Tapdıq Abbas: "Azərbaycan Mətbuat Muzeyinin yaradılması media tarixinin hərtərəfli öyrənilməsinə şərait yaradacaq" Elçin Mirzəbəyli: "Azərbaycan Mətbuat Muzeyinin yaradılması həm medianın inkişafı, həm də gələcək nəsillərin ölkə mətbuatı haqqında təsəvvürlərinin olması baxımından zəruridir"
"Azərbaycan Mətbuat Muzeyinin yaradılması vacib məsələdir. Bizim mətbuatımızın tarixi ilə bağlı olan nümunələr bir sıra muzeylərdə, arxivlərdə toplanıb. Çox təəssüf ki, bəzi nəşrlərin nüsxələri Azərbaycanda yoxdur". Bunu media nümayəndələrinə Azərbaycan Mətbuat Şurasının sədri, millət vəkili Əflatun Amaşov deyib.
O qeyd edib ki, mətbuat tarixi, o cümlədən, mühacirət ədəbiyyatı ilə bağlı eksponat və sənədlər şəxsi muzeylərdə, müxtəlif ölkələrin arxivində saxlanır: "Sankt-Peterburq, Moskva, Ankara, İstanbul, Berlin, Varşava və Paris arxivlərində sənədlər, o cümlədən, ayrı-ayrı şəxslərə aid əşyalar saxlanır. Azərbaycan Mətbuat Şurası bu sənədlərin toplanması ilə bağlı geniş layihə həyata keçirib. Türkiyədə, Berlində, Varşavada işıq üzü görən mətbu orqanlarının nüsxələrini toplamışıq. Eyni zamanda, Əli bəy Hüseynzadənin, Əhməd bəy Ağaoğlunun bir sıra əşyalarını əldə etmişik. Bu iş Mətbuat Şurasının İdarə Heyətinin üzvü, Milli Məclisin deputatı Cavanşir Feyziyevin birbaşa yardımı ilə həyata keçirilib".
Ə.Amaşovun sözlərinə görə, ayrı-ayrı mətbuat vasitələrinin tarixi nüsxələrini toplamaq həmin xalqın tarixi ilə bağlı araşdırmaların aparılmasında çox əhəmiyyətli rol oynayır: "Biz öz tariximizi öyrənməli və sevməliyik. Ona görə də muzeyin olması vacibdir".
Media kapitanları da Azərbaycan Mətbuat Muzeyinin yaradılması təklifini dəstəkləyir.
"Paralel" qəzetinin baş redaktoru Tapdıq Abbas "Bakı-Xəbər"ə açıqlamasında qeyd etdi ki, Azərbaycan mediasının keçdiyi yol uzun tarixə dayanır: "Bəllidir ki, bu il Azərbaycan mediasının 142-ci ildönümü qeyd olunacaq. Bütün peşə sahələri üzrə muzeylər ölkəmizdə fəaliyyət göstərir. Mətbuat Muzeyi yaradılarsa, bu sahədə olan bütün nümunələr orada əks olunacaq. "Əkinçi" qəzetindən tutmuş, bu günə qədər olan mətbuat nümunələri Mətbuat Muzeyində olacaq. Həmçinin, media sahəsində çalışmış klassiklərin həyat və fəaliyyəti barədə materiallar da muzeydə öz əksini tapacaq".
həmsöhbətimizin fikrincə, Azərbaycan Mətbuat Muzeyinin yaradılması milli media tarixinin hərtərəfli öyrənilməsinə şərait yaradacaq. Gələcək nəsil həmin muzeydən istifadə etməklə, Azərbaycan mətbuatı haqqında mükəmməl biliyə sahib ola bilər: "Hesab edirəm ki, Azərbaycan Mətbuat Şurasının sədri Əflatun Amaşovun məlum təklifi vacib və zəruridir. Mətbuat Muzeyinin yaradılması təklifini dəstəkləyirəm. Düşünürəm ki, Prezident İlham Əliyevin Azərbaycan mətbuatına göstərdiyi qayğının davamı kimi, bu təklif də reallaşacaq".
"Xalq Cəbhəsi" qəzetinin baş redaktoru Elçin Mirzəbəyli qəzetimizə açıqlamasında bildirdi ki, Mətbuat Muzeyinin yaradılması təklifi bir neçə dəfə Əflatun müəllim tərəfindən səsləndirilib. Təklifin yenidən gündəmə gətirilməsi sevindiricidir. Belə ki, Azərbaycan mətbuatı zəngin tarixə malikdir: "Bu ənənənin qorunub saxlanması çox vacibdir. Gələcək nəsillərə Azərbaycan media tarixinin çatdırılması önəmlidir. Bu aspektdən də düşünürəm ki, Azərbaycan Mətbuat Muzeyinin yaradılması həm medianın inkişafı, həm də gələcək nəsillərin ölkə mətbuatı haqqında təsəvvürlərinin olması baxımından zəruridir".
Günel CƏLİLOVA
