Yadigar Məmmədli: "Burada hansısa media orqanına xüsusi imtiyaz verməkdən söhbət gedə bilməz"
Xəbər verildiyi kimi, Səbail Rayon Məhkəməsində Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası üzrə "Azadlıq" qəzetinin azadlıq.info, "Azadlıq" radiosunun azadlıq.org, azərbaycansaatı.com, Meydan.tv saytları və "Turan" telekanalı (Turan TV) və "Azərbaycan saatı" teleproqramlarının bloklanması ilə bağlı məhkəmə iclası başlayıb.
Hakim Nurəddin Bağırovun sədrliyi ilə prosesdə iddiaçının nümayəndəsinin etibarnaməsi olmadığı məlum olub. Buna görə iclas mayın 1-dək təxirə salınıb.
Qeyd edək ki, Elektron Təhlükəsizlik Mərkəzi qeyd olunan saytların bloklanması barədə mülki iddia ilə bir müddət əvvəl məhkəməyə müraciət edib.
Məlumat üçün qeyd edək ki, bu ilin martında qanuna edilən düzəlişə görə, icra hakimiyyəti orqanı saytların bloklanmasına təşəbbüs göstərə bilər. Eyni zamanda, qanuna görə, qadağan edilən informasiyanın yerləşdirilməsi ilə bağlı öncə internet resurslara məlumat verilməli və çıxarılması tələb olunmalıdır. Saytların rəhbərliyi bundan imtina edərsə, nazirlik məhkəməyə müraciət edə bilər.
Bütün hallarda, görünən odur ki, bəzi saytlar qanunla müəyyən olunmuş qaydalara riayət etmək istəmir. Bu da, öz növbəsində, həmin saytların bloklanması məsələsini qaldırmağa əsas yaradır. O üzdən, sözügedən məsələni ekspertlər necə şərh edir? Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, media orqanları mövcud qanunvericiliyə əməl etməlidir: "Azərbaycanda KİV haqqında müvafiq qanunvericilik var. Eyni zamanda, digər qanunvericilik aktları var ki, onların vasitəsilə sözügedən məsələlər tənzimlənir. Hesab edirəm ki, KİV həmin qanunlar çərçivəsində fəaliyyət göstərməlidir. Dəfələrlə bəyan olunub ki, kimliyindən asılı olmayaraq, hər bir şəxsin fəaliyyəti qanunla tənzimlənməlidir. Hesab edirəm ki, bu belə də olmalıdır. Bu nəinki bizdə, bir sıra digər ölkələrdə də belədir. O üzdən, bütün media orqanları qanun çərçivəsində fəaliyyət göstərməlidir. Burada hansısa media orqanına xüsusi imtiyaz verməkdən söhbət gedə bilməz". Vidadi ORDAHALLI
