Arzu Nağıyev: "Bu, Azərbaycan xüsusi xidmət orqanlarının işinə kölgə salmaq, onları qeyri-peşəkar göstərmək üçün edilir"
Məlum olduğu kimi, Müdafiə Nazirliyinin mətbuat xidməti ermənilərə işləyən qrupun guya "Mossad" təşkilatının köməkliyi ilə aşkar edilməsi barədə bəzi KİV-də gedən məlumata münasibət açıqlayıb: "Birmənalı surətdə bildiririk ki, bu məsələdə "Mossad" adlı qurumun heç bir fəaliyyəti olmayıb. Düşmənlə məxfi əməkdaşlığa cəlb olunmuş bir qrup hərbi qulluqçu və mülki şəxslərin aşkar edilməsi və ifşa olunması Müdafiə Nazirliyinin müvafiq qurumları tərəfindən edilib. Toplanılan materiallar müvafiq qaydada Respublika Baş Prokurorluğuna təqdim olunub.
Bəzi KİV-in və ekspertlərin sözügedən qrupun hansısa xarici xüsusi xidmət orqanı tərəfindən müəyyənləşdirilməsilə bağlı yaydıqları məlumat hansı məqsədlər üçün hesablana bilər?
Təhlükəsizlik məsələləri üzrə ekspert Arzu Nağıyev qəzetimizə bildirdi ki, bunu edənlərin konkret məqsədləri var: "Düşünürəm ki, belə dezinformasiyalar məqsədli şəkildə yayılır. Bu, Azərbaycan xüsusi xidmət orqanlarının işinə kölgə salmaq, onları qeyri-peşəkar göstərmək, eyni zamanda İsraillə Azərbaycan arasında bu istiqamətdə tərəfdaşlığın olduğunu qabartmaq üçündür. Məlum məsələdir ki, hər bir dövlətin xüsusi xidmət və digər orqanlarının tərəfdaş dövlətlərlə məlumat mübadiləsi və digər istiqamətlərdə tərəfdaşlıq müqavilələri var və bundan istifadə hüququ da öz səlahiyyətlərinə aiddir. Konkret məsələyə gəldikdə isə, belə dezinformasiyalar ilk növbədə Ermənistan və təbii ki, onun himayədarları olan dövlətlərə aiddir. Yəni keçirilən əməliyyatlar nəticəsində ilk növbədə onların xüsusi xidmət orqanlarının səriştəsizliyi və peşəkar olmaması ifşa edilib. Buna görə də bu proseslər onlarda, necə deyərlər, qıcıq yaradır. Yəni məqsəd məlumdur. Bu dezinformasiyalar dövlətimizə qarşı təhdidlərlə bağlı əlaqədar qurumların gördüyü işə kölgə salmaqdan başqa bir şey deyil".
Məhəmmədəli QƏRİBLİ
