Bu il aprelin 10-dan mayın 10-dək Azərbaycan paytaxtında Şoppinq Festivalı keçirilir. Ölkəmizdə ilk dəfə keçirilən bu festival böyük rezonansa səbəb olub. Tək yerli əhali deyil, eyni zamanda xaricilər də festivala böyük maraq göstərir.
Məlumat üçün bildirək ki, festival ildə iki dəfə keçirilir və bir neçə istiqaməti - ticarət, turizm, əyləncə, moda və mədəniyyət sahələrini əhatə edir.
Festival çərçivəsində şəhərin çoxsaylı ticarət mərkəzi qonaqlara xüsusi güzəştlər təklif edir, müvəqqəti ticarət məntəqələrində Azərbaycan və bir sıra xarici ölkələrin ticarət nişanları geniş miqyasda təqdim edilir. Azərbaycan vətəndaşları və xarici turistlər 100 AZN-dən çox mal alışı halında "Tax-free (əlavə dəyər vergisinin qaytarılması) sistemindən istifadə edə bilir.
Şoppinq həvəskarlarını artıq aprelin 10-dan etibarən paytaxtın alış-veriş mərkəzlərində görmək olar. Bakıda keçirilən Şoppinq Festivalının möhtəşəm olmasını dünya üzrə tanınmış simalar da təsdiq edir. Onlar öz sosial şəbəkə səhifələrində və festivalın rəsmi "bakushopfest.com" saytına açıqlamalarında bu barədə fikirlərini qeyd edir.
Birinci Bakı Şoppinq Festivalının fəxri qonağı olan italiyalı biznesmen və xeyriyyəçi, sosial şəbəkələrdə "rəqs edən milyonçu" kimi tanınan Canluka Vakki "İnstagram" səhifəsində Azərbaycan paytaxtına səfəri barədə paylaşım edib. C.Vakki səhifəsində bunları yazıb: "Sizləri Bakıda Şoppinq Festivalında gözləyirəm. Şənbə günü, mayın 6-da sizləri "Dicey" proqramımda gözləyəcəyəm... zövq alın!".
Məşhur müğənni və bəstəkar Sami Yusuf Bakı Şoppinq Festivalını Azərbaycan iqtisadiyyatı üçün vacib hadisə adlandırıb. O,"bakushopfest.com"a müsahibəsində bildirib ki, Bakı Şoppinq Festivalı gələcəkdə nəinki Azərbaycan, eləcə də bütün regionda böyük əhəmiyyət kəsb edəcək.
"Bu festival Azərbaycanın gələcək iqtisadi inkişafına öz töhfəsini verməklə bərabər, bu gözəl ölkəyə turistlərin gəlişi üçün böyük stimul yaradacaq. Mən əminəm ki, turistlər Azərbaycanı sevəcək. Bu təşəbbüs kommersiya aspektindən əlavə, həm də Azərbaycanın özünəməxsus mədəniyyətini və tarixini nümayiş etdirmək üçün gözəl imkandır", - deyə o vurğulayıb.
S.Yusuf əmin olduğunu bildirib ki, xarici qonaqlar Azərbaycana səfərlərindən həzz alacaq və növbəti illərdə yenidən ölkəmizə səfər edəcək.
İtaliyanın tanınmış futbolçusu Françesko Toldo Bakı Şoppinq Festivalının rəsmi saytına açıqlamasında bildirib ki, Bakı inkişaf etmiş müasir şəhərə çevrilib. O qeyd edib ki, Bakı Şoppinq Festivalına qatılanların sayı çox olacaq.
Futbloçu 2016-cı ildə Bakıya səfər etdiyini və şəhərlə yaxından tanış olduğunu deyib: "Mən əminəm ki, tədbirdə iştirak etmək üçün Bakıya axışan turistlərin sayı çox olacaq. Düşünürəm ki, bu tədbir turistlərin diqqətini cəlb edəcək".
Günel CƏLİLOVA
