Heydər Əliyev Fondunun vitse-prezidenti, Fondun Rusiya Federasiyasındakı nümayəndəliyinin rəhbəri Leyla Əliyeva mayın 10-da başa çatacaq Bakı Şoppinq Festivalı haqqında danışıb.
"Mən bilirəm ki, festival çox gözəl keçir və ümid edirəm iştirak etmək imkanım olacaq" - deyə o, mayın 6-da Eurasiadiary.com saytına müsahibəsində bildirib.
Onun fikrincə, bu cür tədbirlərin keçirilməsi turizmin inkişafına müsbət təsir göstərir: "Ümid edirəm ki, Bakı-Şoppinq Festival kimi tədbirlər Azərbaycana turist axınına səbəb olacaq".
Dünya Turizm Təşkilatının baş katibi həyat yoldaşını da özü ilə gətirib
"Bakı-Şoppinq Festivalı cəlbedici brendə çevrilə bilər". 4-cü Mədəniyyətlərarası Dialoq Forumunda iştirak edən Dünya Turizm Təşkilatının baş katibi Taleb Rifai bakushopfest.com saytına açıqlamasında belə deyib.
Onun sözlərinə görə, "turizm və şoping bir-birilə sıx əlaqəli sahələr olduğundan, festival turistlərin də diqqətini cəlb edir". Taleb Rifai bildirib ki, foruma gəlməzdən əvvəl Bakıda Şoppinq Festivalın keçirilməsi haqda eşitdiyi üçün həyat yoldaşını da özü ilə gətirib: "Mən işlə məşğul oluram, həyat yoldaşım isə şopinqlə. Fürsət tapan kimi özüm də Bakını gəzməyə, festivalın güzəştli təkliflərindən istifadə etməyə çalışacağam".
İSESCO-nun baş direktoru Azərbaycan Mədəniyyət və Turizm Nazirliyini ən yaxşı nazirlik adlandırdı
İSESCO-nun baş direktoru Əbdüləziz Osman Əl-Tüveycri aprelin 10-dan mayın 10-dək davam edəcək Bakı-Şoppinq Festivalını "çox ciddi layihə" adlandırıb. www.bakushopfest.com saytına açıqlamasında Tüveycri qeyd edib ki, turizmin inkişafına təkan verən Şoppinq Festival kimi layihələr çox vacibdir. "Turizm ölkənin inkişafı üçün çox vacibdir. Belə layihələr maliyyə dəstəyinə, eyni zamanda əlavə maliyyə investisiyalarının cəlb edilməsinə zəmin yaradır".
İSESCO-nun baş direktoru hesab edir ki, Azərbaycan öz gözəlliyini dünyaya uğurla nümayiş etdirir: "Azərbaycan Mədəniyyət və Turizm Nazirliyi ölkənin mədəniyət və turizm potensialının, sözün yaxşı mənasında, təbliğatının öhdəsindən layiqincə gəlir. Nazir Əbülfəs Qarayev öz işinin peşəkarıdır. Bizim təşkilat bu nazirliyi İSESCO-ya üzv olan ölkələr arasında ən yaxşı nazirlik hesab edir".
İştvan İygyarto: "Bundan sizin ölkəniz qazanır"
Macarıstanın mədəni və elmi diplomatiya üzrə dövlət naziri İştvan İygyarto www.bakushopfest.com saytına açıqlamasında Bakı-Şoppinq Festivalını turizmin inkişafı baxımından çox vacib layihə adlandırıb. "Bakı-Şoppinq Festival kimi layihələr ölkə turizminin inkişafı baxımından çox vacibdir.
Bu, eyni zamanda ölkə iqtisadiyyatının çox əhəmiyyətli və sürətlə inkişaf edən sektorudur. Ölkə mədəniyyətini təşviq etmək üçün ölkəyə turist axını cəlb etmək lazımdır. Turistlər, səyahətlə yanaşı, teatr və muzeylərə, restoranlara gedir, həmçinin şoppinq edirlər. Ən əsası isə öz istirahətləri üçün çoxlu pul xərcləyirlər ki, bundan da sizin ölkəniz qazanır", - İygyarto deyib.
Xəbər xidməti
