FETÖ təşkilatı təkcə Türkiyə üçün deyil, bütün dünya üçün təhdiddir. "Trend"in məlumatına görə, bunu Türkiyənin Azərbaycandakı səfiri Erkan Özoral "TRT World Research Centre" ilə "Qafqaz Beynəlxalq Münasibətlər və Strateji Araşdırmalar Mərkəzi" (QAFSAM) tərəfindən "15 iyul FETÖ-çü hərbi çevriliş təşəbbüsünün mahiyyəti və FETÖ ilə mübarizə" mövzusunda təşkil edilmiş Dəyirmi masada çıxış edərkən deyib.
Onun sözlərinə görə, bütün dünya terrora qarşı birgə hərəkət etməlidir. 15 iyulun unudulmayacaq tarixlərdən biri olduğunu deyən səfir qeyd edib ki, bu tarixi əsla unutmamalıyıq: "Həmin tarixdə Türkiyə Cumhuriyyətinə qarşı xainlik edildi. Türk millətinin hər bir fərdi 15 iyulda ölkə prezidentinin çağırışı ilə küçələrə çıxıb, canını xaninlərin silahlarına sipər etdi. O gecə 250 nəfər şəhid oldu. Onları əbədi anacağıq".
Səfir bu hadisələr zamanı göstərdiyi dəstəyə görə Azərbaycana təşəkkürünü bildirib.
Milli Məclisin deputatı, akademik Əhliman Əmiraslanov qeyd edib ki, bir il əvvəl qardaş Türkiyədə baş verən dövlət çevirilişi cəhdi yalnız Türkiyə xalqında deyil, Azərbaycan xalqında da çox böyük təşviş yaratdı: "Bizim hər birimiz o gecəni həyəcanla keçirdik. Parlament həmin vaxt bununla bağlı bəyanatla çıxış etdi".
Türkiyə Böyük Millət Məclisinin üzvü Necdet Ünüvar deyib ki, Azərbaycan bu hadisə ilə daim maraqlandı: "Türkiyə ilə Azərbaycan arasında yalnız 1 illik deyil, əsrlər əvvəl başlamış bir dostluq var. Dostluq pis hadisələr zamanı daha tez üzə çıxır. Biz 15 iyulda bu dostluğu gördük".
N.Ünüvar əlavə edib ki, 15 iyul hadisələri ilə bağlı 12 ölkədə tədbir keçiriləcək. İlk belə tədbir Azərbaycanda keçirilir.
Səfir deyib ki, Fətullah Gülən hərəkatı ötənilki hərbi çevriliş cəhdinədək olduğu qədər güclü deyil. Onun sözlərinə görə, çevriliş cəhdindən sonra bu hərəkatla əlaqəli olan 130-140 min nəfər saxlanıb, onlardan 45 min nəfərinə həbs cəzaları verilib.
Səfir onu da qeyd edib ki, F.Gülənin ekstradisiya olunması ilə bağlı ABŞ-la danışıqlar davam etdirilir.
"Bildiyiniz kimi, FETÖ terror təşkilatı Türkiyənin xaricində də şəbəkələşib. Türkiyə xaricində də FETÖ-ya qarşı layiqli mübarizə aparılır. Azərbaycan bu mübarizədə daim Türkiyəyə dəstək verib". Bunu da Türkiyənin Azərbaycandakı səfiri Erkan Özoral 15 iyul 2016-cı ildə Türkiyədə dövlət çevrilişinə cəhdin ildönümünə həsr olunmuş mətbuat konfransında çıxışı zamanı deyib.
Səfir qeyd edib ki, 15 iyul çevrilişə cəhd gecəsi Azərbaycan prezidenti İlham Əliyev dərhal Türkiyə prezidenti Rəcəb Tayyib Ərdoğana zəng edib: "Türkiyənin gücü Azərbaycanın gücü, Azərbaycanın gücü Türkiyənin gücüdür. Terrora qarşı mübarizədə Azərbaycanı yanımızda görməklə böyük güc hiss edirik".
Diplomat dövlət çevrilişinə cəhd zamanı 250 nəfərin şəhidlik zirvəsinə ucaldığını xatırladıb: "Həmin gecə 2000-dən artıq vətəndaşımız isə yaralanıb. O gecə çevrilişə cəhd göstərənlərin törətdikləri vəhşiliyin tayı-bərabəri yox idi. 15 iyul dönüş nöqtəsi oldu. Dövlət çevrilişinə cəhd edənlər insanlıq hisllərini itirərək, sadəcə Pensilvaniyadan əmr almaqla robot kimi hərəkət ediblər".
E.Özoral qeyd edib ki, 15 iyul Türkiyə demokratiyası üçün mühüm sınaq olub: "Türkiyə vətəndaşları tək ürək, tək bədən oldu. Çevrilişə cəhd edənlər özünü Məsih, peyğəmbər elan etmiş bir adamın qullarına çevriliblər".
