Ermənistan mətbuatı, Bakıda keçirilən istənilən beynəlxalq miqyaslı tədbir ərəfəsində olduğu kimi, İslam Həmrəyliyi Oyunları ərəfəsində də özünün təxribatçı mahiyyətini işə salıb və maraqlıdır ki, bu dəfə bu əməlində İran KİV-nə istinad edib.
Belə ki, Ermənistanın panorama.am saytı İran KİV-inin yazdığını iddia edərək, bu yaxınlarda Bakının “sovetski” adlanan ərazisində söküntü planına düşən “Hacı Cavad” məscidi məsələsini yenidən gündəmə daşıyıb. İranın “Qafqaz.ir” saytına istinad edən sayt yazır ki, guya Bakı meriyası Islam Oyunlarının bitməsini gözləyir və bu Oyunların dərhal ardından məscid söküləcək. Əslində burada hər iki ölkənin hədəfi aydındır. İrəvanın mövqeyi onsuz da bəllidir və onun üzərində xüsusilə dayanmağa ehtiyac yoxdur. Irana gəldikdə isə, bu ölkəndəki müəyyən dairələrin Azərbaycandakı dindar kəsimi zaman-zaman din pərdəsi altında dövlətə qarşı, özlərinin dediyi kimi, “cihada” çağırmaları yeni mövzu deyil. Yeni olan Ermənistanın İranı özünə yaxınlaşdırmaqla Azərbaycanın əzəli və əbədi arxa-dayağı Türkiyədən ona gələ biləcək təhlükəni neytrallaşdırmaq cəhdidir. Məsələ burasındadır ki, Tehranın Azərbaycanla hər zaman münasibəti yaxşı olub. Bir neçə il öncə yaşanan nüvə qalmaqalı ərəfəsində ABŞ-dan gözlənilən təhlükə fonunda Azərbaycan Prezidentinin açıq şəkildə ölkəmizin İranın vurulmasında platsdarm rolu oynamayacağını bildirməsindən sonra isə bu əlaqələr özünün ən yüksək həddinə çatdı və rəsmi İran bu mövqeyinə görə rəsmi Bakıya təşəkkür etdi. İndiki halda regionda kimsəsiz duruma düşən Ermənistan isə İranın ona hər cür dəstək verə biləcəyinə ümid edərək bu istiqamətdə fəaliyyətini artırmaqdadır. Halbuki, ABŞ-da hakimiyyət dəyişikliyilə çox həssas dönəmə qədəm qoyan İranı bu gün öz problemləri daha çox məşğul etdiyindən, Ermənistana hansısa sahədə dəstək verəcəyi inandırıcı görünmür. Əslində bunu Ermənistan özü də etiraf edir və bu ölkənin mətbuatı zaman-zaman Türkiyənin Minsk Qrupuna üzvlüyünü qısqanclıqla qeyd edərək İranın burada təmsil olunmamasından təəssüflənir və bildirir ki, əks halda Qarabağ düyünü Ermənistanın xeyrinə çoxdan həllini tapardı. Belə vəziyyətdə İran KİV-də yer alan Azərbaycana yönəlik tənqidi və ya piar yazısı isə, təbii ki, onların işinə yarayır. Elə ermənilərin “məscid təəssübkeşliyinin” əsasında da məhz bu amil dayanır. Azərbaycanda dindar kəsimin ayaqlanmasını istəyənlərin isə əslində elə hər iki ölkədə olduğunu əlavə şərhə ehtiyac yoxdur.
O ki qaldı “sovetski”də sökülməsi nəzərdə tutulan “Hacı Cavad” məscidinə, bu məsələ ətrafında bəlkə də elə ölkənin içindəki qüvvələrin küyünə gedilərək yaşanan qalmaqalın Prezidentin anında müdaxiləsiə yoluna qoyulmasından çox keçməyib və bu faktın hər birimiz şahidi olduq. Belə ki, ölkə başçısı sözügedən məscid ətrafında yaranmış (yaradılmış) ajiotaja dərhal müdaxilə edərək məsələni şəxsi nəzarətinə götürdü və ardından Meriya açıqlama verərək bildirdi ki, tamamilə pis vəziyyətdə olan, sökülüb-tökülən bina uçurularaq, yerində yeni və daha müasir məscid binası inşa olunacaq. Buna isə dindarlar yalnız sevinə bilər...
Amma belə görünür, İranda kimlərinsə bu məsələdə “milçəkdən fil düzəltmək” planı alınmayıb və o üzdən məsələyə yenidən qayıtmağa cəhd ediblər. Erməni xisləti isə bu fürsəti qaçırmayıb. Axı Azərbaycanın dünyaya açılması və hər il hansısa beynəlxaq tədbirə özü də yüksək səviyyədə ev sahibliyi etməsi, adının dünya miqyasında çəkilməsi onları narahat etməyə bilməz... Yazıq...
Samirə
