Ey şəkillərdən, videolentlərdən, xalqımızın tarixindən, taleyindən, dünənindən, bugünündən və gələcəyindən boylanan İnsan, ulu öndər. Cismani yoxluğun varlığın boyda sevgimizlə hər gün ucalsa da, dünən olduğu kimi, Sən həmişə bizimləsən və bundan sonra da bizimlə qalacaqsan. Çünki Azərbaycan adlı məmləkəti bütün dünya Heydər zirvəsi ilə gördü və tanıdı.
Hər adın gələndə təkcə dilimizə deyil, könlümüzə elə bir sükut hakim kəsilir ki, gözümüzü göynədən həsrət yaşları qarşısında aciz qalırıq, sözümüz qəhərimizlə boğazımızda düyünlənir.
Birliyimizə, bütövlüyümüzə gedən yola dünən varlığınla çıxdıq, bu gün isə o yolu ölməz xəyalınla və amallarınla addımlayırıq.
"Azərbaycan dünyaya günəş kimi doğacaq", - deyirdin. Bax, indi o doğan günəşin çevrəsində birlik sədaları altında dövrə vurub yallı gedən hər bir günəşqanlı Vətən övladı fəxarətlə, inamla "Mən həmişə fəxr etmişəm, bu gün də fəxr edirəm ki, Azərbaycanlıyam", - deyir.
Bilirəm, sağlığında varlığına, bu gün də müqəddəs ruhuna rahatlıq verməyən bir nigarançılıq, bir ağrı var. O nigarançılığın, o ağrının adı Qarabağdır.
Ulu öndərim, qanınla, canınla qurduğun Azərbaycan ordusu, "Sənə güvənirəm", - dediyin Azərbaycan əsgəri hər birimizi, dünyanın harasında olursa-olsun, ürəyi Vətən eşqi ilə döyünən hər bir azərbaycanlını o ağrıdan tezliklə qurtaracaq, Qarabağ adlı yaramıza məlhəm qoyacaq.
"Mən İlham Əliyevə özüm qədər inanıram", - dediyin fikri bu gün bütün Azərbaycan xalqı deyir. Sənə inandığımız qədər biz də ona inanırıq. İnanırıq ki, tarixə ilk qələbəmiz kimi düşən Horadiz döyüşlərinin davamı olan, millətimizin bir olduğunu, həmrəy olduğunu bütün dünyaya sərgiləyən igid oğullarımızın Aprel qəhrəmanlığının səsi çox yaxında Şuşamızdan, Laçınımızdan, Kəlbəcərimizdən, Xocalımızdan... gələcək. Qoynunda uyuduğun torpaq sənə "gözün aydın deyəcək".
Öndərim, liderim, üzümüzə gələn o müqəddəs, üçrəngli bayrağımızı azad edəcəyimiz torpaqlara sancacağımız günün bir adı olacaq-Qələbə!
Ruhun şad olsun!
Hafiz Təmirov polis mayoru
