Azərbaycan Bakı-2017 IV İslam Həmrəyliyi Oyunları çərçivəsində heç bir idmançının yol xərcini ödəmir. "Trend"in məlumatına görə, bunu gənclər və idman naziri, IV İslam Həmrəyliyi Oyunları Əməliyyat Komitəsinin baş icraçı direktoru Azad Rəhimov İslam Həmrəyliyi Oyunları ilə bağlı dünən keçirilən mətbuat konfransında deyib.
Nazir bildirib ki, hər bir idmançı Azərbaycanda qalmağa və qidalanmağa görə 50 dollar vəsait verir: "Buna Atletlər Kəndində qalmaq və qidalanmaq daxildir. Hansı ölkələr ki, bizə müraciət edib, biz onlara qalmaq və qidalanmaqla bağlı köməklik göstərmişik".
Azad Rəhimov deyib ki, bu oyunların məhz Bakıda keçirilməsindən qürur hissi duyuruq: "İslam Həmrəyliyi Oyunları tək idman yarışı deyil, sülhün bərqərar olduğu ölkələrin bir araya gəlməsi, bir dildə danışmasıdır. Əfsuslar olsun ki, Sudan, Liviya və Küveyt bu oyunlara qoşulmayacaq. Bu hal bizi məyus etsə də, 54 ölkədən 3 mindən çox idmançının iştirak etməsi bizi sevindirməyə bilməz. İslam Həmrəyliyi Oyunları sülhün, mədəniyyətin və birliyin nümayişi olacaq".
A.Rəhimov qeyd edib ki, İslam Həmrəyliyi Oyunları ilə bağlı iclaslarda 57 islam ölkəsinin nümayəndələri iştirak edib: "Biz bəyan etmişdik ki, 57 ölkənin idmançıları oyunlarda iştirak edəcək, amma son 3-4 gün ərzində bizə daxil olan məlumatlara görə, 3 ölkə - Sudan, Liviya və Küveyt oyunlarda iştirak etmir".
O həmçinin deyib: "Bütün ölkələrdən gələn idmançılara hər cür şərait yaradılması üçün biz əlimizdən gələni etmişik. Azərbaycan tərəfindən oyunlarda idmançılar üçün yaradılan şərait bütün ölkələrin gəlməsi üçün cəlbedicidir. Bu 3 ölkənin oyunlara gəlməməsi ilə bağlı qərarlarına hörmətlə yanaşırıq".
Nazir vurğulayıb ki, IV İslam Həmrəyliyi Oyunlarının açılış mərasimində çoxlu sayda nüfuzlu beynəlxalq idman federasiyalarının prezidentləri, nümayəndələri və digər qonaqlar iştirak edəcək.
Rəhimov bildirib ki, Azərbaycan mayın 12-22-də Bakıda baş tutacaq yarışa tam hazırdır: "Düşünürük ki, bütün dünyanın diqqəti Azərbaycanda olacaq. İslamiadanın ölkəmizdə keçirilməsindən qürur hissi duyuruq. Növbəti 11 gün ərzində 50-dən çox ölkənin nümayəndəsi müxtəlif növlər üzrə yarışacaq. Əfsuslar olsun ki, bəzi ölkələr İslamiadadan son anda imtina etdilər. Liviya, Sudan və İslam Həmrəyliyi İdman Federasiyasının bayrağı altında çıxış etməli olan Küveyt yarışa qatılmayacaq. Buna məyus olsaq da, yarışda iştirak edəcək 54 ölkə bizi sevindirməyə bilməz. Bakı yarışa hazırdır. İslamiada 4 qitədə yayımlanacaq və təxminən 1,3 milyarddan artıq insan yarışı izləyəcək".
Rəhimov 3 komandanın imtinasının səbəbini bilmədiyini deyib: "57 ölkənin hər bir şef-de-missionu İslamiadada iştirakını təsdiqləmişdi. Biz də əlimizdən gələni etmişik. İşimizi onların tələblərinə uyğunlaşdırmışıq. Hər bir ölkənin qərarına hörmətlə yanaşırıq. Gəlmirlərsə, düşünürəm ki, hansısa ciddi səbəb var".
O bildirib ki, yarışa 30-a yaxın beynəlxalq federasiyanın rəsmisi gələcək. Rəhimov mayın 8-də açılış mərasiminin məşqinin də yüksək səviyyədə keçdiyini vurğulayıb: "Bu mərasim gözəl ideyalarla dolu olacaq. Həqiqətən də İslamın dəyərlərini nümayiş etdirəcək".
Faysal Abdul Aziz Əl-Nassar isə təşkilati işlərin yüksək səviyyədə olduğunu deyib. O, yarışın yüksək səviyyədə keçəcəyinə inam ifadə edib: "Bu Oyunlarda 3000-dən çox idmançı Odlar diyarında yarışacaq. Azərbaycan tərəfindən tükənməz dəstək Oyunlara əlavə rəngarənglik qatacaq. Yarışın Təşkilat Komitəsinin rəhbəri olan Azərbaycanın I xanımı Mehriban Əliyevaya xüsusi minnətdarlığımı bildirirəm. İnanıram ki, bu yarış İslam Həmrəyliyi Oyunları arasında ən yaxşılardan olacaq. Yekunda Azərbaycan Prezidenti İlham Əliyevə qətiyyəti və dəstəyi ilə Oyunların Bakıda keçirilməsinə şərait yaratdığı üçün təşəkkür edirəm".
Çingiz Hüseynzadə isə Azərbaycan millisi barədə danışıb. O bildirib ki, ilk dəfə belə böyük heyətlə yarışa qatılırıq: "Ümumi heyət 500 nəfərdən artıqdı. Hər şey yüksək səviyyədə həll olunub. Sabah start veriləcək Oyunlar çox böyük uğurlara gətirib çıxaracaq. Proqnoz vermək bir qədər çətindir. Çünki rəqibləri bir o qədər yaxşı tanımırıq. Avropa çempionatında bir sıra idmançılarla üz-üzə gəldiyimizdən, onlar barədə məlumatlıyıq. Buna baxmayaraq, Avropa Oyunlarında ilk "üçlüy"ə düşməyi planlaşdırırdıqsa, bu dəfə ilk sırada qərarlaşmaq istəyirik. Hər halda, Bakı-2015-dən çox medal qazanacağıq".
Nurullayeva isə artıq 46 ölkənin idmançılarının Atletlər kəndinə yerləşdirildiyini qeyd edib. O bildirib ki, 8 ölkənin gəlişini gözləyirlər.
Bakı İslam Oyunları islamı tamamilə fərqli tərəfdən göstərəcək...
İslam Həmrəyliyi Oyunları Azərbaycana qonaqpərvərliyini və tolerantlığını göstərməyə imkan verəcək. Bunu "Trend"ə rusiyalı politoloq, beynəlxalq məsələlər üzrə ekspert Yevgeni Mixaylov deyib.
Onun sözlərinə görə, İslam Həmrəyliyi Oyunlarının keçirilməsi Bakıya bir idman mərkəzi kimi daha çox imtiyazlar verəcək: "Bu gün İslam dünyasında çoxlu fikir ayrılıqları var, bəzi qüvvələr islami dəyərləri öz xeyirləri üçün istifadə edir, bəzi qüvvələr qeyri-islam dünyasını müsəlmanlara qarşı çevirməyə çalışır. Bu Oyunlar İslam haqqında stereotiplərə dəyişməyə yardım edəcək və İslamı tamamilə fərqli tərəfdən göstərəcək".
Ekspertin fikrincə, azərbaycanlı idmançılar ölkəni layiqincə təmsil edəcək və çoxlu medal qazanacaq: "Azərbaycanda gənclərin idman hazırlığına və ümumilikdə idmanın inkişafına böyük diqqət ayrılır" o deyib.
İslamiadaya gələn müsəlman qadın və kişilərə ayrı-ayrı həkimlər tərəfindən xidmət göstəriləcək?
Səhiyyə Nazirliyi IV İslam Həmrəyliyi Oyunları zamanı Azərbaycana gələn müsəlman qadın və kişi qonaqlara, eləcə də idmançılara tibbi xidmətin təşkili məsələsində fərqli yanaşmanın tətbiq edilib-edilməyəcəyinə aydınlıq gətirib. Nazirliyin mətbuat xidmətinin əməkdaşı Səfayə Əhmədova özəl olaraq "Trend"ə bildirib ki, idmançılar və qonaqlara stasionar tibbi yardım Bakı şəhərindəki Kliniki Tibbi Mərkəz və Bakı Sağlamlıq Mərkəzində göstəriləcək.
S.Əhmədova qeyd edib ki, oyunlara gələn bütün idmançılar və qonaqlara tibbi xidmət yüksək səviyyədə göstəriləcək və bunun üçün bütün hazırlıq işləri görülüb.
Nazirlik rəsmisi əlavə edib ki, tibbi xidmətə ehtiyacı olan qonaqlar, idmançılar ona bu xidməti göstərə bilən kişi və ya qadın həkimi seçməkdə sərbəstdir. Belə ki, qadınlar onlara kişi həkimlərin tibbi xidmət göstərməsini istəməyəcəksə, bu halda onlar qadın həkimlərin xidmətindən istifadə edə bilər: "Və ya əksinə olaraq, qadınların ona tibbi xidmət göstərməsini istəməyən müsəlman kişi elə kişi həkimin xidmətindən istifadə edə bilər. Biz bu məsələ ilə bağlı hər hansı problemin yaranacağını düşünmürük".
Azərbaycan idmançıları və məşqçiləri üçün ən yüksək nəticələrə görə mükafatlar müəyyən edildi
Prezident İlham Əliyev Bakı şəhərində keçirilən IV İslam Həmrəyliyi Oyunlarında Azərbaycan Respublikasının idmançıları və onların məşqçiləri üçün ən yüksək nəticələrə görə mükafatların müəyyən edilməsi haqqında sərəncam imzalayıb.
Sərəncamda qeyd olunur ki, Bakı şəhərində keçirilən IV İslam Həmrəyliyi Oyunlarında ən yüksək nəticələrə görə Azərbaycan Respublikasının idmançıları və onların məşqçiləri üçün mükafatların məbləği aşağıdakı qaydada müəyyən edilir:
1.1. birinci yeri tutan hər bir idmançıya 100 min manat, onun şəxsi məşqçisinə 50 min manat;
1.2. ikinci yeri tutan hər bir idmançıya 50 min manat, onun şəxsi məşqçisinə 25 min manat;
1.3. üçüncü yeri tutan hər bir idmançıya 30 min manat, onun şəxsi məşqçisinə 15 min manat.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
Həmçinin Azərbaycan Respublikası Milli Olimpiya Komitəsi Prezident İlham Əliyev Bakı şəhərində keçirilən IV İslam Həmrəyliyi Oyunlarında Azərbaycan Respublikasının idmançıları və onların məşqçiləri üçün ən yüksək nəticələrə görə mükafatların müəyyən edilməsi haqqında sərəncam imzalayıb.
Sərəncama əsasən, IV İslam Həmrəyliyi Oyunlarında ən yüksək nəticələrə görə Azərbaycan Respublikasının idmançıları və onların məşqçiləri üçün mükafatların məbləği aşağıdakı qaydada müəyyən edilir:
- birinci yeri tutan hər bir idmançıya 50 min manat, onun məşqçisinə 25 min manat;
- ikinci yeri tutan hər bir idmançıya 30 min manat, onun məşqçisinə 15 min manat;
- üçüncü yeri tutan hər bir idmançıya 20 min manat, onun məşqçisinə 10 min manat.
