Mayın 5-də Kütləvi İnformasiya Vasitələrinin İnkişafına Dövlət Dəstəyi Fondunda (KİVDF) Şimali Kiprin Beynəlxalq Final Universitetinin rektoru Abdullah Öztoprakla görüş keçirilib. Görüşdə Şimali Kipr Türk Respublikasının Azərbaycandakı sabiq nümayəndəsi Zeki Qazioğlu, KİVDF-nin icraçı direktoru Vüqar Səfərli, ölkənin aparıcı KİV-nin rəhbərləri iştirak ediblər.
Tədbiri giriş sözü ilə açan KİVDF-nin icraçı direktoru Vüqar Səfərli qeyd edib ki, Azərbaycanla Şimali Kipr Türk Respublikası arasında təhsil sahəsində sıx əlaqələr var: "Şimali Kipr Türk Respublikasında xeyli sayda azərbaycanlı tələbə təhsil alır. A.Öztoprak hazırda yeni fəaliyyətə başlayan Beynəlxalq Final Universitetinin rektorudur. Abdulla bəy bundan əvvəl Doğu Akdeniz Universitetində çalışarkən də bir neçə dəfə Azərbaycanda olub və media orqanlarının rəhbərləri ilə görüşüb. Bu səfər isə Abdulla Öztoprakın Beynəlxalq Final Universitetinin rektoru kimi ölkəmizə ilk səfəridir. Mən əminəm ki, yeni fəaliyyətə başlayan Beynəlxalq Final Universitetində də qısa zamanda Abdulla Öztoprakın təcrübəli fəaliyyəti sayəsində Azərbaycandan olan tələbələr təhsil alacaq".
Daha sonra çıxış edən A.Öztoprak yeni fəaliyyətə başlayan Beynəlxaq Final Universiteti ilə bağlı məlumat verib: "Mən Doğu Akdeniz Universiteti yeni fəaliyyətə başlayanda Azərbaycandan orada 37 tələbə təhsil alırdı. Qısa zamanda bu rəqəm 450-yə çatdı. İnanıram ki, bizim yeni fəaliyyətə başlayan Beynəlxalq Final Universitetində də təhsilin keyfiyyətinə Azərbaycan vətəndaşlarında inam yaranacaq. Çünki bizim universitetdə priotet məsələ təhsilin keyfiyyətidir. Universitetdə ixtisaslar da əmək bazarında tələbat olan peşələrdir".
Bununla yanaşı, o, universitetin müəllim heyətinin sıralarına müxtəlif ölkələrdən olan kadrların da daxil edilməsinin diqqət mərkəzində olduğunu vurğulayıb və Azərbaycandan olan müəllimlərin də ali təhsil müəssisəsində çalışa biləcəyini qeyd edib.
Həmçinin, A.Öztoprak onu da bildirib ki, tədris türk və ingilis dilində aparılacaq: "Pedaqoji təhsil türk, digər ixtisaslar isə ingilis dilində tədris olunacaq. Pedaqoji fakültədə psixologiya, rəhbərlik, riyaziyyat, türk dili və bədən tərbiyəsi ixtisasları var. İngilis dilində isə kompyuter mühəndisliyi, memarlıq, İKT, inşaat, turizm, işlətmə və iqtisadiyyat ixtisaslarıdır".
A.Öztoprak çıxışı zamanı Beynəlxalq Final Universitetində illik təhsil haqqının 2000 dollar olduğunu nəzərə çatdırıb. Onun sözlərinə görə, universitetə yüksək balla daxil olan tələbələrə təhsil haqqında endirim olacaq.
O, Beynəlxalq Final Universitetinin diplomunun tək Türkiyədə deyil, Azərbaycanda, ümumiyyətlə, bütün dünyada tanındığını deyib.
Görüşdə media təmsilçilərini maraqlandıran suallara da A.Öztoprak ətraflı cavab verib. Qarşılıqlı fikir mübadiləsi şəklində davam edən görüşün yekununda KİV rəhbərləri qonağa fəaliyyətində uğurlar arzulayıb.
Tədbirə yekun vuran V.Səfərli qarşılıqlı əlaqələrin bundan sonra daha da inkişaf edəcəyinə əminliyini vurğulayıb.
Günel CƏLİLOVA
