Məhərrəm Zülfüqarlı: "Ölkə başçısı tərəfindən belə bir qərarın verilməsini təqdir edirəm"
Məlum olduğu kimi, Azərbaycan Xəzər Dəniz Gəmiçiliyi donanmasının "Cəbrayıl" və "Qubadlı" yeni təchizat gəmilərinin istismara verilməsi mərasimi keçirilib. Prezident İlham Əliyev mərasimdə iştirak edib.
"Azərbaycan Xəzər Dəniz Gəmiçiliyi" QSC-nin sədri Rauf Vəliyev və Azərbaycan Respublikası Dövlət Neft Şirkətinin (SOCAR) prezidenti Rövnəq Abdullayev "Qubadlı" və "Cəbrayıl" təchizat gəmilərinin texniki göstəriciləri, təyinatı barədə dövlət başçısına məlumat veriblər. Bildirilib ki, hər iki gəmi SOCAR-ın dəniz obyektlərinə xidmət edən köhnə gəmiləri əvəzləyəcək. Gəmilərdən biri SOCAR-a məxsus "28 May", digəri isə "Ümid" yatağındakı platformalara xidmət göstərəcək.
Prezident İlham Əliyevin tapşırığına əsasən gəmilərə işğal altında olan rayonlarımızın adları verilib. O da məlum olub ki, gəmilərin hər birinin uzunluğu 73,6, eni 16 metrdir. Dedveyti 3270 ton olan gəmilər öz göyərtəsinə 1600 ton yük götürmək qabiliyyətinə malikdir. Azərbaycan Xəzər Dəniz Gəmiçiliyinin donanmasında olan digər təchizat gəmiləri ilə müqayisədə bu gəmilərin bir sıra üstünlükləri var. Belə ki, yeni təchizat gəmiləri yanacaq, sürtkü yağı, qələvi məhlul, özül yağı, quru yük, içməli su, qazma məhlulu, konteyner, boru və bu kimi digər müxtəlif yükləri qəbul etmək üçün daha geniş göyərtəyə və böyük həcmli yük tutumuna malikdir.
Ümumilikdə, işğal altında olan ərazilərin unudulmaması baxımından Prezidentin bu qərarı təqdirəlayiqdir. Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, belə bir qərarın verilməsinin əhəmiyyəti var: "Əhəmiyyəti ondan ibarətdir ki, işğal altında olan ərazilər unudulmur. Xüsusən də gənc nəslin yaddaşında həmin əraziləri yaşatmaqdan ötrü belə bir qərarın verilməsi lazım idi. Düzdür, gec-tez, işğal altında olan ərazilər azad ediləcək. Ancaq o vaxta qədər biz maksimum çalışmalıyıq ki, həmin bölgələr unudulmasın. Uşaqlar bilsinlər ki, hansı rayonlar işğal altındadır. Hesab edirəm ki, bunun mənəvi əhəmiyyəti böyükdür. O üzdən, ölkə başçısı tərəfindən belə bir qərarın verilməsini təqdir edirəm".
Vidadi ORDAHALLI
