Naxçıvan Muxtar Respublikasına səfər edən ölkənin aparıcı KİV rəhbərlərindən ibarət 20 nəfərlik nümayəndə heyəti bu gün Ordubad şəhərinə səfərdə olublar. Baki-xeber.com Movqe.az-a istinadən xəbər verir ki, nümayəndə heyəti səfər çərçivəsində öncə Ordubad şəhərində Qeysəriyyə Tarix Diyarşunaslıq Muzeyində olublar.
Muzey barədə qonaqlara məlumat verən muzeyin direktoru, Naxçıvan MR -nın əməkdar mədəniyyət işçisi Vilayət Bağırov Ordubadda hər abidənin özündə tarixi yaşatdığını bildirib: "XVII əsrdən soraq verən abidələrdən biri Qeysəriyyə tarixi abidəsidir. “Qeysəriyyə” sözünün mənası keçmiş zamanlarda şahlara məxsus daş-qaş, ləl-cəvahirat satılması məqsədilə tikilmiş örtülü Şərq bazarı deməkdir. Belə tikililərə dünyanın 3 yerində - Səmərqənd, Təbriz və Ordubad şəhərində rast gəlmək olur. Bu da onu göstərir ki, orta əsrlərdə Ordubadda ticarət və sənətkarlıq geniş inkişaf edib, dünyanın dörd bir yanından tacirlər, səyyahlar bura səyahət ediblər. Qeyri-adi quruluşa malik olan Qeysəriyyə binasından sonrakı dövrlərdə müxtəlif məqsədlərlə istifadə edilib. “Zorxana” kimi fəaliyyəti dövründə İrandan, Türkiyədən, Həmədandan və başqa yerlərdən gələn pəhləvanlar burada öz güclərini sınayıblar. Kim qalib gəlirdisə, hücrələrdə əyləşən xandan mükafat kimi bir kisə qızıl alırmış. XIX əsrin ortalarına yaxın Ordubadda yaradılmış “Əncüməni-şüəra” ədəbi məclisinin üzvləri bu binaya yığışıb öz yazdıqları əsərləri oxuyar, ədəbi müzakirələr apararmışlar. XX əsrdə abidə bir müddət ipək sarıyan sex kimi fəaliyyət göstərmiş, 1978-ci ildə ordubadlı memar Zakir Babayev tərəfindən bərpa edilmişdir.Ordubad Tarix-Diyarşünaslıq Muzeyinin bu binada fəaliyyət göstərməsi abidənin əhəmiyyətini daha da artırıb. Böyük günbəzdən və ona bitişik 16 kiçik günbəzdən ibarət olan bu bina gözəl memarlıq üslubunda tikilib. Hündürlüyü 8,5 metr olan abidə bişmiş kərpicdən inşa olunub. Tarixi tiklinin pəncərələri şəbəkə üsulu ilə işlənib. Ordubadda əksər tarixi tikililər, o cümlədən məscidlərin pəncərələrində şəbəkə sənətinə rast gəlirik. Bu da şəbəkə sənətinin Ordubadda tarixən inkişafından xəbər verir. Qədim dövrlərdən başlayaraq müasir günümüzədək rayonun tarixini özündə ehtiva edən ekponatlar aid olduğu guşələrdə yerləşdirilib. 150 eksponatla fəaliyyətə başlayan muzeydə hazırda 4000-dən artıq eksponat qorunub saxlanılır. 2016-cı ildə muzeyə XIV-XV əsrə aid silahlar, mis qablar, tarixi ədəbiyyatlardan ibarət 30-dan artıq yeni eksponat daxil olub". Muzeylə tanışlıqdan sonra Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli xatirə kitabına ürək sözlərini yazıb. Buradan sonra Nümayəndə Heyəti Y.Məmmədəliyevin ev muzeyi ilə tanış olublar. Muzeydə qonaqlara Y. Məmmədəliyevin həyat fəaliyyəti, elmin inkişafına verdiyi töhfələrdən bəhs edilib.
Səfər çərçivəsində KİV rəhbərləri bu torpağın yetişdirdiyi Məmməd Səid Ordubadinin ev muzeyində də olublar. Burada qonaqlara Ordubadinin uşaqlığı, həyat və yaradıcılığı ilə bağlı geniş məlumat verilib.
Məhəmmədtağı Sidqinin ev muzeyi ilə də tanış olan nümayəndə heyətinə muzeyin Naxçıvan MR -nın Ali Məclisinin sədrinin sərəncamı ilə 2014-cü ildə yaradıldığı barədə məlumat verilib. Muzeyin girişdən, 3 ekspozisiya və 3 iş otağından ibarət olduğu bildirilib.
Daha sonra nümayəndə heyəti14-cü əsrə aid Buzxana memarlıq abidəsi ilə də tanış olublar. KİV rəhbərləri tarixi və mədəni abidələri ilə zəngin olan Ordubad torpağından yüksək təəssüratla ayrılaraq Şahbuz rayonunda yerləşən Şahbuz Dövlət Təbiət Qoruğuna gəliblər. Qoruğun elmi işlər üzrə direktor müavini Mürsəl Seyidov qonaqlara məlumat verərək qoruğun 2003-cü ildə yaradıldığını bildirib. Direktor müavini Qoruğun Batabat gölü və Biçənək aşırımı ərazilərində yerləşdiyini diqqətə çatdırıb: "Ərazidə 2899 bitki növü yayılıb. Geniş müxtəlifliyə malik bitki örtüyü 285 növ faunaya malikdir. Ərazinin 85%-i palıd, 5%-i ardıc, ağır iyli ardıc, Araz palıdı, 7%-i yemişan, qalan 3%-i isə alma, alça, şərq palıdı, vən, daş armud, acı badam və müxtəlif kollar təşkil edir. Quşlardan Şahbuz Dövlət Təbiət Qoruğunun ərazisində Avropa Tüvüyü, kəklik, oxuyan silvi, adi kəklik, sarıköynək, bülbül, enliquyruq bülbül, meşə xoruzu, hop-hop və başqaları var. Muxtar Respublika ərazisində məskunlaşmış quş növlərindən bir çoxu "Qırmızı Kitab"a daxil edilibdir. Naxçıvan Muxtar Respublikasında 12 növ yırtıcı heyvan yayılıbdır. Bu heyvanlardan Qafqaz qonur ayısı, canavar, tülkü, çöl pişiyi, meşə siçanı, porsuq, çöl donuzu, vaşaq və bir çox heyvanlara qoruğun ərazisində rast gəlinir. Bu yaxınlarda burada cüyürün də olduğunu gördük".
Daha sonra qonaqlar Batabat Dövlət Təbiət Qoruğuna səfər ediblər. Füsünkar təbiəti ilə qonaqları heyran qoyan Batabat yaylağı KİV rəhbərlərinə xoş ovqat bəxş edib. Ərazidəki "Üzən ada" bura səfər edən nümayəndə heyətinin təəcübünə səbəb olub. Batabat yaylağı ərazisində bitən bitgi növləri də qonaqlar tərəfindən maraqla qarşılanıb.
Buradan Ağbulaq İstirahət Mərkəzinə gələn qonaqlar istirahət mərkəzində yaradılan şəraitlə tanış olublar. Batabat Dövlət Təbiət Qoruğuna, eləcə də Ağbulaq İstirahət Mərkəzinə gedən yolların abadlığı turizmin inkişafı baxımından KİV rəhbərlərində yüksək təəsürat oyadıb.
Ağbulaq İstirahət Mərkəzinin içracı direktoru Novruz Novruzov Mərkəzin 2013-cü ildə istifadəyə verildiyini, burada 38 otaqdan ibarət mehmanxana olduğunu, gələn qonaqlara istirahət üçün hər cürə şərait yaradıldığını vurğulayıb. Mərkəzdə il ərzində 50 faiz civarında doluluq olduğunu söyləyən N. Novruzov qış turizminin də inkişaf etdiyini vurğulayıb: " Qışda burada 60-70 sm qar örtüyü olur ki, bu da qışda İstirahət Mərkəzinin fasiləsiz işləməsinə səbəb olur. Qeyd edim ki, Mərkəzdə istifadə edilən qidalar kənd sakinlərindən alınır. Elə işçilərimiz də Ağbulaq kəninin sakinləridir". N. Novruzov Mərkəzdə eko turların da təşkil edildiyini vurğulayıb. Onun sözlərinə görə, bu turlarda bələdçiliyi də qonaqlara kənd sakinləri edirlər: "Hətta may ayının sonlarında da turistlərə yüksəkliklərdə qar örtüyü olan dağlıq ərazilərəd turlar təşkil edilir". Daha sonra KİV rəhbərlərinin şərəfinə Ağbulaq İstirahət Mərkəzində ziyafət verilib.
KİV rəhbərlərindən ibarət nümayəndə heyətinin Naxçıvan Muxtar Respublikasına səfəri bu gün başa çatıb.
Qeyd edək ki, Naxçıvan Muxtar Respublikasına Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşkilatçılığı ilə baş tutan üç günlük səfərdə ölkənin 20 aparıcı media orqanının rəhbəri iştirak edib. Media rəhbərlərinin Naxçıvana səfəri Naxçıvanın turizm potensialını təbliğ etmək məqsədi daşıyır.
