Mayın 2-də ulu öndər Heydər Əliyevin anadan olmasının 94 illiyi münasibətilə Qırğız Respublikasının Prezidenti yanında Dövlət İdarəçilik Akademiyasında "Heydər Əliyev və Dövran" adlı beynəlxalq konfrans keçirilib.
Beynəlxalq konfransda Qırğız Respublikası Prezidenti Aparatının, Hökumətin nümayəndələri, Qırğızıstanda akkreditə olunmuş diplomatik nümayəndəliklərin və beynəlxalq təşkilatların rəhbərləri, ölkənin ictimai-siyasi xadimləri, Qırğızıstanın 29 regionunun dövlət qulluqçuları, Akademiyanın rəhbərliyi və professor-müəllim heyəti, magistrlar, tələbələr, Azərbaycan diasporunun nümayəndələri və jurnalistlər iştirak edib.
Konfransın əvvəlində iştirakçılar Akademiyanın foyesində Heydər Əliyevin həyat və fəaliyyətini əks etdirən foto və kitab sərgiləri ilə tanış olublar. Daha sonra "Heydər Əliyevlə bir gün" adlı sənədli film nümayiş etdirilib.
Konfransı giriş sözü ilə açan Qırğız Respublikasının Prezidenti yanında Dövlət İdarəçilik Akademiyasının rektoru Almaz Nasırov qeyd edib ki, Heydər Əliyev kimi dahi, tarixi və dünyamiqyaslı şəxsiyyətin doğum gününə həsr olunan beynəlxalq konfransın rəhbərlik etdiyi Akademiyada keçirilməsindən şərəf duyur və Akademiyanın tələbələrinin belə bir şəxsiyyəti özlərinə nümunə götürmələrini arzu edir.
Sonra Azərbaycanın Qırğızıstandakı səfiri Hidayət Orucov ümummilli lider Heydər Əliyevin şərəfli ömür yolu, Azərbaycanın tarixindəki müstəsna xidmətləri haqqında məlumat verib. Səfir Heydər Əliyevin doğum gününün yalnız əlamətdar təqvim günü olmadığını, bu günün həm də ölkəmizin Heydər Əliyevə nələr borclu olduğunu yada salmağa imkan verdiyini vurğulayıb. Hidayət Orucov ölkənin yalnız tarixini deyil, həm də qurucularını yadda saxlamağın vacib olduğunu, bu dahi şəxsiyyətlərin ölümsüz olduqlarını və onların hər zaman gələcək nəsillərin qəlbində yaşayacağını qeyd edərək, belə əvəzolunmaz şəxslərdən birinin Heydər Əliyev olduğunu bildirib. Mərhum prezidentin həm keçmiş SSRİ dövründə, həm də müstəqillik illərində respublikamıza rəhbərlik etdiyi illərdə əldə olunan uğurlardan danışan H.Orucov Heydər Əliyevin keçmiş SSRİ-nin rəhbərlərindən biri olduğunu diqqətə çatdıraraq, onu dünya şöhrətli siyasi xadim, böyük nüfuza malik dövlət xadimi kimi xarakterizə edib. Bildirib ki, Heydər Əliyevin müstəqil Azərbaycan dövlətinin və dövlətçiliyinin möhkəmləndirilməsi istiqamətində müstəsna xidmətləri olub.
Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində Heydər Əliyevin təşəbbüslərindən danışan səfir deyib ki, BMT Təhlükəsizlik Şurası Ermənistan hərbi qüvvələrinin işğal olunmuş Azərbaycan torpaqlarından qeyd-şərtsiz çıxarılması, məcburi köçkünlərin ev-eşiklərinə qaytarılması ilə əlaqədar dörd qətnamə qəbul edib. Lakin işğalçı Ermənistan dövləti hələ də bu sənədləri yerinə yetirmir və bununla da dünya ictimaiyyətinə meydan oxuyur.
Səfir böyük dövlət xadimi Heydər Əliyevin qırğız xalqına da xüsusi diqqət və məhəbbətlə yanaşdığını dilə gətirib.
Diplomat bildirib: "Ulu öndər Heydər Əliyev deyirdi: "Manas"ın dili - bizim ümumi dilimizdir. Biz kökü bir, dili bir olan xalqlarıq".
Azərbaycanın əldə etdiyi nailiyyətlərindən danışan səfir Heydər Əliyevin layiqli davamçısı Prezident İlham Əliyevin ölkəmizin dünya miqyasında qazandığı nüfuzun banisi olduğunu vurğulayıb.
Sonra söz Qırğız Respublikası Xarici İşlər Nazirliyinin İkinci Siyasi departamentinin direktoru Kanat Tursunkulova verilib. O, Heydər Əliyevin Qırğız Respublikasına 1995-ci ildə səfərinin qırğız xalqının yaddaşından silinməyəcəyini, həmin səfərin ölkələrimiz arasında əlaqələrin əsasını qoyduğunu bildirib. O, Heydər Əliyevin fenomen şəxs olduğunu, onun bütün türk dünyasında olduğu kimi, Qırğızıstanda da hər zaman yad edildiyini və sevildiyini qeyd edib. Diplomat Heydər Əliyev tərəfindən başladılan və bu gün Prezident İlham Əliyev tərəfindən davam etdirilən böyük siyasətin nəticəsində Azərbaycanın çox inkişaf etdiyini və bundan qırğız xalqının fərəh duyduğunu deyib.
Daha sonra konfransda çıxış edən diplomatik nümayəndəliklərin rəhbərləri: Türkiyə Respublikasının Qırğızıstandakı səfiri Mətin Kılıç, Qazaxıstan Respublikasının Qırğızıstandakı səfiri Ayımdos Bozjiqitov, Özbəkistan Respublikasının Qırğızıstandakı səfiri Komil Rəşidov Heydər Əliyevin Azərbaycan Respublikasının bərpasında və inkişafında böyük rolundan, onun dünyada miqyasında siyasi xadim olduğundan, təkcə Azərbaycan xalqı deyil, bütövlükdə türk dünyası qarşısındakı xidmətlərindən söhbət açıb.
Tədbirdə çıxış edən Qırğız Respublikası Baş nazirinin müşaviri, Qırğızıstan Xalqı Assambleyasının sədri Tokon Mamıtov və Qırğız Respublikasının Azərbaycandakı səfiri, professor Nurlan Aytmurzayev ulu öndərin SSRİ dövründə yüksək vəzifələrdə işlədiyi dövrlərdən, onun xalqın və vətənin çox sevməsindən və SSRİ ziyalıları arasında qazandığı hörmətdən söz açıb.
Ardından beynəlxalq konfrans panel mövzuları ilə davam etdirilib. Panelə moderatorluğu Qırğız Respublikasının Prezidenti yanında Dövlət İdarəçilik Akademiyasının professoru Baktıkan Toroqeldiyeva edib. Paneldə İkinci Dünya müharibəsi veteranı, Qırğız Respublikasının əməkdar inşaatçısı Əsəd Həsənov "Mənim Heydər Əliyevlə görüşlərim", Qırğızstan Xalqı Assambleyasına daxil olan Özbək Milli-Mədəni Mərkəzinin sədri Baxtiyarjan Fəttahov "Heydər Əliyevin türk xalqları arasında rolu", Bişkek şəhər 44 saylı orta məktəbinin direktoru Flora Xəlilova "Dahi şəxsiyyətin tarixdəki rolu", Qırğız Respublikasının Prezidenti yanında Əfv Komissiyasının üzvü Aydın Alaferdov "Heydər Əliyev - müstəqil Azərbaycanın qurucusu" və Qırğızıstanın Çuy vilayət kitabxanasının direktoru "Heydər Əliyev - ürəyimizin bir hissəsi" mövzularında məruzələr edib.
Konfransın bağlanış çıxışını edən Qırğız Respublikasının Prezidenti yanında Dövlət İdarəçilik Akademiyasının rektoru Almaz Nasırov Bişkekdə qırğız və rus dillərində çap olunan səfir Hidayət Orucovun "Heydər Əliyevin Milli Siyasəti" kitabının və Azərbaycanla bağlı çoxlu sayda kitabların Akademiyaya hədiyyə olunmasına görə Azərbaycan Respublikasının Qırğızıstan Səfirliyinə təşəkkür edib, keçirilən konfransın Akademiyanın tarixində hər zaman qalacağını vurğulayıb.
Sonda səfir Hidayət Orucov Akademiyanın xatirə kitabına ürək sözlərini yazıb.
Xəbər Xidməti
