Aqşin Əliyev: "Hesab edirəm ki, bəşəri dəyərlərin təbliği baxımından olduqca böyük effektə malik olacaq"
4-6 may tarixlərində Bakıda IV Ümumdünya Mədəniyyətlərarası Dialoq Forumu keçirilir. Bir çox tanınmış şəxslər və nüfuzlu dövlət xadimləri bu forumu Prezident İlham Əliyevin qlobal miqyaslı təşəbbüsü hesab edir.
Forumun və prosesin tərəfdaşları UNESCO, BMT-nin Sivilizasiyalar Alyansı, Dünya Turizm Təşkilatı, Ərzaq və Kənd Təsərrüfatı Təşkilatı, Avropa Şurası, İSESCO kimi beynəlxalq təşkilatlardır. Bu baxımdan da Ümumdünya Mədəniyyətlərarası Dialoq Forumuna dünyanın ayrı-ayrı ölkələrindən və beynəlxalq təşkilatlardan nüfuzlu şəxslər dəvət olunub.
Tədbirin mühüm özəlliklərindən biri də budur ki, forumun yüksək səviyyəli tədbirləri BMT-nin televiziyası və internet resursunda canlı yayımlanacaq. İlk dəfə olaraq, BMT bilavasitə özünün təşkil etmədiyi tədbiri öz kanalları vasitəsilə canlı yayımlayacaq.
Forumun işinin BMT-nin internet resursları vasitəsilə translyasiya olunması tədbirin beynəlxalq aləmə təsiri baxımından hansı effekti verəcək?
Ekspert Aqşin Əliyevin sözlərinə görə, Bakının ev sahibliyi etdiyi foruma artıq Azərbaycan brendi kimi yanaşılmağa başlanıb: "Çünki dünyanı narahat edən problemlərin həlli istiqamətində məhz belə bir formatda ciddi işlər görmək olar.
Azərbaycan Prezidenti İlham Əliyevin 2011-ci il 27 may tarixində imzaladığı Fərmanla Ümumdünya Mədəniyyətlərarası Dialoq Forumu hər iki ildə bir dəfə keçirilir. Bu fərmandan irəli gələrək, 7-9 aprel 2011-ci ildə Bakıda I, 29 may-1 iyun 2013-cü ildə II, 18-19 may 2015-ci ildə III Ümumdünya Mədəniyyətlərarası Dialoq Forumu keçirilib. Azərbaycan Prezidentinin himayəsi ilə keçirilən bu forum UNESCO, BMT-nin Sivilizasiyalar Alyansı, BMT-nin Dünya Turizm Təşkilatı, Avropa Şurası, İSESCO-nun birgə tərəfdaşlığı ilə təşkil edilən yeganə platformadır. Hazırda isə ölkəmizdə IV Ümumdünya Mədəniyyətlərarası Dialoq Forumu keçirilir. Daha əvvəl keçirilən forumların uğurlu nəticəsi və hər il genişlənən mütərəqqi təcrübəyə əsaslanan IV Bakı Forumu, öz növbəsində, mədəniyyətlər və sivilizasiyalararası gərginliklərin aradan qaldırılması istiqamətində ciddi nəticələrin əldə edilməsini hədəfləyir. Bunun üçün təbliğatın düzgün aparılmasının da mühüm rolu var. Bu baxımdan da BMT-nin internet resurslarının məsələyə yüksək önəm verməsi çox faydalıdır. Çünki adətən həmin resurslar yalnız BMT-nin təşkil etdiyi tədbirlərin translyasiyasına dəstək verir. Burada isə istisnaya yol veriblər. Hesab edirəm ki, bəşəri dəyərlərin təbliği baxımından olduqca böyük effektə malik olacaq".
Məhəmmədəli QƏRİBLİ
