Ramiz Tağıyev: "İndidən həmin adamların məhkəməsi barədə bəyanatlar səsləndirmək və prosesin necə keçirilməsinin zəruriliyinə dair "sifarişlər" vermək lazım deyil"
Bu günlərdə Baş Prokurorluq, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidməti birgə bəyanat yayaraq bildirdilər ki, Ermənistan silahlı qüvvələrinin kəşfiyyat və xüsusi xidmət orqanları tərəfindən Müdafiə Nazirliyinin Tərtər rayonu istiqamətində yerləşən bölmələrinə və yaşayış məntəqələrimizə qarşı genişmiqyaslı təxribat fəaliyyətinin həyata keçirilməsinin planlaşdırıldığı barədə əldə edilmiş məlumat əsasında aparılmış tədbirlər nəticəsində müəyyən olunub ki, xalqına, vətəninə və dövlətinə xəyanət yolunu tutan iradəsi zəif, vətəndaşlıq ruhunu və vətəninə bağlılığını itirmiş bir qrup hərbi qulluqçu və digər mülki şəxslər Azərbaycan Respublikasının suverenliyi, ərazi toxunulmazlığı, dövlət təhlükəsizliyi və müdafiə qabiliyyəti zərərinə olaraq, düşmən kəşfiyyatçıları ilə məxfi əməkdaşlığa cəlb edilərək müxtəlif vaxtlarda maddi maraqları naminə hərbi sirr təşkil edən məlumatları əldə etməklə düşmən tərəfinə ötürüblər.
Toplanmış materiallar əsasında dövlətə xəyanət və digər faktlar üzrə 2017-ci il 3 may tarixdə Hərbi Prokurorluqda Cinayət Məcəlləsinin 274-cü maddəsi ilə cinayət işi başlanaraq, Baş Prokurorluq, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidmətinin əməkdaşlarından ibarət birgə istintaq-əməliyyat qrupu yaradılıb və ibtidai istintaq aparılır.
Çox maraqlıdır ki, bəzi müxalif dairələr bu məsələ ətrafında da süni ajiotaj yaratmağa cəhd edir. Onlar iddia edir ki, bu istiqamətdə istintaq, onlar barəsində məhkəmə işləri açıq aparılmalıdır ki, cəmiyyət bu barədə tam məlumatlansın.
Bu iddiaları nə dərəcədə əsaslı saymaq olar?
Siyasətçi Ramiz Tağıyev qəzetimizə açıqlamasında bildirdi ki, sözügedən xəbərdən vətənini, millətini sevən hər bir şəxs təəssüf hissi keçirir: "Bilirsiniz ki, müharibələr tarixində belə hallar çox olub. Dünyanın hətta ən qüdrətli orduları belə xəyanət halları ilə rastlaşıb. Ancaq bu o demək deyil ki, biz yaşanan halla bağlı bütün çılpaqlıqları açıb ortaya qoymalıyıq. Hərbi sirr deyilən bir anlayış var, onun qorunması çox vacibdir. Məhz bu səbəbdən də qanunvericilikdə hətta qapalı məhkəmələrin keçirilməsilə bağlı xüsusi müddəa var. Adi cinayət işlərində belə istintaq dövründə bütün məlumatlar qapalı saxlanır. Məhkəməyə gəldikdə, hərbi və dövlət sirrinin açıla biləcəyi ehtimalı olan bütün proseslər qapalı aparılmalıdır. Bu məsələdən siyasi şou düzəltməyə ehtiyac yoxdur. Hesab edirəm ki, həmin hərbçilərin həbs edilməsində heç bir başqa motiv ola bilməz. Çünki bu elə bir hal deyil ki, hansısa dövlət qurumuna və ya güc nazirliyinə dividend qazandırsın. Bu səbəbdən də istintaqın gedişinə siyasi çalar qatmağa ehtiyac yoxdur. İndidən həmin adamların məhkəməsi barədə bəyanatlar səsləndirmək və prosesin necə keçirilməsinin zəruriliyinə dair "sifarişlər" verməyə gərək yoxdur. Adətən bu kateqoriyadan olan işlərin istintaqı çox çəkir. Səbrli olub gözləmək lazımdır".
Məhəmmədəli QƏRİBLİ
