "məlumatlı şəxs" kimi göstərməsi yersizdir. Onlar öz başlarına "layiq olan jurnalistlər"in siyahısını tərtib etməklə, əslində, onlara yaxşılıq yox, pislik edirlər.
Hay-küy salırlar ki, çoxlu sayda jurnalist ev almaqdan məhrum edilib. Onu da vurğulayaq ki, haqqı, fəaliyyəti olan adamlar evdən məhrum edilməyib, onlar növbəti mərhələyə adlayıb. Nəzərə alsaq ki, 22 iyulda jurnalistlər üçün üçüncü binanın da təməli qoyulacaq, onda bu dəfə ev ala bilməyən həmkarlarımız oradan mənzil ala biləcək. Dövlətimizin siyasəti budur ki, media təmsilçiləri mənzillə təmin edilsin, onların yaşayış şəraiti yaxşılaşdırılsın. KİV mənsubları üçün bundan yaxşı nə ola bilər?
Ölkə başçısının jurnalistlərə mənzil hədiyyə etməsi olduqca xeyirxah bir işdir və bu istiqamətdə həyata keçirilən layihə müsbət məqsəd daşıyır. Bu hər kəsə məlum olan bir məsələdir. Qeyd edək ki, Prezident tərəfindən jurnalistlər üçün hədiyyə edilən ilk bina 2013-cü ildə onların ixtiyarına verilib. Onu da deyək ki, birinci binada 156 KİV nümayəndəsi evlə təmin olunub.
Bəzi KİV-lərdə və sosial şəbəkələrdə müəyyən adamların "layiq olan jurnalistlər"in siyahısını təqdim etməsinə, kimlərə "ev verilib-verilməyəcəyini" açıqlamasına, onların bu məsələ ilə bağlı uydurma, yalan fikirlər səsləndirməsinə münasibət bildirən ekspertlər bunun tam əsassız olduğunu vurğulayır.
"Xalq cəbhəsi" qəzetinin baş redaktoru Elçin Mirzəbəyli "Bakı-Xəbər"ə açıqlamasında məlum fikirlərin əsassız olduğunu dedi: "Belə bir əhəmiyyətli iş barədə dırnaqarası jurnalistlərin yazması və bəzilərinin bu barədə çıxış etməsi təəssüf doğurur. Bu müsbət hal deyil. Təbii ki, hələ mənzil alanların siyahısı açıqlanmayıb və o siyahıda kimlərin adının olduğu, kimlərin ev alacağı məlum deyil, amma bəziləri uydurma fikirlər səsləndirir. Bilirsiniz ki, mənzilin verilməsi şərtləri hər kəsin gözü qarşısında elan olunub, hansı sənədlərin tələb olunduğu açıqlanıb, kriteriyalardan hamının xəbəri olub. Bunlar ədalətli şəkildə müəyyənləşib və elan edilib. Komissiya da təqdim edilən sənədlərə şəffaf baxıb, ədalətlə yanaşıb. Jurnalistlərə Prezident tərəfindən mənzil hədiyyə edilməsi ümumiyyətlə kifayət qədər önəmli bir hadisədir. Ümid edirəm ki, medianın inkişafında xidmətləri olan insanlara mənzillər veriləcək.
Qarayaxmalara gəlincə, belə qarayaxmaların heç bir nəticə verməyəcəyinə tamamilə əminəm. Birinci dəfə də jurnalistlərə mənzil verilməsi aktı həyata keçiriləndə bəzi insanlar müəyyən iddialar, fikirlər ortaya qoymuşdu, amma son nəticədə onların uydurma olduğu meydana çıxdı. Gördünüz ki, nə qədər tanınmış, əməyi olan mətbuat nümayəndəsi mənzillə təmin olundu. Bu gün də onlar öz mənzillərində rahat şəkildə yaşayır, mətbuatın inkişafına öz töhfəsini verir. İndiki şəraitdə aparılan qarayaxma kampaniyası da iflasa uğrayacaq. Onlar özləri görəcək ki, fikirləri nə qədər gülüncdür. Jurnalistlər üçün inşa edilən binanın davamı da olacaq, bu işlər də şəffaf şəkildə həyata keçiriləcək".
E.Mirzəbəyli qeyd etdi ki, qarayaxma kampaniyası aparan adamlar ümumi medianın maraqlarından deyil, öz korporativ maraqlarından çıxış edir. Onların medianın prinsip və qaydalarına uyğun olmayan addımlar atdığını deyən E.Mirzəbəyli hesab edir ki, bu şəxslərin sonra da dövlətdən mənzil istəməsi absurddur.
"Novaya vremya" qəzetinin baş redaktoru Şakir Ağayev də bizimlə söhbətində bildirdi ki, yazılanlar və deyilənlər tam olaraq həqiqətə uyğun deyil. Ş.Ağayevin sözlərinə görə, jurnalistlərin mənzillə təmin olunması məsələsi birbaşa ölkə başçısının səlahiyyətlərində olan məsələdir: "Bilirsiniz ki, hələ siyahı elan olunmayıb, amma bəziləri bununla bağlı əsassız fikirlər səsləndirir. Hesab edirəm ki, siyahı açıqlanmadan, mənzil alan jurnalistlərin adları məlum olmadan yalan məlumatlar yaymaq düzgün deyil. Bu kampaniyanı aparanlar haqlı deyil. Deyim ki, mənzil məsələsi sırf Prezidentin səlahiyyətindədir. Siyahı da ölkə başçısı tərəfindən təsdiqlənir".
Ş.Ağayevin sözlərinə görə, siyahı açıqlanmadan bu barədə danışan adamların niyyəti görülən işə kölgə salmaqdır: "Mənə belə gəlir ki, siyahı məlum olmadan danışmaq tezdir. Siyahı açıqlanandan sonra fikir bildirmək olar. Yoxsa ortada heç bir məlumat yoxdur, durub əsassız fikirlər yazırlar. Bu yolverilməzdir".
İradə SARIYEVA
