Bu gün Bakıda “Heydər Əliyev – dövlət təhlükəsizlik orqanlarının ilk azərbaycanlı generalı” adlı ümumrespublika konfransı keçirilib. Trend-in məlumatına görə, konfrans Azərbaycan Dövlət Təhlükəsizliyi Xidmətinin (DTX), Gənclər və İdman Nazirliyinin, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və Heydər Əliyev Mərkəzinin təşkilatçılığı ilə keçirilib.
Tədbirdə çıxış edən DTX-nin rəisi, general-leytenant Mədət Quliyev bildirib ki, Azərbaycan xalqının Ümummilli lideri Heydər Əliyev ölkəmizin ictimai-siyasi həyatının bütün sahələrində silinməz iz qoyub, gələcək nəsillər üçün böyük məktəb yaradıb.
M.Quliyev deyib ki, ulu öndər nümunəvi ömrünün 25 ilini təhlükəsizlik orqanlarında xidmətə həsr edib: “Ulu öndər Heydər Əliyev hakimiyyətdə olduğu bütün dövürlərdə xüsusi xidmət orqanlarının inkişafını daim diqqət mərkəzində saxlayıb, bu orqanların formalaşmasına böyük önəm verib”.
O qeyd edib ki, ulu öndər Heydər Əliyev hakimiyyətdə olduğu dövrdə bütün orqanlarda milliləşmə siyasəti aparıb, Azərbaycan üçün milli kadrların hazırlanmasına xüsusi diqqət yetirib: “O zaman Azərbaycanın milli-mənəvi dəyərləri ilə yanaşı, görkəmli şəxsiyyətlərini də sıradan çıxarmağa çalışan qüvvələr ulu öndər Heydər Əliyevin bu cəsarətli addımına qarşı çıxış edib. Lakin bu təzyiqlərə baxmayaraq, Ümummilli lider Dövlət Təhlükəsizlik Komitəsinin rəhbərliyinə yüksələndə milliləşdirmə siyasətini daha geniş şəkildə davam etdirdi”.
M.Quliyev bildirib ki, Ümummilli lider Heydər Əliyev SSRİ dövründə hakimiyyətdə olduğu zaman daim Azərbaycanın ictimai-siyasi xadimlərini, ziyalılarını təqib və təzyiqlərdən xilas edib: “Ulu öndər Azərbaycanın elmi, texniki və hərbi potensialının formalaşmasına xidmət edib. Heydər Əliyevin təhlükəsizlik orqanlarında əməliyyat təcrübəsi, tövsiyələri bu gün də öyrənilir və şəxsi heyətə aşılanır”.
General-leytenant deyib ki, ulu öndər Heydər Əliyev torpaqlarımızın Ermənistana verilməsinin qarşısının alınması, rəsmi tədbirlərdə milli dilimizin istifadəsi, görkəmli xadimlərin qorunması kimi mühüm fəaliyyət aparıb: “Yenidən hakimiyyətə gəldikdən sonra Ümummilli lider Azərbaycanı parçalanma, məhv olma təhlükəsindən xilas edib, geniş islahatlara təkan verib, ordumuzun, hüquq-mühafizə və təhlükəsizlik orqanlarının fəaliyyəti müasir dövrə uyğunlaşdırılıb. Ulu öndər Heydər Əliyevin Azərbaycan tarixində rolu hər kəsə bəllidir. Bütün bunlar bizim qarşımızda Heydər Əliyev irsinin öyrənilməsi ilə yanaşı, onun gənc nəsillərə ötürülməsi öhdəliyini yaradır”.
Tədbirdə çıxış edən Azərbaycan Prezidentinin İctimai-siyasi məsələlər üzrə köməkçisi Əli Həsənov bildirib ki, bu gün doğum gününü qeyd etdiyimiz Ümummilli lider Heydər Əliyevin şah əsəri olan, uğrunda mübarizə apardığı, ağır faciələrdən, siyasi, sosial-iqtisadi və mənəvi-psixoloji böhrandan xilas etdiyi müstəqil və demokratik Azərbaycan inkişaf edir, yeni uğurlar qazanır, Azərbaycan xalqı təhlükəsizlik şəraitində, rifah içində yaşayır: "Azərbaycan dövlət müstəqilliyini rəsmən 1991-ci il oktyabrında bərpa etsə də, əslində bu müstəqilliyə gedən yolun təməli Ümummilli lider Heydər Əliyev tərəfindən hələ 1970-ci illərdə qoyulmuşdu. Məhz o illərdə Azərbaycan dotasiya ilə yaşayan müttəfiq respublikadan özünü tam təmin edə bilən qabaqcıl respublikaya çevrilib, ölkənin iqtisadi suverenliyinə zəmin yaradılıb, Azərbaycan iqtisadiyyatının şaxələndirilməsi həyata keçirilib, dənizdə neft hasilatı genişləndirilib, ölkə ərazisində çoxlu sayda zavodlar istifadəyə verilib. Azərbaycanın region və dünyanın nəqliyyat mərkəzlərindən birinə çevrilməsində o illərdə qurulmuş nəqliyyat şəbəkəsinin də rolu var".
Prezidentin köməkçisi əlavə edib ki, 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosuna üzv seçildikdən və SSRİ Nazirlər Soveti sədrinin birinci müavini vəzifəsinə təyin olunduqdan sonrakı dövrdə Heydər Əliyev fenomeni ümumittifaq miqyasında etiraf olunub.
Ə.Həsənov qeyd edib ki, Heydər Əliyevin Vətənə və xalqına xidmət nümunəsi bu gün hər birimiz, xüsusilə gənc nəsil üçün əsl nümunə hesab olunur: "Ümummilli lider həm də Azərbaycanda əsl vətəndaşlıq, əsl siyasətçi, əsl dövlət xadimi nümunələrini bizə miras qoyub. Onun xarizmatik liderliyi, möhkəm iradəsi, siyasi uzaqgörənliyi, idarəçilik istedadı, dövlətə rəhbərlik bacarığı, qlobal düşüncə tərzi Azərbaycanın müstəqilliyi və milli dövlətçiliyi uğrunda apardığı mübarizə dövründə - 1990-cı illərin əvvəllərində daha qabarıq tərzdə üzə çıxıb. Xalqımızın ciddi və taleyüklü problemlər qarşısında dayandığı həmin dövrdə Heydər Əliyev Azərbaycanın müstəqil dövlətçiliyinin, milli birliyinin qorunub saxlanılmasında misilsiz tarixi xidmətlər göstərib, xalqı məhv olmaq təhlükəsindən xilas etmək missiyası həyata keçirib.
Ümummilli liderin Azərbaycan qarşısında ən böyük xidmətlərindən biri də odur ki, siyasi tariximizdə ilk dəfə təhlükəsizlik orqanlarının milliləşdirilməsinə nail olub, əvvəllər çar “oxranka”sının, daha sonralar isə 20-30-cu illər sovet FK və NKVD-sinin azərbaycanlıların yaddaşında həkk etdirdiyi antimilli cəza aparatı obrazını tədricən, praktiki addımlarla dağıdaraq təhlükəsizlik orqanlarını xalqı, milləti qoruyan və onun öz nümayəndələrindən təşəkkül tapan bir sistemə çevirib, əsl milli təhlükəsizlik sistemi nümunəsi yaradıb. Heydər Əliyev Azərbaycan təhlükəsizlik idarəsinə rəhbər gələrkən burada çalışanlar arasında titul xalqın nümayəndələrinin - azərbaycanlıların sayı bir əlin barmaqları ilə sayıla biləcək qədər az idi. Biz əlbəttə ki, bu sistemdə çalışmış və Azərbaycana xidmət etmiş qeyri-azərbaycanlı kadrların əməyini inkar etmirik, əksinə, onların xidmətləri qarşısında öz minnətdarlıq borcumuzu ifadə edirik. Lakin sirr deyil ki, təhlükəsizlik sisteminin ictimai şüurda mənfi, azərbaycanlılara qarşı repressiya aparatı obrazının yaranması tələffüzü belə çətin familiya daşıyıcılarının 30-40-cı illərdəki fəaliyyətinin nəticəsi idi".
PA rəsmisi deyib ki, Heydər Əliyevin gəlişi ilə təhlükəsizlik sistemi milliləşdi, savadlı, peşəkar milli kadrlar irəli çəkildi, təhlükəsizlik xidməti milləti təhlükələrdən qoruyan, xalqın yetişməkdə olan milli-mədəni elitasını himayə edən bir orqan oldu. Təhlükəsizlik orqanları müstəqilliyimizin qazanılıb qorunmasında töhfələri olan şəxslərin - milli mədəni-siyasi elitanın formalaşdırılıb qorunmasında, onların fəaliyyətinin məqsədəmüvafiq məcraya yönəlməsində müstəsna rol oynayıb. Bu, ilk növbədə, Heydər Əliyevin bir zamanlar cəza aparatı kimi tanınan sistemin milli maraqlara uyğun transformasiyası naminə titanik əməyinin nəticəsidir: "Bu gün onu da qeyd etməyə məcburam ki, bir neçə il bundan qabaq sizin sıralarınızda əyləşmiş bəzi “generallar” Ümummilli liderin bu gözəl ənənəsini və nümunəsini yaşatmaq, davam etdirmək əvəzinə, öz naqis əməlləri ilə Azərbaycan milli təhlükəsizlik orqanlarının imicinə xüsusi hazırlanmış anti-Azərbaycan qüvvələrin vura bilməyəcəyi ağır zərbə vurdular. Bilirsinizmi bu, niyə belə oldu? Çünki belələrinin qəlbində Ümummilli liderə xas olan nə əsl peşəkarlıq, nə əsl ziyalılıq var idi, nə də ki onların intellekti və mənəvi ailəmi belə bir orqanın generalı olmaq üçün yetərli idi. Heydər Əliyev fəhlə ailəsində doğulub SSRİ təhlükəsizlik orqanlarının elitasının zirvəsinə yüksələn bir general idi və tam şəkildə millətinə, xalqına və dövlətinə bağlı idi. Amma Azərbaycanın təhlükəsizlik sistemini gözdən salan bəzi sizin keçmiş sələfləriniz ziyalı ailələrində dünyaya gəlsələr də, nə peşəkar çekistə çevrilə, nə də milli ziyalıların sırasına qoşula bildilər".
Ə.Həsənov qeyd edib ki, Heydər Əliyev ikinci dəfə hakimiyyətə qayıtdıqdan sonra təhlükəsizlik orqanlarının fəaliyyətinə qayğı ilə yanaşıb, bu qurumların texniki təchizatının təmin edilməsi, sovet dövründə formalaşmış peşəkar kadrların qorunması ilə yanaşı, həm də yeni gənc personalın yetişdirilməsi məsələsi də daim onun diqqət mərkəzində olub: "Qeyd edildiyi kimi, Ümummilli liderin fərmanı ilə 1998-ci ildə Milli Təhlükəsizlik Akademiyası təsis edilib".
Prezidentin köməkçisi əlavə edib ki, Ümummilli liderin yürütdüyü siyasət Azərbaycan Respublikasının Prezidenti cənab İlham Əliyev hakimiyyətə gəldikdən sonra yeni tələblər uyğun şəkildə və müvəffəqiyyətlə davam etdirilib: "Cənab Prezidentin göstərişi ilə ölkənin milli təhlükəsizlik konsepsiyası hazırlanaraq qəbul edilib. Konsepsiya dövlətimizin müstəqilliyini, ərazi bütövlüyünü, Konstitusiya quruluşunu, xalqın və ölkənin milli maraqlarını daxili və xarici təhdidlərdən qorumağa yönəlmiş siyasətin məqsəd, prinsip və yanaşmalarının müəyyən edilməsi məqsədilə hazırlanıb və təhlükəsizlik sisteminin XXI əsrin çağırışlarına cavab verəcək səviyyədə inkişaf etdirilməsini nəzərdə tutub. Bu istiqamətdə lazımi hüquqi baza yaradılıb, texniki təchizat və kadr hazırlığı işi yeni tələblərə uyğun qurulub. Təhlükəsizlik sistemində dövrün tələblərinə uyğun islahatlar aparılması və personalın sağlamlaşdırılması da xüsusi olaraq ölkə rəhbərliyinin diqqətindədir.
Əminik ki, Heydər Əliyevin şah əsəri olan Azərbaycan dövlətçiliyinin qorunması və yeni hədəflərə doğru uğurlu inkişafı naminə milli təhlükəsizlik xidməti öz vəzifə və öhdəliklərini bundan sonra da layiqincə yerinə yetirəcək".
Tədbir digər iştirakçıların Ümummilli lider Heydər Əliyevin həyat və fəaliyyəti haqqında çıxışları ilə davam etdirilib.
