Ceyhun Məmmədov: "Bizim üçün çox sevindirici haldır ki, gənclərimiz arasında bu cür işlərə maraq artıb"
Heydər Əliyev Fondunun təşəbbüsü ilə "Küləyə qalib gəl" şüarı altında keçirilən "Bakı Marafonu-2017"yə aprelin 30-da Dövlət Bayrağı Meydanından start verilib. Saat 10:00-da start götürən marafonun məsafəsi 21 kilometr olub.
Marafonda Heydər Əliyev Fondunun vitse-prezidenti Leyla Əliyeva və Arzu Əliyeva da iştirak edib.
Bakı Olimpiya Stadionunda başa çatan marafonun iştirakçıları atletlər, siyasətçilər, tanınmış şəxslər, incəsənət adamları, ictimaiyyət nümayəndələri və tələbələr olub. Respublikamızın bölgələri ilə yanaşı, marafonda ABŞ, Rusiya, Böyük Britaniya, Almaniya, Türkiyə, İran və digər ölkələrdən də iştirakçılar olub. Yarışa ümumilikdə 13 mindən çox insan qatılıb.
Marafona 16 yaşdan yuxarı şəhər sakinləri, qonaqlar əvvəlcədən qeydiyyatdan keçərək qoşulub. İlk dəfə ötən il mayın 1-də keçirilən Bakı Marafonunda 7 mindən çox idman həvəskarı iştirak edib.
Göründüyü kimi, ötən illə müqayisədə bu il marafon iştirakçılarının sayı iki dəfə artıb. Gənclərin marafona yüksək və artan həvəsi nə ilə bağlıdır?
İdman eksperti Ceyhun Məmmədovun sözlərinə görə, bu cür marafonlar indiyədək London, Paris, Boston, Nyu-York, Çikaqo, Berlin, Barselona, İstanbul və digər şəhərlərdə təşkil olunub: "Müəyyən olunmuş qaydalara görə, tam marafon yarışının məsafəsi 42 kilometr, yarı marafonun məsafəsi isə 21 kilometrdir. Marafon yarışları idman tədbiri olmaqla yanaşı, həm də xeyriyyə məqsədi daşıyır. 1981-ci ildə keçirilən məşhur London marafonu ən böyük xeyriyyə tədbiri kimi "Ginnesin Rekordlar Kitabı"na düşüb. Hazırda dünyanın bir çox ölkələrində xeyriyyə məqsədli marafonlar təşkil edilir. Marafonun əsas məqsədi Azərbaycanda idmanın inkişafına dəstək vermək, insanlar arasında, xüsusilə gənclərdə idman vasitəsilə sağlam həyat tərzini təşviq etmək, onları xeyirxah məqsədlər naminə bir araya gətirməkdir. Məlum olduğu kimi, Bakı Marafonundan toplanan vəsait Heydər Əliyev Fondunun valideyn himayəsindən məhrum olan uşaqlarla bağlı layihəsinə yönəldiləcək. Göründüyü kimi, marafon özündə bir çox xeyirli aspektləri birləşdirib. Bizim üçün çox sevindirici haldır ki, gənclərimiz arasında bu cür işlərə maraq artıb. Demək ki, gənclərimiz sağlam həyat və xeyriyyəçiliyə çox meyllənir".
Məhəmmədəli QƏRİBLİ
