1991-1945-ci illər müharibəsində əldə edilmiş tarixi qələbənin 72-ci ildönümü münasibətilə ölkəmizin bölgələrində müxtəlif tədbirlər keçirilib.
Şabran Rayon Polis Şöbəsinin və Azərbaycan Respublikası Müharibə, Əmək və Silahlı Qüvvələr Veteranlar Təşkilatının rayon təşkilatının birgə təşkilatçılığı ilə rayon tarix diyarşünaslıq muzeyində keçirilən ziyalıların və gənclərin iştirak etdiyi tədbirdə müharibə və polis veteran Bəyəli Əliyev məhz ulu öndər Heydər Əliyevin xalqın təkidli tələbilə ali hakimiyyətə qayıdışından sonra bayram əhval-ruhiyyəsi ilə qeyd edildiyini, faşizmlə mübarizədə fədakarlıqla mübarizə aparan insanlara yüksək dəyər verildiyini bildirib.
Çıxış edən müharibə veteranları onlara göstərilən diqqət və qayğıya görə minnətdarlıq edib, keçdikləri döyüş yolu, həyatlarının ən keşməkeşli dövrü olan Böyük Vətən müharibəsi haqqında xatirələrini bölüşüb.
Tədbirdə çıxış edən Şabran RPŞ-nin Veteranlar Şurasının sədri, istefada olan polis polkovnik-leytenantı Valeh Sadıqov müharibənin ilk günlərindən səfərbər olub cəbhəyə yollanan oğullarımızın rəşadətindən danışıb, hərbi xidmətdən sonra onların ölkəmizin ictimai həyatında mühüm əməyi olduğunu bildirib. Gənclərə örnək olacaq belə dəyərli insanlardan Şabranda doğulub böyümüş Abdulla İbrahimovun bölük komandiri kimi şərəfli döyüş yolu keçdiyi, göstərdiyi hünərə görə orden və medallarla təltif olunduğu barədə məlumat verərək, onun sonradan müharibə canilərinin mühakimə olunduğu Nürnberq prosesində hüquqşünas kimi iştirak etməsindən, hüquq-mühafizə orqanlarında yüksək vəzifələrdə - Bakı şəhər prokuroru, daxili işlər nazirinin müavini, Respublika Ali Məhkəməsinin sədri vəzifələrində işlədiyini, yaddaşlarda bacarıqlı təşkilatçı, prinsipial rəhbər, dəyərli insan kimi bu gün də adının hörmətlə anıldığını bildirib.
V.Sadıqov gənc yaşlarından orduya çağırılaraq şərəfli döyüş yolu keçmiş İsmayıl Mövludovun sonradan daxili işlər orqanlarında müxtəlif vəzifələrdə, o cümlədən Oğuz, Göygöl, Şabran rayon daxili işlər şöbələrinin rəisi vəzifələrində xidmət etdiyini, xalqına, dövlətinə sədaqəti ilə seçildiyini bildirib. O, digər qəhrəmanlarımızın da xatirələrdə yaşayacağını bildirib.
Natiq Cavadov DİN Mətbuat xidmətinin əməkdaşı, polis baş leytenantı
