Ötən ilin aprel müharibəsindən sonra Ermənistan prezidentinin öz ölkəsində reytinqinin kəskin düşdüyünü bu ölkənin mətbuatı gizlətməyə cəhd etmədi, hətta əksinə, zaman-zaman Sarkisyanın atdığı bir sıra addımlar mətbuatın müzakirəsinə çıxarılaraq sərt tənqid olundu.
Erməni mediasında bu səpkidə ovqat Türkiyə prezidenti Rəcəb Tayyib Ərdoğanin Rusiya dövlət başçısı Vladimir Putinlə bu həftə Soçidə baş tutan görüşü ərəfəsində də özünü göstərib. Bu görüşün ermənilər üçün daha diqqətçəkən tərəfi isə prezident Ərdoğanın Qara dəniz İqtisadi Əməkdaşlıq Təşkilatının (QDİƏT) mayın 22-də Türkiyədə keçiriləcək sammitinə Putini dəvət etməsi olub. İndi erməni camiəsini maraqlandıran əsas məqam Serj Sarkisyanın da bu sammitə dəvət olunub-olunmayacağıdır. Bu kontekstdə sözügedən ölkənin mətbuatı diqqəti ona çəkir ki, Sarkisyan əslində bu qurumun üzvüdür və protokola görə bu tədbirə dəvət olunmalıdır. Lakin elə erməni mətbuatının yazdığı kimi, Sarkisyan Türkiyəyə münasibətdə heç vaxt səmimi olmayıb və o üzdən onun bu dəvəti ala biləcəyi sual altındadır. Ermənistanın “lragir.am” saytının şərhçisi Akop Badalyanın fikrincə, bu qeyri-səmimilik özünü Türkiyədə son iki ildə baş verən üç terror hadisəsi zamanı aydın şəkildə büruzə verib. Belə ki, onun yazdığına görə, 2016-cı ilin iyun ayında İstanbul aeroportunda törədilən terror aktı ilə bağlı Sarkisyan Rəcəb Tayyib Ərdoğana başsağlığı məktubu ünvanlasa da, elə həmin ilin martında baş verən analoji olayla bağlı bunu etməyib. Bunlardan öncəki – 2015-ci ilin oktyabrında da Ermənistan prezidenti baş vermiş faciə ilə bağlı Türkiyə rəhbərliyinə başsağlığı verib. Badalyan bu kontekstdə diqqəti maraqlı bir nüansa yönəldir. Bildirir ki, Sakisyanın Türkiyəyə münasibətindəki bu “ziqzaq” onun Putinin əlinə baxması ilə bağlıdır. Belə ki, Rusiya prezidenti Putinin Ərdoğanla münasibətləri qaydasında olanda Sarkisyan bu ölkəyə faciə ilə bağlı başsağlığı göndərib, onlar arasında gərginlik yaşandığı dövrdə isə Türkiyənin “dərdinə şərik olmağa lüzum görməyib”. Bu isə açıq-aşkar Sarkisyanın Moskvanın marioneti olduğunun sübutudur və maraqlıdır ki, bu ölkənin mətbuatı artıq “bir çubuğun hərəkətilə” oturub-qalxan prezidentinə sayğısını hər keçən gün itirir. Əslində isə bəlli məsələdir ki, bu sayğını itirilməyə məhkum edən Sarkisyanın özüdür .
O halda maraqlıdır, öz ölkəsində hörməti olmayan bir dövlət başçısı digər dövlətdən sayğılı bir dəvət gözləyə bilərmi?
Samirə
