Paşa Qəlbinur: "Bu təklifi müsbət dəyərləndirirəm" Əhməd Qəşəmoğlu: "Düşünürəm ki, bu mükafat təsis olunacaq" Adilxan Bayramov: "...yaxşı bir addım olardı" Rauf Qurbanov: "Azərbaycan dövləti tərəfindən belə bir mükafat təsis olunarsa..." Əli Orucov: "Ümid edirəm ki, Prezident İlham Əliyevin təşəbbüsü dəstək qazanacaq"
Bildiyimiz kimi, Bakıda keçirilən IV Beynəlxalq Mədəniyyətlərarası Dialoq Forumu başa çatıb. Forum bütün dünyanı maraqlandıran, sülhsevərlik və humanizm, birgəyaşayış mədəniyyəti ilə bağlı bir sıra yeni fikir, təklif və çıxışlarla yadda qaldı. Sirr deyil ki, Azərbaycan həmişə milli mədəniyyətlərin qovuşduğu diyar, tolerantlıq məkanı olub. Burada müxtəlif millətlər, dini və etnik mənsubiyyətindən asılı olmayaraq, mehriban dostluq şəraitində yaşamış və bu gün də müstəqil dövlətimiz xalqların birgəyaşayış ənənələrini qoruyub saxlayır.
Mövcud milli-mədəni müxtəliflik və etnik-dini dözümlülük mühiti ölkəmizi dünya miqyasında mədəniyyətlərarası dialoqun bənzərsiz məkanı edib.
Artıq bir neçə ildir Azərbaycanda "Bakı prosesi"nə start verilib və bu prosesin humanitar, mədəni, siyasi tərəfləri, istiqamətləri bütün dünyada təqdir edilir.
Dünyanın bir sıra ölkələrindən IV Beynəlxalq Mədəniyyətlərarası Dialoq Forumuna çoxlu sayda nüfuzlu şəxs, beynəlxalq qurumların təmsilçiləri qatılmışdı. Tədbirdə çıxış edən Azərbaycan Respublikasının Prezidenti İlham Əliyevin "Bakı prosesi" ilə bağlı maraqlı fikirləri diqqəti cəlb edir. Ölkə başçısı çıxışında qeyd edib ki, "Bakı prosesi" mükafatının təsis edilməsi ilə bağlı təkliflər səsləndirilir: "2008-ci ildə Avropa Şurası ölkələri nazirlərinin toplantısını keçirən zaman müsəlman ölkələri nazirlərini dəvət etdik, mədəniyyətlərarası dialoqu müzakirə etdik. 2009-cu ildə müsəlman ölkələri nazirlərinin toplantısına isə Avropa ölkələrinin nazirlərini dəvət etdik. Azərbaycan mədəniyyətlərarası dialoqda bu rolu oynamaqla fəxr edir. Təklif edilib ki, "Bakı prosesi" mükafatı təsis olunsun, mədəniyyətlərarası dialoqa töhfə verən insanlara təqdim edilsin".
Ölkə başçısının səsləndirdiyi təklifə münasibət bildirən ziyalılar və siyasi xadimlər hesab edir ki, "Bakı prosesi" mükafatının təsis edilməsi Azərbaycanın beynəlxalq aləmdə imicinə daha da müsbət təsir göstərəcək.
"Prezidentlə həmrəyəm"
Tanınmış şair, göz cərrahı, professor Paşa Qəlbinur bizimlə söhbətində təklifə müsbət yanaşdığını bildirdi: "Bu təklifi müsbət dəyərləndirirəm. "Bakı prosesi" mükafatı təsis olunsun və aidiyyəti sahədə əməyi olan insanlara verilsin. Ölkə başçısının fikirlərini təqdir edirəm. Bilirsiniz ki, bədnam qonşularımız dünyada haqqımızda qara fikirlər formalaşdırmağa çalışır. Əslində, Azərbaycanın necə ölkə olması hamıya məlumdur. Azərbaycanda, sözün əsl mənasında, bütün dinlərin və millətlərin nümayəndələrinə yüksək səviyyədə münasibət var. Biz dünyada da sülh, əminamanlıq görmək istəyirik. Bu mükafat təsis edilərsə, ölkəmizə ancaq müsbət imic qazandırar. Prezidentlə həmrəyəm".
"Düşünürəm ki, həmin mükafat təsis olunacaq"
Professor Əhməd Qəşəmoğlu "Bakı-Xəbər"ə bildirdi ki, "Bakı prosesi" mükafatının təsis edilməsi təklifini təqdir edir. Bütün humanitar, sülhpərvər layihələrdə Azərbaycanın örnək olduğunu deyən Ə.Qəşəmoğlunun sözlərinə görə, bu mükafat təsis olunarsa, bunun dövlətimizin beynəlxalq nüfuzuna müsbət təsiri olar: "Dünyada gedən proseslər hamımıza məlumdur. Mən bir alim olaraq Mədəniyyətlərarası Dialoq Forumunun keçirilməsini yüksək qiymətləndirirəm. Bu forumlar insanların sülh, qarşılıqlı hörmət şəraitində yaşamasına yönəlmiş bir tədbirdir. "Bakı prosesi" mükafatının təsis edilməsi təklifinə müsbət yanaşıram. Hər bir mükafat stimulvericidir. Sosial psixologiyadan da aydındır ki, hər hansı bir sahədə stimulverici amillər o sahədəki fəaliyyəti effektiv edir, daha da gücləndirir. Amma stimul verən amillər şəffaf və ədalətli şəkildə istifadə olunanda daha da effekt verir. Düşünürəm ki, həmin mükafat təsis olunacaq və obyektiv şəkildə təqdim ediləcək. Onda da, təbii ki, beynəlxalq səviyyədə yaxşı əks-səda doğuracaq və bir sıra insanların bu işə fəal qoşulmasına, kömək etməsinə imkan yaradacaq. Bu həm də Azərbaycanın mövcud imicinə bir töhfədir. Bu mükafatı təsadüfi adamlar almayacaq. Onu beynəlxalq aləmdə nüfuz sahibi olan adamlar alacaq və onların da adı Azərbaycanla çəkiləcək. Təqdim ediləndə deyəcəklər ki, Azərbaycanın təsis etdiyi "Bakı prosesi" mükafatının laureatı. Bu, Azərbaycanın imici üçün yaxşı düşünülmüş müsbət bir ideyadır".
"...yaxşı bir addım olardı..."
Professor Adilxan Bayramov bizimlə söhbətində təklifə müsbət yanaşdığını bildirdi: "Bu təklifə müsbət yanaşıram. Hesab edirəm ki, bu mükafatın təsis olunması yaxşı bir addım olardı".
Azərbaycanda bütün xalqların nümayəndələrinin bərabərhüquqlu vətəndaş olduğunu deyən A.Bayramov hesab edir ki, ölkəmiz bu sahədə bütün dünyaya nümunədir.
"Bu mükafata layiq olan insanların..."
Azərbaycan Kommunist Partiyasının (AKP) sədri Rauf Qurbanov da "Bakı-Xəbər"ə açıqlamasında "Bakı prosesi" mükafatının təsis edilməsi ideyasını yüksək dəyərləndirdiyini bildirdi: "Belə bir mükafatın təsis olunmasını təqdir edirəm. Hesab edirəm ki, mədəniyyətlərarası dialoqa həsr edilən hər hansı bir mükafat təsis edilərsə, bu, adıçəkilən sahəyə gözəl bir töhfə olar. Bu mükafata layiq olan insanların təltif edilməsi mədəniyyətlərarası dialoqun inkişafına daha böyük fayda verər. Azərbaycan dövləti tərəfindən belə bir mükafat təsis olunarsa, bu, ölkəmizin beynəlxalq imicinə müsbət təsir göstərəcək bir amildir. Görürsünüz ki, Azərbaycanın beynəlxalq imicinin formalaşdırılması üçün nə qədər tədbirlər keçirilir. Avropa Oyunları, start götürəcək İslam Oyunları, keçirilmiş beynəlxalq musiqi festivalları və digər tədbirlər ölkəmizin nüfuzunun artmasına yaxşı təsir göstərir".
"Bu sahədə xidmətləri olanların fəaliyyəti qiymətləndirilməlidir"
AMİP funksioneri Əli Orucovun fikrincə, bu mükafatın təsis edilməsi müsbət hal olardı: "Bu gün mədəniyyətlər arasında ciddi böhran getdikcə daha da şiddətlənir. Yaxın Şərq, Şimali Afrika qan çanağına dönüb. İslam coğrafiyasına nəzər yetirsəniz özünüz də görərsiniz ki, sabit, demokratik və münaqişəsiz bölgə yoxdur. Tolerantlıq etalonu kimi götürülən Qərbin özündə belə islamofobiya, etnik ve milli ayrıseçkilik vüsət almaqdadır. Faktiki olaraq planetimiz çox ciddi təhlükə ilə üzləşib. Nüvə silahının və kütləvi qırğın silahlarının radikal dini cərəyanların ve ifrat millətçilərin əlinə keçməsi hər an reallaşa bilər. Odur ki, mütərəqqi qüvvələr hərəkətə keçməli, bu təhlükəni önləmək istiqamətində səylərini artırmalıdır.
Təbii ki, bu sahədə xidmətləri olanların fəaliyyəti qiymətləndirilməlidir. Bu baxımdan da belə bir mükafatın təsis edilməsi müsbət addım olardı. Ümid edirəm ki, Prezident İlham Əliyevin təşəbbüsü dəstək qazanacaq".
İradə SARIYEVA
