Mayın 26-da İmişli rayonunda "Ruh" Jurnalistlərin Müdafiəsi ictimai birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə gerçəkləşdirdiyi "Sosial şəbəkələrdən faydalanmağın təbliği ilə vətəndaş cəmiyyəti quruculuğuna dəstək" layihəsi çərçivəsində ikinci Dəyirmi Masa keçirilib.
Toplantını giriş sözü ilə İmişli Rayon İcra Hakimiyyətinin ictimai-siyasi və humanitar məsələlər şöbəsinin müdir müavini Hüseyn İbrahimov açıb. O bildirib ki, ölkənin hər yerində olduğu kimim, İmişlidə də sosial şəbəkələrdən istifadəyə maraq böyükdür. Bununla vətəndaşlar ictimai həyatda iştirakını təsdiqləmiş olur. Eyni zamanda dövlət quruculuğu prosesinə dəstək göstərirlər. H.İbrahimov onu da qeyd edib ki, mövcud fəallıq heç də hər zaman effektiv olmur, konkret problemlər nəzərə çarpır. Keçirilən Dəyirmi Masa mənfi təmayüllərə qarşı bir növ səfərbərlik mahiyyəti daşımaqdadır. "Ruh" Jurnalistlərin Müdafiəsi ictimai birliyi gerçəkləşdirdiyi layihə ilə sosial şəbəkələrdən istifadə yolu ilə vətəndaş cəmiyyəti quruculuğuna dəstək göstərilməsini hədəf seçib.
"Ruh" Jurnalistlərin Müdafiəsi ictimai birliyinin sədri, "Sosial şəbəkələrdən faydalanmağın təbliği ilə vətəndaş cəmiyyəti quruculuğuna dəstək" layihəsinin rəhbəri Əvəz Rüstəmov çıxışında layihənin məqsəd və vəzifələri barədə məlumat verib. O bildirib ki, sosial şəbəkələr söz və ifadə azadlığının mühüm arealı kimi çıxış etməkdədir. Ölkədə təkcə facebookdan isifadə edənlərin sayı 1 milyondan artıqdır. Bu isə o deməkdir ki, sosial şəbəkələr ictimai rəyin formalaşmasında iştirak edir, onlar virtual deyil, real məkandır: "Mövcud məkanın faydalı tərəfləri olduğu kimi, ziyanlı cəhətləri də var. Biz çalışmalıyıq ki, faydalı tərəfləri vətəndaş cəmiyyəti quruculuğununa yönləndirək, sosial şəbəkələrin cəmiyyətdəki rolu pozitiv meyllərlə xarakterizə olunsun. Layihə də məhz bunu rəhbər tutur".
Ə.Rüstəmov çıxışında esktremal situasiyalar zamanı sosial şəbəkələrdə yaradılan ictimai rəy üzərində dayanıb. "Bəzən elə olur ki, cəbhə xəttində gərginlik yaranan zaman hansısa gənc hərbi texnikanın deslokasiya anını mobil telefonuna çəkir. Əlbəttə, o gənc nəsə ziyan vurmaq istəmir. Ola bilər, onun qanunvericilikdən də xəbəri yoxdur. Hər bir halda həssaslıq şərtdir", - deyə o vurğulayıb.
"Sosial şəbəkələrdən faydalanmağın təbliği ilə vətəndaş cəmiyyəti quruculuğuna dəstək" layihəsinin eksperti, "Jurnalist Araşdırmaları Mərkəzi" İctimai Birliyinin sədri Seymur Verdizadə bildirib ki, Azərbaycanda internet hüquqi münasibətlər sistemində oturuşmuş mövqeyə malik deyil. Ölkəmizdə müəyyən dövlət sənədlərinə əlavə və dəyişikliklər nəticəsində internetin hüquqi münasibətlər sistemimizdə çəkisi yaradılıb. Həmin əlavələrdə sosial şəbəkələrdə təhqir və böhtanların, yalan məlumatların yayılmasına, saxta adlarla bu və ya digər xoşagəlməz fəaliyyətin gerçəkləşdirilməsinə qarşı məsuliyyət nəzərdə tutulub. Buna görə də cəmiyyət üzvləri sosial şəbəkələrdən istifadə zamanı vacib olan etik davranış qaydalarını qorumalıdır. Bu işin isə əsasən də bölgə əhalisi içərisində aparılmasına ehtiyac var", - deyə S.Verdizadə vurğulayıb.
Toplantıda çıxış edənlərdən Saatlı Rayon Gənclər və İdman İdarəsinin rəis müavini Ramin Nəsirov, gənc fəal Ziya Rzayev və başqaları sosial şəbəkərlərdən istifadə mədəniyyətinin formalaşmasındakı ayrı-ayrı faktorlara nəzər salıb.
