Əlbəttə ki, dünya şöhrətli müdrik və uzaqgörən siyasətçi, ötən əsrin və yaşadığımız XXI əsrin nadir şəxsiyyətlərindən olan ümummilli liderimiz Heydər Əliyevin çoxcəhətli titanik, bəşəri, beynəlxalq aləmdə əks-səda doğuran siyasi-ictimai fəaliyyətini təhlil etmək, açıqlamaq bir mövzuya sığmaz. Həqiqətən tarixdə Heydər Əliyev kimi unversal siyasətçilər çox azdır.
Həm də bu şəxsiyyətlərə dəyər vermək özü böyük bir başlanğıcın əsasıdır. Elə insanlar var ki, böyük, nəhəng insanlara qəlbən, ruhən bağlıdırlar. Uzun müddətdir tanıdığım, şəxsiyyətinə və yaradıcılığına hörmət etdiyim şair Eldar Həsənli də belə insanların sırasındadır. Onun Heydər Əliyev şəxsiyyətinə sevgisi çoxumuzda heyrət doğurur. Bu sevgini biz onun şeirlərində, məqalələrində və hətta adi söhbətlərində belə gördük.
Yaxşı yadımdadır; 1992-ci ildə - o zaman ki, Heydər Əliyevə qarşı bəzi mənbələr laqeyd münasibətdə idi, insanların çoxu hətta yanlarında onun adının çəkilməsindən ehtiyat edirdilər, mən şair Eldar Həsənlidən soruşdum ki, səni Heydər Əliyevçi olmağa nə vadar edib? O, qıyqacı mənə baxdı, özünəməxsus duruşuna özünəməxsus görkəm verdi və dedi: - Mən Heydər Əliyevçi olmamışam... Təxminən beş-on saniyə susdu, işıq qonmuş gözlərini heyrət sarmış gözlərimə dikdi və yenə də özünəməxsus tərzdə cavab verdi: - Mən Heydər Əliyevçi doğulmuşam!
Eldar Həsənlinin Heydərçi doğulmasını "Bütöv Türk dünyasının babası - Heydər baba!" şeiri də təsdiqləyir:
Bütöv Türk dünyasının babası - Heydər baba!
Azərbaycan səslənir, sənin adın gələndə,
Bir ehtiram bəslənir sənin adın gələndə,
Bir millət əzizlənir sənin adın gələndə,
Bu Vətənə, bu xalqa olmusan sipər, baba,
Sən, ey şah vüqarımız, sən, ey dağ qürurumuz,
Ey damarda qanımız, ey gözlərdə nurumuz,
Düşüncəmiz, duyğumuz, hissimiz, şüurumuz,
Dizdə taqət, qolda güc, ey canda hünər baba,
Sən qoşa bir zirvəsən Heydər baba dağıyla,
Sən dünyada məşhursan Azəri qaynağıyla,
Gəlmisən yer üzünə ancaq sülh sorağıyla,
Səpdiyin hər bir toxum cücərər, bitər, baba,
Sən biçimdə dünyaya özgəsi gələ bilməz
Şərik çıxıb dərdimə tən yarı bölə bilməz,
Sənə qarşı millətin istəyi ölə bilməz,
Zaman bir də yetirməz sənin kimi ər, baba,
Özünü siyasətçi sananlardan incimə,
Allahını qəlbində dananlardan incimə.
Ağlı dayaz, duyğusuz nadanlardan incimə,
Vətənin dar günüdü, gər sinəni, gər, baba,
Sənin öz əlindədi dərdimizin çarası,
Sən gəlməsən millətin sağalarmı yarası?
Bir də qayıt Vətənə, Gəncə-Bakı arası
Öz əlinlə əkdiyin çiçəkləri dər, baba,
Dillər, dinlər içində gəl özün qur dövləti,
Qoyma yad əllərində dağılmağa sərvəti,
Ölüm-itim, qan-qada üzdü daha milləti,
Al saçaqlı günəşi üstümüzə sər, baba,
Həsənlinin qəlbində əbədi heykəlin var,
Gələcəyin əlini sıxa bilən əlin var!
Dünyaya şəfəq saçan nurlu, pak əməlin var,
Sizə haqdan pay gəlib o cürət, təpər, baba,
10 oktyabr 1992-ci ildə yazılmış "Bütöv Türk dünyasının babası - Heydər baba!" şeiri ümumilikdə 8 bənddir. Bu şeirdə - baxışları düzgün səmtə yönəldən bu əsərdə Eldar Həsənlinin Heydər Əliyev şəxsiyyətinə sevgisini, sədaqətini və diqqətini aydın sezirik. Onun şeirin sonunda:
...Sizə haqdan pay gəlib o cürət, təpər, baba,
Bütöv Türk dünyasının babası - Heydər baba!-
deməsi də onun ümummilli liderə rəğbətinin bariz-poetik təcəssümüdür.
Eldar Həsənli ilə redaksiyada, dəhlizdə tez-tez görüşürük. Nədən danışır-danışsın, hansı mövzudan bəhs edir-etsin, fikirlərinin əsas məntiqini Heydər Əliyev qayğısı ilə cilalayır. Açığı, hər dəfə söhbət əsnasında o bu vacib fikirləri diqqətimizə çatdırır:
- Ulu öndərimiz həyatı boyu gərgin çalışıb, mükəmməl siyasi və ictimai təcrübə qazanıb. Həmin təcrübə bugünkü Azərbaycan Respublikasının yeni dövlətçiliyinin möhkəmlənməsində, iqtisadiyyatın inkişafında və s. özünü açıq göstərir. Biz Heydər Əliyevin nə qədər uzaqgörən siyasətçi olduğunu onun ideyası olan və düzgün işlənib hazırlanmış "Dövlət Neft Strategiyası" adlı siyasətində bir daha görürük. Məhz Heydər Əliyev demokratik, müstəqil, dünyəvi və unitar Azərbaycançılıq siyasəti sayəsində ölkəmiz böyük siyasi və sosial-iqtisadi uğurlara nail olub. Həqiqətən Heydər Əliyevin 1969-1982-ci və sonrakı illərdə Azərbaycana rəhbərlik edərkən keçirdiyi bir sıra islahatlar və tədbirlər özünü bu gün də büruzə verir. Onun idarəçilik məharəti bu islahatların düzgün aparıldığına bir dəlildir.
Məhz "Bütöv Türk dünyasının babası - Heydər baba!" şeirindən də bəlli olur ki, ümummilli liderimiz Heydər Əliyevin uzaqgörənlik və müdrikliklə bağlı apardığı islahatların həyatiliyi və faydalılığı indi təkcə respublikamızda deyil, bütün dünyada geniş əks-səda doğurur və yüksək qiymətləndirilir. Şeirdəki parçalarda da əks olunur ki, Heydər Əliyev fəaliyyətə başladığı ilk gündən köhnəliyə, ədalətə qarşı ciddi mübarizə aparıb, idarəetmə strukturlarında ciddi keyfiyyət dəyişiklikləri edib.
Eldar Həsənli bu fikirləri də çox önəmli sayır:
- Azadlıq, müstəqillik həm ayrıca bir vətəndaş üçün, həm də bütöv xalqlar, millətlər üçün ən müqəddəs, ən şirin nemətdir. Biz azadlığımızın, müstəqilliyimizin yolunu illərlə gözləmişik, mübarizə aparmışıq, bu yolda minlərlə şəhid vermişik. Azadlığı, müstəqilliyi əldə etmək nə qədər çətindirsə onu qoruyub saxlamaq bir o qədər mürəkkəb və ağır məsələdir. Qüdrətli və möhkəm dövlət olmadan azadlıq və müstəqillik də yoxdur.
Xalqların və millətlərin taleyində, formalaşmasında, dünyadakı yerinin müəyyənləşdirilməsində tarixi şəxsiyyətlərin, dahi siyasətçilərin və müdrik dövlət başçılarının müstəsna rolu danılmazdır. Bəşəriyyətin yetirdiyi Heydər Əliyev kimi nadir dühalar isə özləri bütöv bir salnamə, tarix yaratmağa qadir olurlar. Ulu öndərin Azərbaycanın müdrik rəhbəri kimi çoxşaxəli fəaliyyəti, vətən və xalq qarşısındakı ölçüyəgəlməz misilsiz xidmətləri dahi şəxsiyyətlərin tarixin gedişində həlledici rol oynadıqlarını əyani şəkildə təsdiqləyən ən dəyərli nümunələrdəndir. Açığı, Eldar Həsənlinin yuxarıdakı şeirində bu aspektlər özünü labüd poetik şəkildə qabardır.
"Azərbaycanlıyam" adlı həyat nəğməsində də şair Heydər Əliyev sevgisini qabarıq təzahür etdirir:
Ahəstə addımlayın, orda bir bəşər yatıb,
Millətin taleyini düşünən bir ər yatıb,
Orda Heydər uyuyub, o yerdə öndər yatıb,
Cənnətdi bax, bu torpaq, Fəxri Xiyabanlıyam,
Azərbaycanlıyam!
Biz bir daha inanırıq ki, Eldar Həsənli həqiqətən də anadan təpədən-dırnağadək məhz Heydər Əliyevçi doğulub.
Hikmət Məlikzadə, Prezident təqaüdçüsü
