Adil Qeybulla: "Bundan ötrü onların DNT analizinə ehtiyac var"
Məlum olduğu kimi, son günlər Ermənistan-Azərbaycan, Dağlıq Qarabağ münaqişəsi zamanı, intensiv hərbi əməliyyatların getdiyi dövrdə həlak olaraq tanınmadan dəfn edilmiş şəxslərə aid məzarların və dəfn prosesinin fotoşəkillərinin yayılması ictimaiyyət tərəfindən birmənalı qarşılanmayıb. Ayrı-ayrı vətəndaşlar tərəfindən itkinlərə aid məzarların açılması istiqamətində bir sıra qanunsuz addımların atılmasına cəhdlər edilib.
Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumatına görə, silahlı münaqişələr nəticəsində itkin düşmüş şəxslərə aid olduğu ehtimal edilən məzar yerlərinin ekshumasiyasını həyata keçirmək üçün, ilk növbədə, onlarla bağlı tam və əhatəli məlumatlar toplanmalı, yaxın qohumlarından DNT nümunələri götürülməlidir. Bu proses başa çatdıqdan sonra səlahiyyətli dövlət orqanlarının müvafiq qərarı əsasında məhkəmə-tibbi ekspertiza və digər mütəxəssislər heyəti müəyyən edilərək məzarda qazıntı işləri aparılmalıdır.
Xüsusi qaydada toplanmış insan qalıqları laboratoriyada zəruri prosedurları keçdikdən sonra meyitdən və itkinin yaxınlarından götürülmüş nümunələr tutuşdurularaq eyniləşdirmə aparılır. Proses müsbət nəticə verdiyi təqdirdə insan qalıqları ailəyə təhvil verilir.
Qurumun açıqlamasından o da məlum olub ki, müvafiq qurumlarla bu istiqamətdə tədbirlər görülür. Ümumən itkin düşmüş şəxslərə aid olduğu ehtimal edilən məzar yerlərinin ekshumasiyasının aparılması orada dəfn olunanların şəxsiyyətinin müəyyənləşdirilməsində nə kimi rol oynaya bilər?
Məsələyə münasibət bildirən tibb sahəsi üzrə ekspert Adil Qeybullanın sözlərinə görə, bu istiqamətdə görülən işlərin müəyyən nəticəsi ola bilər: "Burada söhbət həm də itkin düşən şəxslərin şəxsiyyətinin identifikasiyasından gedir. Bundan ötrü onların DNT analizinə ehtiyac var. Məsələ ondadır ki, sözügedən analiz olmasa, onların şəxsiyyətini müəyyən etmək mümkün olmayacaq. Ona görə də hesab edirəm ki, bu iş kompleks şəkildə təşkil olunsa, əlbəttə, o zaman həmin şəxslərin konkret kim olduğunu müəyyən etmək mümkün olar. O üzdən, hesab edirəm ki, bu işlər sistemli şəkildə aparılmalıdır".
Vidadi ORDAHALLI
