Elyar Əlisoy: "Bunun böyük tərbiyəvi əhəmiyyəti var"
Azərbaycan Prezidenti İlham Əliyev Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında deyib ki, məmurlar özlərinin və ailə üzvlərinin davranışlarına xüsusi fikir verməlidir: "Mən dövlət məmurlarının davranış normaları ilə bağlı dəfələrlə öz fikirlərimi bildirmişəm və bir daha demək istəyirəm. Hər bir dövlət məmurunu işə təyin edəndə verdiyim tapşırıqlar arasında bunlar da var ki, məmur təvazökar olmalı, xalqa xidmət etməli, xalqla bir yerdə olmalı, özünü xalqdan yuxarı tutmamalıdır".
Dövlət başçısı qeyd edib ki, məmur özü və onun ailə üzvləri təkəbbürlü davranmamalıdır: "Ancaq buna baxmayaraq, bəzən hələ də görürük ki, həm məmurlar özlərini apara bilmirlər, kobud səhvlər buraxırlar və həm də ailə üzvləri hesab edirlər ki, onların xüsusi imtiyazı var. Azərbaycanda heç kimin heç bir imtiyazı yoxdur. Mən demişəm ki, o dövlət məmuru öz ailə üzvlərini idarə edə bilmirsə, vəzifədən çıxarılacaq və belə də oldu. Azərbaycanda xuliqanlıqla, özbaşınalıqla məşğul olanlar cəzalandırılır və cəzalandırılmalıdır. Heç kimə heç bir güzəşt edilmir və mənim son qərarlarım onu bir daha təsdiqləyir, hamı nəticə çıxarsın".
Prezidentin bu çıxışının məmurlar üçün nə kimi tərbiyəvi təsiri olacaq?
Sosioloq Elyar Əlisoy qəzetimizə bildirdi ki, hər bir dövlət məmuru öz vəzifə borcunu şərəflə yerinə yetirməli, insanlara qulluq etməli və təvazökar olmalıdır: "Bunu Prezident dəfələrlə bildirib. Ancaq, görünür, belə halların kökü tam kəsilməyib. Ancaq bu sayaq hallarla bağlı mübarizə də güclü gedir. Ölkədə dövlət qulluğu və məmur etikası haqqında qanunlar mövcuddur. Məmurlar ilk növbədə qanunlara riayət etməlidir. Digər tərəfdən, hər bir dövlət məmuru, millət vəkili və ya hər hansı idarəedici orqanda rəhbər vəzifədə çalışan şəxs peşəkar olmalı, qanunları bilməli və mənəviyyatca zəngin olmalıdır. Belə ki, mənəvi zənginlik olmayanda o insanın peşəkarlığı, sədaqəti, qanunpərəstliyi artıq vətəndaşlar üçün əhəmiyyət kəsb etmir. Ölkə başçısının sözləri təkcə müşavirədə iştirak edən məmurlara deyil, bütövlükdə, dövlət işlərində çalışan şəxslərə və cəmiyyətə aiddir. Təəssüflər olsun ki, çox zaman bəzi insanların başı işə, biznesə, vəzifəyə qarışır və öz uşaqlarının tərbiyəsi, mənəviyyatı ilə ciddi məşğul ola bilmirlər. Bu da mənəviyyatın aşınmasına gətirib çıxarır. Belələri böyük pulların, imtiyazların içinə düşür və öz həyat yollarını doğru seçə bilmir. Onlar həm özləri, həm ətrafdakılar, həm də cəmiyyət üçün problem yaradır.
Məmurların, yaxud da başqa vəzifəli şəxslərin və onların ailə üzvlərinin davranış forması cəmiyyətin harmoniyasına müsbət və ya mənfi təsir edən amillərdən biridir. Çünki bu insanlar həmişə diqqət mərkəzindədir. Onlardan nümunə, bəzən pis nümunə də götürürlər. Bəzən onların davranışı haqlı olaraq qısqanclıq, etiraz da doğurur. Bu da sosial münasibətlərin ya kəskinləşməsinə səbəb olur, ya da normal tənzimlənməsinə problemlər yaradır. Bu mənada, Prezidentin tapşırıqlarından ciddi nəticə çıxarmaq lazımdır, çünki bunun böyük tərbiyəvi əhəmiyyəti var".
Məhəmmədəli QƏRİBLİ
