Ramil Hüseynov: "Maksimum çalışmaq lazımdır ki, bu sahədə hansısa neqativ hal baş verməsin"
Hərbi xidmətə yararsız olması barədə sənəd əldə edənlər yenidən yoxlanır. Səfərbərlik və Hərbi Xidmətə Çağırış üzrə Dövlət Xidməti vətəndaşları qurumdan göndərilən hərbi xidmətə çağırış məktublarına dərhal reaksiya verməyə çağırıb. Əks halda, bu, cinayət məsuliyyətinə də səbəb ola bilər.
Hərbi xidmətə yararsız olması barədə sənəd alanların sağlamlığı yenidən yoxlanacaq. Bu sənədlərin necə verildiyi ilə bağlı araşdırma aparılacaq.
Səfərbərlik və Hərbi Xidmətə Çağırış üzrə Dövlət Xidməti mediada yayılan bu xəbərlərə münasibət bildirib. Xidmətin hüquq təminatı şöbəsinin baş zabiti Rəşad Qasımovun sözlərinə görə, belə araşdırma onsuz da xidmətdə daimi olaraq aparılır. Ancaq düzgün olmayan şəkildə təqdim olunan məlumatlar da var. R.Qasımovun fikrincə, 18 yaşdan 35 yaşa qədər xəstəliyə görə möhlət hüququ verilən şəxslər hər 3 ildən bir yoxlanışa cəlb olunur. 16 yaşdan qeydiyyata alınan yeniyetmələrdə isə hansısa sağlamlıq problemi ortaya çıxarsa, onların müalicəsi xidmətin göndərişi ilə pulsuz olaraq həyata keçirilir.
R.Qasımov SHXÇDX-nin hansısa şöbəsində göstərilən xidmətdən narazı qalan vətəndaşların dərhal qurumun mərkəzi aparatına məlumat verməli olduğuna diqqət çəkib.
Hərbi mükəlləfiyyəti olan şəxslərin çağırış gələndə dərhal deyilən vaxtda lazımi yerdə olması xüsusi diqqət tələb edir. Əks halda, səfərbərlik anında bu tələblərə riayət etməyən şəxslər İnzibati xətalar yox, Cinayət Məcəlləsi ilə məsuliyyət daşıyacaq. SHXÇDX-nin 9100 nömrəli çağrı mərkəzi də vətəndaşların xidmətindədir.
Ümumilikdə, bu istiqamətdə görülən işlərə ekspertlər necə yanaşır? Bunun nə kimi əhəmiyyəti var? Neqativ halların aradan qaldırılmasında nə kimi rol oynayacaq?
Məsələyə münasibət bildirən VİP-in sədr müavini Ramil Hüseynov buna müsbət prizmadan yanaşdı: "Prinsipcə, rəsmi qurumlar tərəfindən belə yoxlamaların aparılması normal haldır. Bu, ordu quruculuğunun inkişafına ümumən müsbət təsir göstərə bilər. Nəzərə almaq lazımdır ki, hərbi xidmət spesifik sahədir. Orduda hər adam xidmət edə bilməz. Yəni hərbi qulluğa yararlı olanlar xidmət keçməlidir. Ancaq o da heç kəsə sirr deyil ki, bəziləri hərbi xidmətdən yayınmaq üçün müxtəlif vasitələrə əl atır. Yəni müxtəlif vasitələrlə çalışırlar ki, orduya yararsız bileti alsınlar. Belə halların qarşısını almaq baxımından bu yöndə yoxlamaların aparılması, hesab edirəm ki, normaldır. Maksimum çalışmaq lazımdır ki, bu sahədə hansısa neqativ hal baş verməsin. Çünki ordunun gücləndirilməsi böyük əhəmiyyət kəsb edir".
Vidadi ORDAHALLI
