Milli Məclisin bu gün keçirilən plenar iclasında deputatlar Avropa Şurası Parlament Assambleyasının (AŞ PA) Türkiyəni yenidən monitorinq altına alması ilə bağlı qərarını tənqid edib və bunu ikili standartların təzahürü kimi dəyərləndiriblər.
Deputat Azay Quliyev bildirib ki, AŞ PA-nın Türkiyəyə qarşı bu qərarı hər hansı ciddi arqumentə söykənmir və subyektiv bir qərardır: “AŞ PA Türkiyədə dövlət çevrilişinə cəhdi qınamadı, bu məsələyə laqeyd yanaşdı. Türkiyənin 1949-cu ildən bəri üzv olduğu bir qurumun belə qərar qəbul etməsi çox üzücüdür. AŞ PA-nın qərarında deyilir ki, “niyə Türkiyə FETO-çuları təmizləyir?!”, “Türkiyədə referendum fövqəladə vəziyyətdə keçirilib”. Hər bir ölkə terorizmə qarşı mübarizə aparır və bu addımı atardı. Ötən il Fransada da terror hadisəsi səbəbindən fövqəladə hal elan olundu və bu gün Fransada da seçkilər fövqəladə vəziyyətdə keçirilir. Niyə Fransaya qarşı belə qərar qəbul edilmir?! Məlumdur ki, bəzi qüvvələr Türkiyədən uğursuz dövlət çevrilişinin qisasını çıxırlar”.
Deputat Qənirə Paşayeva AŞ PA-nın belə bir qərar qəbul etməsinə təəssüfləndiyini qeyd edib. Onun sözlərinə görə, bu qərar bir daha müsəlman ölkələrinə qarşı ikili standartların mövcud olduğunu ortaya qoydu: “Bunu Azərbaycan olaraq hər zaman biz də yaşayırıq. AŞ PA-nın prinsiplərinə görə, quruma üzv olan bir ölkə digər üzv ölkənin ərazisini işğal edə bilməz, lakin Ermənistan illərdir ki, Azərbaycan torpaqlarını işğal altında saxlayır, ancaq AŞ PA Ermənistana heç bir təzyiq göstərmir. İndi də Türkiyəyə qarşı bu qərəzli yanaşmanı qınayırıq. İnsanlar bilməlidir ki, bu təşkilatda ikili standartlar hökm sürür”.
Deputat Zahid Oruc da AŞ PA-nın qərarının qərəzli olduğunu diqqətə çatdırıb. O qeyd edib ki, bu qərar qardaş ölkəni nəzarət altına almaq, Türkiyənin müstəqil siyasətini əngəlləmək məqsədi daşıyır: “AŞ PA özünü hər hansı qüvvələrin əlində bir alət kimi aparır, az qala özünü məhkəmə orqanına çevirib. Azərbaycan çox haqlı olaraq bu məsələdə Türkiyə ilə birlikdədir. AŞ PA-da Azərbaycanın əleyhinə olan dairələr də var”.
Deputat Çingiz Qənizadə isə bildirib ki, AŞ PA-nın bu qərarı olduqca subyektiv bir qərardır və biz bu qərara yox deyirik: “Bu qərar islamafob dairələrin və Türkiyədə uğurlu islahatları gözü götürməyən qüvvələrin maraq dairəsindədir. Bütün bunlar Türkiyədə referendumun nəticələrini başqa cür arzu edən qüvvələrin ikinci cəbhəsidir. Təbii ki, onları güclü müsəlman dövlətini görmək istəmirlər. Nəzərə alsaq ki, Türkiyə 1949-cu ildən Avropa Şurasının üzvüdür, bu qərar başa düşülən deyil”.
Deputat Siyavuş Novruzov deyib ki, AŞ PA-nın bu qərarında təəccüblü heç nə yoxdur: “Biz dəfələrlə Avropa təşkilatlarının bizə qarşı ədalətsiz qərarlarının şahidi olmuşuq və bu da növbəti ədalətsiz mövqedir. Türkiyənin daxili işlərinə qarışırlar. Seçkilərdə səslərdə fərq çox olur deyirlər ki, anti-demokratik keçirilib, fərq az olur, deyirlər niyə belədir?! Avropa bu cür yanaşma tərzi ilə hara gedir?!”.
Digər deputatlar da AŞ PA-nın qərarını pisləyib və bu qərarın Türkiyənin inkişafını ləngitmək istəyən dairələrin mövqeyi olduğunu vurğulayıblar.
Oqtay Əsədov: “AŞ PA-da Türkiyəyə qarşı yanlış qərar qəbul edilib”
“Avropa Şurası Parlament Assambleyasının yaz sessiyasında Türkiyəyə qarşı yanlış qərar qəbul edilib. Türkiyə post-monitorinq mərhələsindən monitorinq altına alındı”. Bunu isə Milli Məclisin spikeri Oqtay Əsədov deyib.
O.Əsədov bildirib ki, Türkiyə AŞ PA-nın yaranmasında iştirak edən dövlətlərdən biridir: “Türkiyə 13 il bundan əvvəl monitorinq altında olub. Ancaq AŞ PA-nın tarixində ilk dəfə olaraq bir ölkəni post-monitorinqdən monitorinq altına keçirdilər. Bizim nümayəndə heyəti buna qarşı çıxış etdi”.
“AŞPA-nın Türkiyəyə qarşı ədalətsiz yanaşması təəssüf doğurur”
“AŞPA-nın qardaş Türkiyəyə qarşı ədalətsiz yanaşması böyük təəssüf doğurur”. Bunu millət vəkili Qənirə Paşayeva deyib.
O bildirib ki, AŞPA-da müsəlman ölkələrinə qarşı ikili standartlardan yanaşmalar böyük təəssüf doğurmaqla yanaşı, narahatverici bir haldır: "Azərbaycan olaraq qardaş Türkiyəyə qarşı qəbul edilmiş bu qərarı qınayırıq. Azərbaycan AŞPA-nın ikili standartları ilə sıx-sıx üzləşən bir ölkədir. Təəssüf ki, AŞPA terrorla mübarizədə, işğalçılara qarşı mübarizədə Azərbaycana dəstək vermədi və bu gün də terrorla mübarizə aparan Türkiyəyə dəstək vermir. Tam əksinə, terrorla mübarizə aparan Türkiyəyə qarşı ədalətsiz qərarlar qəbul edir. Avropa Şurasının prinsiplərinə görə, bir üzv ölkə heç bir zaman digər üzv ölkənin torpaqlarını işğalda saxlaya bilməz, amma AŞPA-nın üzvü olan işğalçı Ermənistan digər bir üzv ölkə Azərbaycanın torpaqlarını işğalda saxlamaqda davam edir. Amma AŞPA Ermənistana qarşı ciddi təzyiq mexanizmlərinə əl atmır. Eyni zamanda, Dilqəm Əsgərov və Şahbaz Quliyevin azad olunması üçün Ermənistana təzyiq göstərmir".
Millət vəkili deyib ki, Azərbaycan və Türkiyə AŞPA-nın ikili standartlardan əl çəkməsinin vacibliyini hər zaman AŞPA tribunasından səsləndirir və çağırış edir:
"Təəssüf ki, Türkiyəyə qarşı qəbul edilən bu qərar təşkilatda bu istiqamətdə vəziyyətin daha da pisləşdiyini göstərir. Azərbaycan və Türkiyə bu təşkilatın ədalətsiz yanaşmasını qəbul etmir və etməyəcək".
Zeynəb Xanlarova “Azərbaycan xalqını qəzəbləndirib” dedi
Milli Məclisin deputatı Zeynəb Xanlarova isə deyib ki, Türkiyəni güclü görən Avropa Şurası Parlament Assambleyası, əlbəttə ki, belə qərəzli qərar qəbul edəcək. Z.Xanlarova qeyd edib ki, AŞ PA-nın bu qərarı bütün Azərbaycan xalqını qəzəbləndirib: “Təklif edirəm ki, bütün parlament adından etirazımızı bildirək. Çünki Türkiyəyə qarşı belə münasibət sabah bizə də qarşı olacaq. Belə bir məqamda biz Türkiyənin yanında olmalıyıq”.
Səməd Seyidov: “AŞ PA böyük böhran içərisindədir”
“AŞ PA-nın yaz sessiyasında Türkiyənin post-monitorinqdən sonra montorinqə keçirilməsi ilə bağlı qəbul edilən qərar ikili standartların aydın təzahürüdür” deyən Azərbaycanın AŞ PA-dakı nümayəndə heyətinin rəhbəri Səməd Seyidov isə bildirib ki, AŞ PA-nın bu dəfə keçirilən yaz sessiyası digər sessiyalardan fərqləndi: “Biz uzun müddətdir ki, prosesləri müşahidə edir, Avropada irqçilik, islamofobiyanın baş alıb getdiyini görürük. Avropada müsəlman ölkələrinə qarşı ikili standarları konkret ölkələrin siyasətində, təşkilatların bəyanatlarında görüb, hiss etmək mümkündür."
Millət vəkili qeyd edib ki, bu problem, xüsusilə də Avropada qaçqın və məcburi köçkünlər artdıqca özünü göstərməyə başlayıb: “AŞ PA-da belə tendensiyaları bir neçə ildir hiss edirik. Ümumiyyətlə, orada Türkiyə, Azərbaycana olan münasibətlərə başqa prizmadan baxılır. Lakin budəfəki yaz sessiyası bu münasibətlərin pik həddinə çatmasını göstərdi. İclasda Türkiyə ilə bağlı ədalətsiz məruzə təqdim olundu. Məruzə ilə tanış olduqda bunun qəbuledilməz olduğunu görmək mümkün idi”.
S.Seyidov deyib ki, AŞ PA-da Türkiyə ilə bağlı məruzədə PKK terrorçu təşkilat kimi təqdim olunmur: “Bu azmış kimi, ötən il Türkiyədə baş verən çevriliş cəhdi terror hadisəsi kimi qiymətləndirilmir. Türkiyənin bütün nümayəndə heyəti - həm iqtidar, həm də müxalifət nümayəndələri AŞ PA-nın qərarının əleyhinə çıxış edərək bəyan etdilər ki, AŞ PA-nın Türkiyənin post-monitorinqdən sonra montorinq altına alınması ilə bağlı qərarı Türkiyəni Avropadan ayırmaq, eləcə də həm Türkiyə, həm də Avropada daha çox problemlərin yaranmasına istiqamətlənən addımdır. Buna baxmayaraq, AŞ PA-nın iclasında Türkiyə nümayəndə heyətinin bəyanatı nəzərə alınmadı”.
Deputat əlavə edib ki, Avropada ikili standarlar budəfəki iclasda özünü daha da büruzə verdi: “Bu onu göstərir ki, AŞ PA böyük böhran içərisindədir. Bunun də səbəbi orada destruktiv, Azərbaycan və Türkiyəyə qarşı qüvvələrin olmasıdır. Belə ikili standartların mövcudluğu nəinki bizə, eləcə də Avropada böyük təhlükə yaradır. Bütün bunlar Azərbaycan-Avropa, Avropa-Şərq, eləcə də Avropa-Türkiyə münasibətlərinə böyük ziyan vurur”.
Qeyd edək ki, AŞ PA-da böyük əksəriyyət Türkiyənin Avropa Şurası qarşısında öhdəliklərinin monitorinqi proseduruna qaytarılmasına səs verib.
Qətnamədə deyilir ki, Assambleya Türkiyədəki hadisələrin monitorinqini möhkəmləndirmək və fəallaşdırmaq niyyətindədir.
