Mayın 27-də Mili Aviasiya Akademiyasının və ADA Universitetinin birgə təşkilatçılığı ilə 28 May-Respublika Gününə həsr olunan tədbir keçirilib.
Baki-xeber.com-un xəbərinə görə, Azərbaycan Respublikasının Birinci vitse-prezidenti Mehriban Əliyeva, Heydər Əliyev Fondunun vitse-prezidenti Leyla Əliyeva və Arzu Əliyeva tədbirdə iştirak edib.
ADA Universitetinin prorektoru Fariz İsmayılzadə 1918-ci il mayın 28-də Azərbaycan Xalq Cumhuriyyətinin yaradılması tarixindən danışıb. Fariz İsmayılzadə Respublika Günü münasibətilə təşkil olunan rəsmi qəbulda Prezident İlham Əliyevin bu tarixi günlə bağlı sözlərini xatırladaraq qeyd edib ki, Azərbaycanda yaradılan birinci müsəlman demokratik respublikası xalqımızın dünya miqyasında nə qədər mütərəqqi və istedadlı olduğunu bir daha göstərdi. Müstəqilliyimiz əldə edilən illərdə Azərbaycan Xalq Cumhuriyyəti uğrunda mübarizə aparan insanların xidmətlərini xatırladan prorektor ölkəmizin müstəqilliyini bərpa etdikdən sonra ulu öndər Heydər Əliyevin misilsiz işlər gördüyünü vurğulaqıb. Bildirib ki, o, müstəqilliyini itirmək təhlükəsi ilə üzləşən Azərbaycanı fəlakətlərdən xilas edərək demokratik, hüquqi və sürətlə inkişaf edən dünyəvi dövlətə çevirib.
Sonra Azərbaycanın dövlət himni səsləndi.
Milli Aviasiya Akademiyasının rektoru, akademik Arif Paşayev çıxışında tədbirin keçirildiyi Milli Aviasiya Akademiyasının zalını təyyarəyə bənzədib. “Bu təyyarə ADR-dir. Nömrəsi də 99”, - deyən Arif Paşayev 99 il bundan əvvəl Azərbaycan Xalq Cumhuriyyətinin yaradılması münasibətilə təbriklərini çatdırıb. Bildirib ki, “bu təyyarə” Luiziananın caz ansamblını bu tədbirə gətirib.
ADA Universitetinin rektoru, professor Hafiz Paşayev 99 il əvvəl yaradılan ilk demokratik respublikanın bu gün bizim fəxrimiz olduğunu, fərəh hissi ilə bu tarixi dünyaya bəyan etdiyimizi vurğulayıb. Hafiz Paşayev ölkəmizin ABŞ-da səfiri vəzifəsində çalışdığı vaxtlarda Cumhuriyyətin yaradıcılarından biri olan Fətəli xan Xoyskinin qardaşı oğlu Ziyadxan Xoyski ilə Vaşinqtonda görüşdüyünü və onun “Azərbaycan yenidən müstəqillik əldə edib. Xahiş edirəm bunu bir də əldən verməyin” sözlərini xatırladıb. Sovet dövründə Cumhuriyyətlə bağlı məlumatın az olduğunu diqqətə çatdıran ADA Universitetinin rektoru bu gün bizim müstəqil respublikamızın qədrini bildiyimizi deyib. Prezident İlham Əliyevin bununla bağlı çıxışını qeyd edən Hafiz Paşayev dövlət başçısının “Müstəqilliyimiz əbədidir və bunu bir daha itirməyəcəyik” sözlərini xatırladıb.
Sonra səhnəyə Cons Hopkins Universitetinin Mərkəzi Asiya və Qafqaz İnstitutunun rəhbəri, tarixçi alim, ADA Universitetinin fəxri doktoru, tanınmış cazmen Frederik Star dəvət olunub. Frederik Star Bakının hələ sovetlər dövründə caz mərkəzi kimi tanındığını bildirərək, paytaxtımızı böyük musiqi şəhəri adlandırıb.
Tədbirdə cazmen Cavan Zeynallının və Əməkdar artist Lalə Məmmədovanın da ifaları səslənib. Sonra səhnə ABŞ-ın Luiziana caz ansamblının ixtiyarına verilib. Ansamblı 1967-ci ildə Frederik Star təsis edib. 1980-ci illərdə Bakıya gələn Frederik Star Vaqif Mustafazadə ilə bir səhnəni bölüşüb.
Tədbirdə banjo alətində muğam ifa olunub. Milli Aviasiya Akademiyasının və ADA Universitetinin tələbələrinin ifasında bu ali təhsil ocaqlarının himnləri səslənib.
Birinci vitse-prezident Mehriban Əliyeva ABŞ-ın Luiziana caz ansamblının musiqiçiləri ilə görüşüb.
